Ermənistan xarici işlər naziri Ararat Mirzoyan yenə bir sıra məsələləri təhrif edir. O bəyan edib ki, guya Azərbaycan sülh müqaviləsinin mətninin müzakirəsini dayandırıb. O bildirib ki, erməni tərəfi bir ay əvvəl sənədin mətni ilə bağlı öz təkliflərini göndərib, lakin indiyədək Azərbaycandan cavab almayıb:
“Biz öz təkliflərimizi Azərbaycan tərəfinə göndərmişik. Artıq bir aydır ki, heç bir cavab yoxdur. Təkliflərimizi göndərmişik, amma dediyim kimi, Azərbaycan tərəfdən indiyə qədər heç bir cavab yoxdur. Belə çıxır ki, Azərbaycan tərəfi sülh müqaviləsinin mətni ilə bağlı faktiki müzakirələri dayandırıb”.
Halbuki, bu günlərdə Rusiya Xarici İşlər Nazirliyinin rəsmi nümayəndəsi Mariya Zaxarova keçirdiyi ənənəvi mətbuat konfransı zamanı bəyan etdi ki, Ermənistanın günahı üzündən sülh sazişinin müzakirəsi baş tutmadı: “Ermənistan və Azərbaycan XİN rəhbərlərinin sülh müqaviləsini müzakirə etmək üçün növbəti görüşü 2022-ci il dekabrın 23-də Moskvada keçirilməli idi. Azərbaycan və Ermənistan liderləri buna razılıq vermişdilər. Görüş üçün hər şey hazırlanmışdı, lakin Ermənistan rəhbərliyi son anda ölkənin xarici işlər naziri Ararat Mirzoyanın səfərini ləğv etdi. Bu isə təkcə sülh müqaviləsinin deyil, həm də Ermənistan-Azərbaycan münasibətlərinin normallaşması ilə bağlı digər aktual məsələlərin, o cümlədən Laçın dəhlizi ətrafında vəziyyətin müzakirəsinə mane oldu”.
“İrəvan məqsədli şəkildə Avropa İttifaqının moderatorluğu ilə gedən danışıqlar prosesini pozdu”
Məsələyə münasibət bildirən politoloq Tural İsmayılovun fikrincə, Ermənistan məqsədyönlü şəkildə pozuculuq fəaliyyəti ilə məşğuldur: “Hesab edirəm ki, bu, Ermənistan xarici işlər naziri Ararat Mirzoyanın Azərbaycan əleyhinə səsləndirdiyi növbəti yalanlardan biridir. Onun sülh müzakirələri ilə bağlı dediklərinin heç bir əsası yoxdur. Artıq Rusiya rəhbərliyi də Paşinyan komandasının açıq şəkildə Azərbaycanla sülhün bundan sonrakı gedişatını sabotaj edən hərəkətlərini yaxşı başa düşür. Bunu dəfələrlə brifinqlərdə həm Mariya Zaxarova, həm də xarici işlər naziri Sergey Lavrov qeyd edib. Açıq formada deyirlər ki, sülh prosesini Ermənistan tormozlayır. Azərbaycan dəfələrlə ilin sonuna qədər Ermənistanla sülh sazişinin imzalanmasının mümkünlüyünü bəyan etdi. Rəsmi Bakı bütün vasitələrlə səy göstərirdi ki, ilin sonuna qədər bu yöndə konkret addımlar atılsın. Ancaq hər dəfə Ermənistan bundan yayınırdı. Nəticədə ilin sonu ilə bağlı gözləntilər özünü doğrultmadı. Ancaq Mirzoyanın açıqlaması fonunda məlum olur ki, Ermənistan sülh sazişini sabotaj etmək siyasətindən əl çəkmək istəmir. Yenə də prosesi uzatmaqla bunlar nəyəsə ümid edirlər. Guya geosiyasi vəziyyət bunların xeyrinə dəyişəcək. Bu isə mümkün olan iş deyil. İrəvan məqsədli şəkildə Avropa İttifaqının moderatorluğu ilə gedən danışıqlar prosesini pozdu. Ermənistanın bu dərəcədə pozuculuq fəaliyyəti ilə məşğul olmasında Fransa prezidenti Emmanuel Makronun da müstəsna rolu var. Makron ötən il müxtəlif media vasitələrinə müsahibəsində təhrikedici mövqedən çıxış etdi. Nəticədə Ermənistan daha da azğınlaşaraq danışıqlarda arxayıncasına destruktiv mövqedən çıxış etdi. Ona görə də bütün bunlara görə Mirzoyanın Azərbaycanı ittiham etməsinin heç bir əsası yoxdur. Danışıqları uzadan Ermənistandır və bunu Rusiya da təsdiq edir. Bu baxımdan hesab edirəm ki, sülhlə bağli bu il Ermənistana verilən şans sonuncudur. Prezident İlham Əliyev bunu açıq dedi. Əgər bunu dəyərləndirməsələr, o zaman Ermənistanı dəhşətli faciələr gözləyir”.
Bir sözlə, politoloq hesab edir ki, məsuliyyət Ermənistanın üzərinə düşür.
Vidadi ORDAHALLI
