“Milli müdafiə” jurnalının baş redaktoru, tanınmış rusiyalı hərbi ekspert İqor Korotçenko qeyd edib ki, bugündən etibarən beynəlxalq erməni diasporları Qərb mətbuatında mövcud mövqelərdən, habelə rüşvətxor siyasətçilərdən istifadə edərək, Bakını Qarabağ ermənilərini “blokada” və “soyqırım”da ittiham edərək, Azərbaycana qarşı genişmiqyaslı böhtan kampaniyası başlatmaq niyyətindədirlər:
“Ekspertlərin hesablamalarına görə, ilk mərhələdə planlaşdırılan antiazərbaycan informasiya kampaniyasının büdcəsi 50 milyon dollar təşkil edəcək”.
Azərbaycanın bu cür böhtançı kampaniyaya qarşı mübarizə aparmaq üçün gücü yetərlidirmi? Bunun üçün hansı resurslardan və necə istifadə edilməlidir?
Media məsələləri üzrə ekspert, əməkdar jurnalist Azər Həsrət “Bakı-Xəbər”ə bildirdi ki, ermənilərin bu kampaniyaları ilk deyil, son da deyil: “Onlar bütün mövcudluqları dövründə Azərbaycana qarşı, ümumiyyətlə türk millətinə qarşı kampaniya aparıblar və aparmağa da davam edəcəklər. Əlbəttə yeni bir hücuma başlamaq anonsunun verilməsi də bu qəbildəndir. Yəni onlar görürlər ki, bir aya yaxın davam edən etiraz aksiyası ermənilərin vay şüvənliyinə baxmayaraq, onlar üçün xeyirli bir nəticəyə səbəb olmur. Onlar gözləyirdilər ki, Laçın yolunda azərbaycanlı ictimai fəalların başlatdığı aksiya nəticəsində dünyaya səs salıb növbəti dəfə soyqırıma uğradıqlarını elan edəcəklər və bununla da Fransa daxil olmaqla bir çox dövlətlər ayağa qalxıb onların arxasında dayanacaq. Hətta Amerika Birləşmiş Ştatlarından, Rusiyanın özündən dövlət səviyyəsində dəstək gözləyirdilər. Amma bu baş vermədi. Niyə baş vermədi? Ona görə baş vermədi ki, Azərbaycan tərəfi, etiraz aksiyasını keçirənlər bu işi ağılla, savadla, təmkinlə həyata keçirir. Yəni onlar lazımsız addımlara getmirlər, humanitar yüklərin keçməsinə şərait yaradırlar, dinc insanlara qarşı hansısa aqresiv ritorikaya yol vermirlər, hətta orda iştirak edərək Xankəndidə olan erməni vətəndaşlarına da sülhməramlı çağırışlar edirlər. Bütün bunlar da erməni təbliğatının qarşısını alır. Lakin biz buna arxayınlaşmamalıyıq. Əlbəttə ki, onların planlı, böyük pullar hesabına yeni hücumları olacaq. Ona görə də, Azərbaycan tərəfi də fəallığı artırmalıdır”.
Azər Həsrətin sözlərinə görə, bizim xarici işlər nazirliyi sisteminin üzərinə böyük yük düşür: “Səfirliklərimiz vasitəsi ilə dünyanın aparıcı dövlətlərini baş verənlərlə bağlı mütamadi məlumatlandırmaq, məsələnin mahiyyətini izah etməyə ehtiyac var. Digər tərəfdən Azərbaycan Milli Məclisin hər bir deputanının döyüş sahəsindəki bir əsgər kimi fəallığına ehtiyac var. Bilirsiz ki, parlamentdə müxtəlif ölkələrlə dostluq qrupları mövcuddur və yaxud müxtəlif beynəlxalq qruplarda parlament üzvləri iştirak edir. Bunların hamısının bu məsələ ilə bağlı fəallıqlarını artırmağa ehtiyac var. Yəni deputatlarımız əlləri çatan, sözləri keçən, əlaqədə olduqları hər kəsə Laçın yolundakı etiraz aksiyası ilə bağlı gerçəkləri mütəmadi şəkildə çatdırmalıdır. Və şəxsi əlaqələrdən istifadə edərək, bu məsələlərin əsl mahiyyətinin xarici ölkələrdə düzgün isıqlandırılmasına nail olmaq lazımdır. Həmçinin bizim vətəndaş cəmiyyəti fəallarımızın yenə də beynəlxalq əlaqələrindən istifadə etməsi, media təmsilçilərimizin əllərinin çatdığı xarici mediada məsələ ilə bağlı tanıtma işlərinin sürətləndirilməsi vacibdir. Yəni boş oturmaq olmaz. Sadəcə olaraq çox yerinə düşərdi ki, dövlətimiz də bu məqamda işi iş bilənə tapşırsın, bu işləri bacaran adamlara əlavə şərait yaratsın, onları önə çəksin ki, daha effektiv işlər görmək mümkün olsun. Edə bilməyəcəyimiz heç nə yoxdur. Demək olar ki, bu etiraz aksiyası dövründə biz görürük ki, Ermənistan xarici dövlətlərdən arzu etdiyi dəstəyi ala bilmir və ala bilməməsinin davam etməsi üçün biz fəallığımızı bir qədər də artırmalıyıq”.
Məhəmmədəli QƏRİBLİ
