Ermənipərəst senatorlar yenə vəziyyəti qəlizləşdirmək istəyirlər. Yenə Birləşmiş Ştatların dövlət və milli maraqlarını erməni lobbisinə qurban verməyə çalışırlar.
Məsələ ondadır ki, bir neçə senator dövlət katibi Entoni Blinkenə “Artsaxa” kömək çağırışı ilə məktub göndərib. Məktubun mətni tamamilə qərəzli və yalan üzərində qurulub. Məktubda iddia edilir ki, guya Laçın yolundakı aksiya Qarabağ erməniləri üçün fəlakətli nəticələr yarada bilər: “Azərbaycan hakimiyyəti Dağlıq Qarabağ “vətəndaşları”nın həyatını vəhşicəsinə təhdid etdiyi bir vaxtda Birləşmiş Ştatlar dayana bilməz və mülki əhalinin ərzaq, ilkin tələbat mallarından məhrum edilməsinə görə Azərbaycanı məsuliyyətə cəlb etməlidir. Azərbaycan mülki şəxslərin ərzaq və ilkin tələbat mallarına çıxışını qadağan etdiyinə görə məsuliyyət daşımalıdır. Birləşmiş Ştatlar mühasirədə olan əhali üçün humanitar və zəruri malların sərbəst axınının bərpası üçün addımlar atmalıdır”.
Məgər, Azərbycan Qarabağdakı etnik erməniləri ərzaq təminatından məhrum edib? Bu necə təcridetmədir ki, hər gün onlarla maşın Ermənistandan Qarabağa ərzaq və digər zəruri məhsulları daşıyır?
“Vaşinqtonda yaxşı bilirlər ki, Azərbaycan Laçın yolunu bağlamayıb və burda hər hansı bir qanunsuzluq yoxdur”
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, bir sıra senatorlar erməni lobbisinin əlində alətə çevriliblər: “Bir qrup senatorun müraciəti ilk növbədə erməni lobbisinin dəstəyi ilə həyata keçirilir. Zatən belə olacağı gözlənilən idi. Çünki illərdir ABŞ-da müəyyən konqresmenlər, senatorlar erməni lobbisinin əlində girova çevriliblər. Bilinkenə məktubla müraciət də bunun tərkib hissəsidir. Hər vasitə ilə çalışırlar ki, Birləşmiş Ştatların dövlət maraqlarını Qarabağda bir ovuc erməniyə qurban versinlər. Ümumiyyətlə, Azərbaycan Laçın dəhlizini bağlamayıb və humanitar məqsədlər üçün istifadə edilir. Bu barədə deyilənlər ermənilərin yalan təbliğatının bir hissəsidir. Reallıq ondan ibarətdir ki, Ermənistan buradan silah-sursat və təbii ehtiyatların qanunsuz daşınmasını həyata keçirməyə çalışır. Erməni lobbisi bu yoldan məhz Azərbaycana qarşı çirkin məqsədlər üçün istifadə edir. Hazırda ABŞ-ın bu məsələyə yanaşması erməniləri narahat edir. Onlar istəyirlər ki, Vaşinqton Laçın yolu məsələsinə müdaxilə etsin. Bu isə mümkün görünmür. Çünki senatorların bu müraciəti vəziyyəti gərginləşdirməyə xidmət edir. Laçın yolundan istifadə qaydaları tənzimlənməli və qanunsuz daşınmalara son qoyulmalıdır. Vaşinqtonda yaxşı bilirlər ki, Azərbaycan Laçın yolunu bağlamayıb və burda hər hansı bir qanunsuzluq yoxdur. Ona görə də Vaşinqtondan ciddi hərəkət olmayacaq. Baş verən proseslər birbaşa Azərbaycanın maraqları kontekstində inkişaf edəcək. Ümumiyyətlə, bu, Azərbaycanın daxili işidir və digər ölkələr buna qarışa bilməzlər. Əfsuslar olsun ki, xəstə düşüncəli erməni lobbisi bununla barışmaq istəmir”.
Vidadi ORDAHALLI
