Son dövrlərdə Qarabağ separatçıları arasında münasibətlərin daha gərgin mərhələyə daxil olması müşahidə edilir. Belə görünür ki, erməni əsilli rus milyarder Ruben Vardanyan buraya gəldikdən sonra separatçı rejim daxilində intriqalar daha gərgin xarakter alıb. Hələ bir müddət əvvəl məsələnin bu tərəfinə nəzər salan Ermənistanın “Qraparak” nəşri yazırdı ki, Ruben Vardanyanla qondarma rejimin “təhlükəsizlik şurasının katibi” Vitali Balasanyan arasında münasibətlər kifayət qədər gərgindir.
Qəzet qeyd edirdi ki, əvvəllər Balasanyan ruslar və azərbaycanlılarla əsas danışıq aparan şəxs idisə, indi onu arxa plana atıblar. O, hətta Xankəndidə son mitinqdə də iştirak etməyib: “Mənbəmizin məlumatına görə, Vardanyan “ya mən, ya da Balasanyan” tələbini irəli sürüb. Qondarma rejimin keçmiş rəhbəri Bako Saakyan da “hökumətin” formalaşdırılmasında aktiv iştirak edir və Ruben Vardanyanı dəstəkləyir”. Bunun ardınca Qarabağdakı separatçı rejimin “təhlükəsizlik şurasının” katibi Vitali Balasanyan istefaya göndərilib. “Azatutyun” radiosu diqqəti belə bir məqama çəkir ki, 44 günlük müharibədən sonra, əsasən humanitar məsələlərlə bağlı olsa da, Azərbaycan tərəfi ilə təmaslara girən yeganə şəxs məhz Balasanyan idi. Qeyd olunur ki, məsələn o, ötən ilin dekabrında azərbaycanlılar Laçın yolunu bir neçə saatlığına kəsəndə Azərbaycan tərəfi və Rusiya sülhməramlıları ilə danışıqlara getmişdi. Bundan əvvəl ötən ilin martında Qarabağa qazın verilməsi dayandırılanda da Azərbaycan rəsmiləri ilə danışıqları o aparmışdı. “Azatutyun” yazır ki, Qarabağ müxalifətçiləri belə çətin vəziyyətdə, Laçın dəhlizinin bir aydır bağlı olduğu bir vaxtda Balasanyanın niyə işdən kənarlaşdırıldığını anlaya bilmirlər. Radio sual edir: Bunun səbəbi Balasanyanla Qarabağın “dövlət naziri” kimi təqdim olunan Ruben Vardanyan arasında fikir ayrılığı ola bilərmi? Separatçı rejimin “parlamentində” Daşnaksutyun partiyasını təmsil edən Vaqram Balayan belə söhbətləri eşitdiyini, amma məsələnin dəqiq səbəbini bilmədiyini deyib. Amma Balayan hesab edir ki, səbəblərdən asılı olmayaraq, birgə iş üçün ortaq məxrəc tapılmalıdır. O əlavə edib ki, Balasanyan bu proseslərlə yaxından tanış idi. “Azatutyun” yazır ki, başqa bir Qarabağ müxalifətçisi, “Ədalət” partiyasının üzvü Metakse Akopyan da Balasanyanın işdən azad edilməsini qəbuledilməz sayır. O əlavə edib ki, bütün hallarda, baş verənlərə Arayik Arutyunyan cavab verməlidir. Burada onu da qeyd edək ki, Ruben Vardanyanla Arayik Arutyunyan arasında da münasibətlər gərgindir. Arutyunyan Vardanyanın onu əvəzləcəyindən ehtityat edir. Bu fonda növbəti maraqlı hadisə baş verib. Ruben Vardanyan ötən həftə bəyan etmişdi ki, hazırda Laçın dəhlizinin açılması ilə bağlı heç bir danışıq aparılmır. Lakin Rusiya Müdafiə Nazirliyi bu məqsədlə aparılan danışıqların davam etdiyini bildirmişdi. Metakse Akopyan isə qeyd edir ki, danışıqlar barədə söz demək səlahiyyəti Vardanyanda yox, Arayik Arutyunyandadır: “Ruben Vardanyan belə bəyanatlar verə bilməz, çünki bunun üçün Arutyunyan var. Belə məsələlərdə təmsilçi o olmalıdır, çünki o, buna cavabdehdir. Mən belə bəyanatlara ciddi yanaşa bilmirəm. Mən qəbul edə bilmərəm ki, “dövlət naziri” mənə danışıqların aparıldığını və ya aparılmadığını desin”.
Bu arada digər məlumata əsasən, Ruben Vardanyanın son videomüraciəti də separatçı rejimin bir çox üzvlərinin narazılığına səbəb olub. Həmin müraciətində Vardanyan erməni icmasının “blokada şəraitində” necə dolanmasını dolayısı ilə etiraf edib. Onun sözlərindən belə anlaşılıb ki, hazırda imkanlı ailələr Yeni il tətili keçirir, istirahət edir, dincəlir; bəziləri isə tonlarla benzin alıb və “dar gün üçün” saxlamaq və yaxud ehtiyacı olan məhsula dəyişməklə məşğuldur. Vardanyan bildirib ki, bir çox mağaza sahibi malları nisyə və yaxud pulsuz verməkdən imtina edir. Onun fikrincə, mağaza sahibləri tanışlarına ərzaq və digər məhsulları pulsuz verməlidirlər. Vardanyan Rusiya sülhməramlılarının və Beynəlxalq Qırmızı Xaç Komitəsinin Qarabağa ərzaq tədarükü həyata keçirdiyini bildirib. O, daha əvvəl “Byline Times”a müsahibəsində Laçın yolunun “blokadada” olmadığını da etiraf edib. “Byline Times” qəzetinə müsahibəsində Ruben Vardanyan bəyan edib ki, Rusiya sülhməramlıları müəyyən qədər ərzaq tədarük edirlər. Erməni jurnalist Onnik Krikoryan bu xüsusda qeyd edir: “Bu hələ kifayət deyil, amma bu doğrudursa, bir çoxlarını narahat edən bu məsələ ilə bağlı ilk dəfədir ki, rəsmi fikir bildirilir. Təbii ki, buna şübhə etmək üçün heç bir əsas yoxdur, amma bu fikrin səsləndirilməsi bir qədər gözlənilməz oldu. Bəlkə də bu, jurnalistin ilk dəfə bu barədə sual verməsi ilə əlaqədardır. Təbii ki, getdikcə Laçından sülhməramlıların daha iri avtomobil karvanları keçir, amma Vardanyanın sözləri gözlənilməz oldu".
Qeyd edək ki, Vardanyanın bu sözləri bir müddət öncə “Erməni İnqilabçı” Teleqram kanalının paylaşımını xatırladır. Kanal Qarabağdakı erməni icmasına müraciət edərək, restoranlardan yeyib-içməklə bağlı fotolar paylaşmamağa çağırmışdı. Çünki bu fotolar “Qarabağdakı ermənilərin humanitar fəlakətlə üzləşməsi” haqda erməni təbliğatını məhv edir, bu şəkilləri görənlər ermənilərin normal həyat yaşadığı, restoranlara və tətilə getdiyi, hər hansı çətinliyinin olmadığına əmin olurlar. İndi bunu Ruben Vardanyanın etiraf etməsi, separatçı rejimin digər bir sıra rəhbərlərinə görə, “dövlət naziri”nin naşılığından xəbər verir.
Nahid SALAYEV
