“Fərrux əməliyyatının əsas səbəbi təkcə o strateji yüksəklikləri nəzarətə götürmək deyildi”. Bunu Prezident İlham Əliyev yerli telekanallara müsahibəsində deyib.
Ölkə başçısının sözlərinə görə, o yüksəkliklərdən bizim böyük ərazimiz atəş altında idi və orada bu gün də hələ mövcud olan qanunsuz erməni silahlı birləşmələri vaxtaşırı bizim tərəfə atəş açırdılar: “Hətta Xaçınçay su anbarının təmiri də mümkünsüz idi. Yəni ona görə Fərrux əməliyyatının keçirilməsi bu təhlükəni aradan götürdü və bu, bir çoxları üçün gözlənilməz olmuşdur, o cümlədən Ermənistan üçün və Qarabağda yuva salmış separatçılar üçün. Onlar hesab edirdilər ki, Azərbaycan Silahlı Qüvvələri heç vaxt o ərazilərdə hər hansı bir əməliyyat aparmayacaq. Biz bu mifologiyanı da darmadağın etdik. Bu, bizim ərazimizdir və orada ciddi əməliyyat aparmamağımızın səbəbi ondan ibarət deyil ki, kimdənsə qorxuruq, sadəcə olaraq, biz hesab edirik ki, indi istədiyimizə siyasi yollarla nail olmalıyıq”.
“Məlum oldu ki, heç bir qüvvə Azərbaycana öz məqsədlərinə çatmağa mane ola bilməyəcək”
Məsələyə münasibət bildirən hərbi ekspert İbrahim Rüstəmlinin fikrincə, Fərrux əməliyyatı təkcə hərbi nöqteyi-nəzərdən yox, siyasi baxımdan da Ermənistana və erməni separatçıları himayə edənlərə böyük dərs oldu: “Separatçılar və onları himayə edən dairələr hesab edirdilər ki, Azərbaycan Rusiya sülhməramlılarının məsuliyyət zonasında hər hansı əməliyyat keçirməyə cəsarət etməz. Buna cəhd etsə, Rusiya ilə üz-üzə gəlməli olacaq. Məhz buna arxayın olan separatçılar Fərrux yüksəkliyindən istifadə edib təxribatlara əl atırdılar. Oradan ara-sıra atəş açmaqla Ağdamda, o cümlədən Xaçınçay su anbarında aparılan bərpa-quruculuq işlərinə mane olmağa çalışırdılar, ard-arda təxribatlar törədirdilər. Ancaq onların bu arxayınçılığına birbaşa zərbə endirildi. 2022-ci lin martın 24-də ordu birləşmələrimiz qısa bir müddətdə Fərrux yüksəkliyini nəzarətə götürərək bu təxribatlara son qoydu. Ağdam şəhəri ilə yanaşı, böyük bir ərazi atəş altından çıxarıldı. O vaxtdan rahat şəkildə tikinti-quruculuq, bərpa işləri aparılır. Bunun sayəsində ermənilərin Rusiyadan gözləntiləri fiaskoya uğradı. Elə hesab edirdilər ki, Rusiya sülhməramlılarının məsuliyyət zonası olduğu üçün Kreml buna kəskin reaksiya verəcək. Gözləntiləri o idi ki, Rusiya yüksəkliyi geri qaytarmaq üçün güc yoluna əl atsın. Ancaq bunların heç biri baş vermədi. Xüsusən də Rusiyada Ermənistanı himayə edən dairələr böyük dərəcədə məyus oldular. Məlum oldu ki, heç bir qüvvə Azərbaycana öz məqsədlərinə çatmağa mane ola bilməyəcək. Fərrux əməliyyatından sonra “Qisas” əməliyyatı həyata keçirildi. Qisas əməliyyatı da məhz Qarabağ istiqamətində həyata keçirildi. Bir sıra olduqca vacib strateji yüksəkliklər nəzarətə götürüldü. Bütün bunlar o deməkdir ki, növbəti təxribatlar baş verərsə və bu davamlı hal alarsa, o zaman Qarabağ tamamilə terrorçulardan güc yolu ilə təmizlənəcək. Bu zaman da heç bir qüvvə bizə mane ola bilməyəcək”.
Vidadi ORDAHALLI
