Son vaxtlar Ermənistan güya Azərbaycandan ona hücum təhlükəsinim artması ilə bağlı əsası olmayan bir təbliğat aparır. Hətta bəyan edir ki, KTMT-nin təlimlərindən imtina etmələrinə baxmayaraq, Azərbaycanın hücum taktikası zəifləməyib.
Həmin tədbirdən əvvəl Ermənistan fikirini belə əsaslandırırdı ki, təlimlər Türkiyə ilə Azərbaycana qarşı çevrildiyi üçün, bitəndən sonra onlar pis vəziyyətdə qala bilərdi. Güya onlar KTMT-yə Ermənistanda təlim keçirməyə imkan verməməklə Azərbaycana və Türkiyəyə “yaxşılıq” etmiş olublar. Ermənistanın son vaxtlar “Azərbaycan bizə hücum edəcək” kimi ritorikadan daha çox istifadə etməsinin arxasında hansı maraqlar dura bilər? Təbiidir ki, Ermənistan Azərbaycanın indiki məqamda ona hücum etməyəcəyini hamıdan yaxşı bilir.
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, Ermənistan hakimiyyətinin Rusiyaya qarşı açıq demarşları davam edir: “Söhbət rəsmi İrəvanın Kollektiv Təhlükəsizlik Müqaviləsi Təşkilatının hərbi təlimindən imtina qərarından gedir. O qərardan ki, onu ölkənin baş naziri Nikol Paşinyan özü şəxsən açıqlayıb.
Əslində, ötən il də Ermənistanda anti-Rusiya gündəliyi aktual olmuşdu. Bu baxımdan Paşinyan iqtidarının KTMT-nin noyabrın 23-də İrəvanda keçirilmiş sammitindən əvvəl, toplantı günü və ondan sonra çıxardığı oyunlar diqqət çəkmişdi. Sammitdən əvvəl Moskva əleyhinə mitinqlər təşkil edilmiş, Rusiya Prezidenti Vladimir Putini təhqir edən şüarlar səsləndirilmiş, transparantlar, plakatlar qaldırılmışdı. Tədbir zamanı isə həmin vaxt quruma rotasiya qaydasında sədrlik edən N.Paşinyan bütün etiket qaydalarını pozaraq, KTMT-ni Ermənistan və Azərbaycan arasındakı sərhəd münaqişəsinə biganəlikdə günahlandırmış, habelə, təşkilatın ölkəmizə hərbi müdaxiləsi üçün əsaslar yaratmağa çalışmışdı.
Ermənistanın KTMT-nin hərbi təlimindən imtina qərarının əsaslandırılması da gülünc görünür.
Paşinyan Ermənistanın 2023-cü ildə öz ərazisində KTMT təlimlərinin keçirilməsini məqsədəuyğun hesab etmədiyini açıqlayarkən bildirir ki, təlimlər regionda təhlükə yarada bilər. Baş nazir ona da aydınlıq gətirib: KTMT təlimlər keçirəcək, bu, guya Türkiyə-Azərbaycan tandemi tərəfindən Ermənistana təhlükə yaradacaq. Ermənistanın KTMT-nin hərbi təlimindən imtina qərarının əsaslandırılması gülünc görünür. Doğrudur, N.Paşinyanın yanvarın 10-da keçirdiyi mətbuat konfransındakı izahı bir qədər fərqlidir. Ancaq bu, izahdan çox özünüifşaya bənzəyir. İki ay əvvəl KTMT-dən Azərbaycana qarşı yararlanmaq niyyətini ortaya qoymuş Paşinyan indi təşkilatın təlimini təhlükə qismində dəyərləndirəcək qədər aşkar siyasi manipulyasiyaya yol verir. Dolayısı ilə bildirir ki, Rusiya Azərbaycan və Türkiyənin qarşısında acizdir”.
Ekspertin sözlərinə görə, bütün bunların fonunda Ermənistanın Azərbaycanın güya ona hücum edəcəyi ilə bağlı yaydığı dezinformasiyada bəzi məqsədləri var: “Ermənistan bununla demək istəyir bölgəyə başqa oyunçular girməlidir ki, onun təhlükəsizliyinə zəmanət versin. Rusiyaya güvənmədiyini demək istəyir. Uzun müddətdir ki, beynəlxalq müşahidəçiləri yerləşdirməklə bağlı planını əsaslandırmaq istəyir. Bölgədə ona qarşı təhdid və təhlükənin olduğunu deyir. Gözəl bilir ki, Azərbaycan bu əsası ona verməz. Çünki biz sülhün əldə edilməsinə nail olmağa çalışırıq. Prosesi pozan isə Ermənistandır”.
Məhəmmədəli QƏRİBLİ
