“...Mənim Azərbaycan cəmiyyəti ilə çox açıq kommunikasiya kanalım var”. Bunu Prezident İlham Əliyev Çinin CGTN telekanalına müsahibəsində bildirib.
Prezident nə demək istədi və açıq kommunikasiya kanalları deyəndə nəyi nəzərdə tutur?
“Azərbaycan Prezidenti İlham Əliyev hər zaman xalqının yanında olub və cəmiyyəti narahat edən problemlərdən, maraqlandıran məsələlərdən də daim xəbərdar olduğunu dəfələrlə öz çıxışlarında bildirib”. Bunu “SƏS” qəzetinin baş redaktoru, siyasi ekspert Bəhruz Quliyev “Bakı-Xəbər”ə Prezident İlham Əliyevin Çinin CGTN telekanalına müsahibəsi zamanı irəli sürdüyü fikirlərini şərh edərkən deyib.
Onun sözlərinə görə, dövlət başçımızın eyni zamanda Azərbaycan cəmiyyəti ilə çox açıq kommunikasiya kanalları olduğunu deməsi də kifayət qədər belə bir qənaətə gəlməyə zəmin yaradır ki, bu gün ölkəmizdə fəaliyyət göstərən KİV resursları, habelə sosial media da onun diqqət mərkəzindədir: “Biz xatırlaya bilərik ki, Prezident İlham Əliyev hər gün mətbuatı izlədiyini və ölkədə baş verən hadisələri də KİV-lərdən öyrəndiyini vurğulayır. Yəni cəmiyyətlə açıq kommunikasiya kanallarından biri də media və dünyada, eləcə də Azərbaycanda cərəyan edən olayları ictimailəşdirən sosial şəbəkə platdormalarıdır.
Ancaq digər məqam da var ki, bu, dövlət başçımızın hər zaman xalqının yanında olmasıdır. Onun istər regionlarda, istərsə də paytaxtda olduğu səfərlərində əsasən xalqın, cəmiyyətin yanına getməsi, onlarla danışması, söhbətləşməsi, problemlərini öyrənməsi, əhalini maraqlandıran sualları cavablandırması – bütün bunlar da bilavasitə xalqla, cəmiyyətlə mövcud olan açıq kommunikasiya faktorunun göstəricisidir”.
Siyasi ekspertin sözlərinə görə, məhz bu kimi faktorlar xalqın Prezidentinə olan sevgisini, inamını daha da artırır: “Xalq görür ki, onun Prezidenti demək olar gecə və gündüz, yorulmadan, əzmlə onun üçün çalışır, fəaliyyət göstərir, dövlətin maraqlarını müxtəlif platformalarda müdafiə edir. Çünki o, 2003-cü ildə keçirilən prezident seçkilərində vurğuladığı fikirlərini sübuta yetirir, hər bir azərbaycanlının Prezidenti olduğunu isbatlayır. Bu gün də hər bir reallıq, hər bir uğur gerçəkliyi göz önündədir və artıq Azərbaycan vətəndaşları da şahidi olurlar ki, İlham Əliyev hər bir azərbaycanlının Prezidentidir. Bu baxımdan, onun xalqla, cəmiyyətlə açıq kommunikasiyalarının olduğunu xüsusi olaraq vurğulaması məhz həmin anlamı, həmin mənanı kəsb edir”.
İradə SARIYEVA
