Fransa ermənidən artıq erməni olmaqda davam edir. Makron hökumətinin həyata keçirdiyi birtərəfli və qərəzli, balanslaşdılmamış siyasət göz qabağındadır. Bilirik ki, bir neçə gün əvvəl Fransa prezidenti Azərbaycan Prezidentinə zəng vurub və söhbət zamanı İlham Əliyev Makronu qərəzsiz olmağa çağırıb.
Əlbəttə, Makron heç zaman bitərəf, qərəzsiz və tarazlaşdırılmış siyasət apara bilmədiyini yenə də ortaya qoyub. Biz bunu Fransa Senatının Azərbaycana qarşı sanksiyaları nəzərdə tutan bədnam qətnamə qəbul etməsində bir daha gördük.
Mətbuat xəbər verir ki, Senat Fransa Konstitusiyasının 34-1-ci maddəsini rəhbər tutaraq Azərbaycana qarşı sanksiya tətbiq edilməsinə dair qanun layihəsini müzakirəyə çıxarıb və qəbul edib. İclasda iştirak edən 296 nəfərdən 295-i layihənin lehinə, 1 nəfər əleyhinə səs verib.
Qətnamə layihəsində "Azərbaycanın Ermənistan ərazisindən və Laçın dəhlizindən çəkilməsi" tələb olunub. Layihə müəllifləri "Azərbaycan və onun tərəfdaşlarının Ermənistanın suverenliyi və ərazi bütövlüyünə hörmət etməsini, həmçinin bütün erməni hərbi əsirlərin qaytarılmasını" tələb edirlər.
"Azərbaycan hökumətindən 4 yanvar 1969-cu il tarixli hər növ Diskriminasiyanı Qadağan edən Konvensiyaya uyğun olaraq erməni əhalisinin, erməni dini və mədəni mirasının mühafizəsi üçün tədbir görmək" tələb edilir.
Bununla yanaşı, Fransa hökumətinə mövcud olmayan "Dağlıq Qarabağda humanitar büro açmaq" təklif edilir.
Təkliflər arsında olmayan "Dağlıq Qarabağ Respublikası"nın müstəqilliyinin tanınması da yer alır. Eyni zamanda, Fransa hökumətindən Qafqazda sülhün bərqərar olması üçün Azərbaycanla diplomatik prosesə başlamaq tələb olunur.
Ermənistan-Azərbaycan sərhədində beynəlxalq statuslu sülhməramlı qüvvələrin yerləşdirilməsi də təkliflər arasında var.
Xatırladaq ki, 2020-ci ildə də Fransa Senatı belə bir bədnam qətnamə qəbul edib, o zaman da səsvermədə iştirak edən deputatlardan 305 nəfər qətnamənin leyhinə, bir nəfər isə əleyhinə səs verib. 2 il bundan əvvəl də bir nəfər o qətnamənin əleyhinə səs verib, indi də. O bədnam sənəddə də mövcud olmayan "Dağlıq Qarabağın" "müstəqilliyinə" çağırış vardı, lakin o sənəd kağız üzərində qaldı, icra olunmadı.
“Fransa Senatının bu bədnam qətnaməsi də 2020-ci ildə qəbul olunan üzdəniraq sənəd kimi kağız üzərində qalacaq”
AVCİYA-nın vitse-prezidenti, siyasi şərhçi, professor Məhərrəm Zülfüqarlı “Bakı-Xəbər”ə şərhində bildirdi ki, Fransa Senatının bu bədnam qətnaməsi bu ölkənin yürütdüyü çirkin siyasətin təzahürlərindən biridir. Uzun illərdir ki, Azərbaycana qarşı ayrıseçkilik siyasəti yürüdüən Fransanın hər addımda Ermənistanı, erməniləri dəstəkləməsinin sirr olmadığını deyən M.Zülfüqarlının bildirdiyinə görə, bu ölkənin davranışı təəccüblə qarşılanmamalıdır: “Fransa Senatının qəbul etdiyi məlum bədman qətnamənin məqsədi bəllidir. Fransa bununla separatimizi, terroru dəstəklədiyini bir daha biruzə verir. 44 günlük müharibədə Fransanın tutduğu mövqe də məlumdur. Fransa heç zaman qərəzsiz, bitərəf ola bilmədiyini ortaya qoymaqla özünü ifşa edib”.
