12 dekabr 2022-ci il tarixdə səhər saatlarından başlayan və artıq 40 günə yaxındır fasiləsiz olaraq Xankəndi-Gorus yolunun Şuşadan keçən hissəsində - Laçın yolunda davam edən aksiya postmüharibə dövründə Qarabağla bağlı ən mühüm proseslərdəndir.
Burada söhbət Azərbaycan cəmiyyətinin sülhməramlıların müvəqqəti nəzarətində olan ərazilərimizdə hələ də davam edən ekoterrora son verilməsindən, ermənilərin xarici şirkətlərlə birlikdə qanunsuz istismar etdikləri faydalı yataqlarımızda dövlət qurumlarımızın monitorinq aparılmasına şərait yaradılmasından, Laçın yolundan qanunsuz yüklərin daşınmasına son qoyulmasından gedir. Qeyri Hökumət Təşkilatları Laçın yolundakı aksiyanın lokomotividir. Laçın yolundakı aksiya bu sektorun cəmiyyət, dövlət üçün nə qədər lazımlılığını, inkişafının nə qədər mühüm məsələ olduğunu ortaya qoydu.
QHT-lər çox peşəkarlıqla, nizam-intizamla, usanmadan Azərbaycan adına mübarizə aparırlar. Görünən budur ki, dövlət, millət savaşında QHT sektoru mühüm rol alıb.
“Əmrə müntəzir bir əsgər kimi yenə də öz növbəmi gözləyirəm”
Həmin aksiyada fəal iştirak edən “Uşaqların Gələcəyi Naminə” İB sədri Könül Quliyeva “Bakı-Xəbər”ə açıqlamasında bildirdi ki, onun özü də aksiyada fəal iştirak edib: “ Əmrə müntəzir bir əsgər kimi yenə də öz növbəmi gözləyirəm ki, aksiyada iştirak edim. Havanın soyuqluğuna baxmayaraq, iştirak etmək istəyənlərin sayı o qədər çoxdur ki, bizə növbə çatmır. Dekabrın 12-dən etibarən başlayan etiraz aksiyası Azərbaycanın qeyri-hökumət təşkilatlarının dövlətin və xalqın yanında olduqlarını nümayiş etdirir. Bu aksiya zamanı, həmçinin zamanda QHT-lər milli məsələlərdə təşəbbüsü ələ alaraq, flaqman rolunu öz üzərilərinə götürmək qabiliyyətini də sərgilədilər. Ölkəmizin ərazilərindən müvəqqəti yerləşdirilmiş Rusiya sülhməramlılarının nəzarəti altında olan Azərbaycan torpaqlarında erməni cinayətkarlar tərəfindən ekoloji terrorun törədilməsinə, həmçinin təbii sərvətlərimizin qanunsuz istismarına etiraz edən vətəndaş cəmiyyəti nümayəndələri 37 gündür ki, Laçın-Xankəndi yolunda dinc aksiya keçirirlər. Bu aksiya bir sıra məqamlarla fərqlənir. Əvvəla, bu aksiya Azərbaycanda vətəndaş cəmiyyətinin inkişaf etdiyini və yüksək fəallığını göstərdi. Dövlət və xalq üçün lazım olan anda vətəndaş cəmiyyəti bir yumruq kimi birləşə, milli maraqlarımızın müdafiəsinə qalxmağı bacara bildiyini ortaya qoydu.
Digər tərəfdən bu dinc aksiya Azərbaycanda vətəndaş cəmiyyəti təşkilatlarının sülhsevər, insanlığa xidmət edən təşkilatlar olması gerçəkliyini üzə çıxardı. Qeyd etməliyəm ki, vətəndaş cəmiyyəti təşkilatlarının, QHT-lərin bu uğurda pay sahibi olması təsadüfi deyil. Bu, ilk növbədə, ölkəmizdə QHT sektorunda aparılan islahatların nəticəsidir. Aparılan bu islahatlar, vətəndaş cəmiyyətinin inkişafı üçün ardıcıl dövlət dəstəyinin olması, o cümlədən son illərdə QHT sektorunda qrant siyasətində şəffaflığın təmin edilməsinin nəticəsidir ki, bu gün qeyri-hökumət təşkilatları ölkəmizdə milli əhəmiyyətli məsələlərdə vacib rol oynamaqdadırlar. Yəni, artıq bütün dünyaya səs salan, o cümlədən Azərbaycan xalqının milli məsələlərdə dönməzliyini bir daha sübuta yetirən bu aksiya ölkəmizdə vətəndaş cəmiyyəti ilə dövlət arasında əməkdaşlığın və dialoqun hədər getmədiyinin əyani təzahürüdür”.
“Özgə baltasına sap olan QHT təmsilçilərimiz də var...”
QHT rəhbərinin sözlərinə görə, Azərbaycan QHT təmsilçilərinin medianın da aktiv iştirakı ilə düzənlədiyi unikal aksiya cəmiyyətimizin bütün təbəqələri tərəfindən hərarətlə dəstəklənir: “Təsadüfi deyil ki, 12 dekabr səhər saatlarından başlayan bu aksiya ən önəmli hadisə kimi , medianın diqqətindən düşmür. Aksiya Azərbaycan xalqı ilə yanaşı, Ermənistan və region ölkələrin ictimaiyyətləri tərəfindən də həssaslıqla izlənməkdədədir. Soyuq və qar-qış şəraitində keçirilən bu aksiyada iştirak edənlər öz canları bahasına böyük fədakarlıqlar göstərir və bütün bunlara Azərbaycanın haqq davasına faydaları olur deyə dözürlər.
Təəssüf ki, bu cür analoqsuz və möhtəşəm aksiyada iştirak edən QHT-lərlə yanaşı, özgə baltasına sap olan QHT təmsilçilərimiz, siyasətçilər və media mənsubları olan azərbaycanlılar da var. Onlar ermənilərin dara düşdükləri bütün situasiyalarda olduğu kimi, “NO WAR”-çılıqlarını yenə də ortaya qoymuş, aksiyanı və prosesi qaralamaqla, başqa məsələləri qabartmaqla məşğuldurlar. Bunların prosesə heç bir təsiri olmayacaq və biz məqsədimizə çatacağıq”.
QHT-lərin milli birlik modeli bütün dünyaya ən uğurlu şəkildə nümayiş olundu
Ölkəmizin vətəndaş cəmiyyəti fəalları dinc aksiya mədəniyyətinin necə olduğunu həm Ermənistana, həm də onların havadarlarına növbəti dəfə nümayiş etdirirlər. QHT-lər tərəfindən milli birlik modeli bütün dünyaya ən uğurlu şəkildə nümayiş olundu. Aksiya iştirakçıları təkcə öz fikirlərini ifadə etmir, həm də Azərbaycan xalqının milli mənafeyini və haqlı tələblərini ortaya qoyurlar. Beynəlxalq aləmin bu aksiyaya susqunluq nümayiş etdirməsi insanda hiddət hissi doğurur.
Lakin bu etinasızlıq qeyrətli azərbaycan övladlarının iradəsini qıra bilməz. 30 il ərzində işğal altında qalan 20% torpaqlarımızı qəhrəman azərbaycan ordusu Ali Baş Komandan İlham Əliyevin rəhbərliyi ilə cəmi 44 günə azad edibsə, bu məsələdə də istəyimizə nail olacayıq.
Məhəmmədəli QƏRİBLİ Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
