Türkiyə Azərbaycanı Milli Döyüş Təyyarəsi kimi irimiqyaslı müdafiə sənayesi layihələrində iştiraka dəvət edib. Bu barədə açıqlama verən Türkiyənin Müdafiə sənayesi naziri İsmail Dəmir layihələrdə iştirak edə biləcək 4 ölkənin adını çəkib.
İ.Dəmir dost və qardaş ölkələrin müxtəlif səviyyələrdə müdafiə sənayesi layihələrində tərəfdaş kimi iştirakına açıq olduqlarını vurğulayıb: “Milli Döyüş Təyyarələri ilə bağlı dost və qardaş ölkələrə dəvətimiz var. Bu ölkələr sırasında İndoneziya, Pakistan, Malayziya və Azərbaycanı göstərmək olar. Tələb olarsa, bu məsələni müxtəlif səviyyələrdə onlara çatdırmışıq. Bu tərəfdaşlığın bütün tərəflər üçün faydalı olacağını düşünürük”.
Görünən odur ki, Azərbaycan çox ciddi bir layihəyə ortaq edilir. Azərbaycanın qırıcı təyyarə istehsalına ortaq edilməsi Ermənistanı revanşist istəklərdən çəkindirə bilərmi? Bu addım Rusiyanı qıcıqlandıra bilərmi?
“Ölkəmiz hərbi gücünü bütün mənalarda artırdıqca, Ermənistandakı revanşizmə bu güclü zərbə olacaq”
Məsələyə münasibət bildirən hərbi ekspert İbrahim Rüstəmlinin fikrincə, sözügedən məsələdə Rusiyanın qıcıqlanıb-qıçıqlanmaması heç nəyi dəyişə bilməz: “Rusiyanın bu məsələdə qıcıqlanması artıq arxa planda dayanıb. Çünki Rusiya onsuz da Azərbaycanın istənilən müstəqil hərəkətini, milli maraqlara yönəlik addımlarını qıcıqla qarşılayır. Azərbaycanın uzun illər apardığı mübarizəyə çox ehtiyatlı, pərdəli şəkildə ikibaşlı münasibət bəsləyib. Yoxsa erməni kim idi ki, 30 il ərazilərimizi işğal altında saxlasın? Ermənistanın ən çox incidiyi ölkə Rusiyadır. Niyə? Çünki Rusiyanın əli ilə ərazilərimiz işğal olundu və bu 30 il çəkdi. Ona görə də Rusiya qıcıqlanar deyə, biz hansısa ciddi hərbi layihələrdən geri çəkilən deyilik. Azərbaycan müstəqil, suveren dövlətdir. O üzdən, kimsə bizə nəyisə diqtə edə bilməz. Belə şeylər nəyisə dəyişmir. Azərbaycan hərbi gücünü bütün mənalarda artırdıqca, Ermənistandakı revanşizmə bu güclü zərbə olacaq. Bu bir reallıqdır. Ancaq biz nəzərə almalıyıq ki, oradakı revanşizmdən qat-qat üst mövqedə dayanan qüvvələr var. Bu, Fransa, Rusiya və digər dövlətlərdir ki, Ermənistana dəstək verirlər. Bütün bunlar həm də onların revanşist istəklərinin uzantısıdır. İrəvanda gördüklərimiz, Vardanyanın timsalında deyilənlər revanşist qüvvələrin uzantısıdır. Ancaq Fransa nə etsə belə, Azərbaycanı çəkindirə bilməyəcək. Ona görə ki, Azərbaycan güclü olmaqla yanaşı, Türkiyə kimi müttəfiqi var. Bir sözlə, Azərbaycan kiməsə fikir vermədən öz hərbi sənayesini inkişaf etdirir. Kimsə bizi öz yolumuzdan çəkindirə bilməz. Zamanla Azərbaycan dünyanın ən qüdrətli dövləti olacaq. Bunu hamı bilməlidir. Rusiya, Fransa və digər dövlərlər bu reallıqla barışmalıdılar”.
Vidadi ORDAHALLI