M.Zülfüqarlının qeyd etdiyinə görə, tarixə nəzər salsaq görərik ki, Fransa türk dünyasına, Azərbaycana və qardaş Türkiyəyə qarşı düşmən mövqeyi tutub, o hansısa məsələdə nə bizi dəstəkləyib, nə də müdafiə edib, belə bir fakt yoxdur. M.Zülfüqarlı bildirdi ki, Osmanlı-Fransa münasibətləri tarixən Fransanın düşmənçiliyi üzərində qurulub, Osmanlı ərazisində separatçılığı inkişaf etdirmək üçün addımlar atan, o dövrdə bu ərazidə erməni separatizminin güclənməsini dəstəkləyən Fransa olub, bu imperiyanın süqutundan sonra Atatürkün başlatdığı milli azadlıq hərəkatına qarşı Fransa düşmən mövqedən çıxış edib. M.Zülqarlı hesab edir ki, o zaman güc qarşısında Fransa Türkiyənin varlığını qəbul edib, Azərbaycan da dövlət müstəqiliyini bərpa edəndən sonra ATƏT-in Minsk qrupunun üzvü olan Fransa həmişə Azərbaycan əleyhinə çıxış edib. “44 günlük müharibəyə qədər problemin həll olunmamasının günahı Minsk qrupunun üzərinə düşür və əsas günahkar da Rusiya və Fransadır. 44 günlük müharibədə də BMT-də Azərbaycan əleyhinə qətnamənin qəbul olunmasını istəyənlərdən birinci də elə Fransa idi. Azərbaycanı dəstəkləyən dövlətlərin, xüsusən də Qoşulmama Hərəkatına üzv ölkələrin, eləcə də Böyük Britaniyanın Azərbaycanın mövqeyinə dəstək verməsi nəticəsində bu qətnamə qəbul edilmədi. Fransa nə istəyir? Tarixdə yəhudilərə qarşı törədilmiş soyqırım məsələsi gündəmdə olduğu bir vaxtda Fransa da qondarma “erməni soyqırımı” yalanını dəfələrlə gündəmə gətirib. Hətta Fransa “erməni soyqırımının” tanınması və Türkiyənin təzminat ödəməsini daim dəstəkləyən dövlətdir. Biz unutmamalıyıq ki, bir sıra dövlətlər sırf ermənipəstdir və Azəbaycanla Türkiyə əleyhinə siyasət yeridir. Bunların da başında Fransa, Yunanıstan və bir sıra digər ölkələr dayanır.
Fransa Senatının bu bədnam qətnaməsi də 2020-ci ildə qəbul olunan üzdəniraq sənəd kimi kağız üzərində qalacaq. Çünki Fransa söz sahibi deyil, onu hətta NATO-da öz müttəfiqləri qəbul etmir. Yada salaq ki, ABŞ-ın və Böyük Britaniyanın birbaşa təsiri ilə Avstraliya Fransa ilə olan müqavillərini dayandırdı və Fransanı milyonlarla dollar ziyana saldı. NATO-nun daxilində güc mərkəzi kimi ABŞ-ı və İngiltərəni görməliyik. Fransanın daxilində baş verən “sarı jiletlilər” hərəkatı da onu göstərdi ki, Avropada Fransa hakimiyyətini, siyasətini dəstəkləməyən çoxlu qüvvələr var. Ona görə də bu cür qətnamələrdən narahat olmağa dəyməz. Bunlar kağız üzərində qalan qətnamələr olacaq. Erməni lobbisinin əl buyruqçusu olan Fransa Senatı bu cür qətnamələrlə öz ölkəsini nüfuzdan salır. Azərbaycan Prezidentinin tarixə istinadən Əlcəzair məsələsini Ərəb dövlətləri Liqasısının sessiyasında qabartması bir daha onu göstərir ki, Fransanın ərəb ölkələrində törətdiyi soyqırım cinayətləri onun nüfuzuna ziyan vura bilər”.
M.Zülfüqarlının fikrincə, Azərbaycan bundan sonra daha güclü olmağa, öz ordusunu gücləndirməyə, qardaş Türkiyə ilə əlaqələrini, müttəfqiliyini daha daha da gücləndirməyə çalışmalıdır, iqtisadiyyatını gücləndirməlidir. M.Zülfüqarlı hesab edir ki, belə olarsa, ermənipərəst dövlətlərinin heç biri Azərbaycana mane ola, öz mövqeyindən çəkindirə bilməz.
İradə SARIYEVA
