Dağıstanda soydaşlarımızın qeyri-müəyyən günləri davam edir
.jpg?v=1520254601)
.jpg)
Belə bir vaxtda məlum olub ki, Dərbənd administrasiyasının eyniadlı rayonunun, yəni Dərbənd rayon bələdiyyəsi rəhbərinin səlahiyyətlərini icra edən Yəhya Hacıyev vəzifədən gedib. Məlumatlara görə, o, kollektivi yığıbaraq, onlara birgə işə görə təşəkkür edib və səbəbini izah etmədən bildirib ki, tutduğu vəzifədən gedir. O da vurğulanır ki, Dağıstanın ən nüfuzlu azərbaycanlılarından biri olan Yəhya Hacıyev ötən ilin noyabrında Dərbənd rayonunun rəhbəri Qurban Qurbanovun vəzifədən uzaqlaşdırılmasından və barəsində cinayət işi qaldırılmasından sonra onun səlahiyyətlərini icra etməyə başlamışdı. Məlumata görə, Yəhya Hacıyevin səlahiyyətlərini onun birinci müavini Əli Xasbulatov icra edəcək. Yəhya Hacıyev Dərbənd rayonu başçısının səlahiyyətlərini icra edənə qədər kənd təsərrüfatı kooperativinə rəhbərlik edib. Onun vəzifədən getməsinin səbəbləri açıqlanmır. Lakin bunun yuxarılardan edilən təzyiqlər nəticəsində baş verdiyi daxil olan məlumatlar sırasındadır. Onun istefasından öncə hüquq-mühafizə orqanları Dərbənd rayon administrasiyasının binasında axtarış aparıb və administrasiyanın torpaq və əmlak məsələləri İdarəsinin rəhbəri Kamil Seyidovu dindirib. K.Seyidov Q.Qurbanova yaxın fiqurlardan biridir. Məlumata görə, Kamil Seyidov Dərbəndin keçmiş meri Qurban Qurbanovun vəzifədən uzaqlaşdırılmasından sonra faktiki olaraq işlərdən kənarlaşdırılmışdı və bütün məsələləri mer İmam Yarəliyevin yaxın qohumu həll edirdi.
Xatırladaq ki, uzun illərdir Dərbənd meri olan Qurban Qurbanov ötən il vəzifəsindən uzaqlaşdırılıb, daha sonra həbs edilib və bir müddət sonra ev dustaqlığına buraxılıb. Qurbanovun vəzifədən uzaqlaşdırılmasından sonra Dərbənddə gərginlik hökm sürür. Yuxarıda qeyd olunduğu kimi, K.Seyidov da Q.Qurbanova yaxın adam hesab edilir. Onun istintaqa cəlb edilməsi azərbaycanlıların dövlət vəzifələrindən təmizlənməsi kampaniyasının bir hissəsi hesab olunur.
Onu da bildirək ki, Ramzan Abdulatipovun burada rəhbərliyə gəlməsindən sonra o və kadrlarının həyata keçirdiyi siyasət soydaşlarımızın getdikcə daha böyük narazılığına səbəb olur. Son günlərdə isə Dərbənddə Nizami Gəncəvinin heykəlinin yandırılması, Sovet İttifaqı Qəhrəmanı Şəmsulla Əliyevin heykəlinin sındırılması, tanınmış din xadimi Seyid Mir Qafar ağanın qəbrinin təhqir edilməsi soydaşlarımızın genişmiqyaslı aksiyalar keçirməsinə səbəb olub. Dərbənd şəhərində yaşayan azərbaycanlılar mitinq keçirib. Onlar Dərbənd şəhər meri İmam Yaraliyevin istefasını, Dərbənddə sosial problemlərin həll edilməsini tələb edib. Baş verənlərə görə soydaşlarımız şəhərin meri Yaraliyevi suçlayıblar. Mitinq iştirakçılarından birinin sözlərinə görə, Dərbənd şəhər rəhbərliyi ildən-ilə üst-üstə yığılıb qalan sosial problemləri həll etmək istəmir. Bütün bunlardan sonra İmam Yarəliyev vəzifəsindən gedib, lakin artıq o, şəhərə yeni statusda-xalq deputatları sovetinin rəhbəri kimi rəhbərlik etməyə başlayıb. Xatırladaq ki, İ.Yarəliyev 2014-cü ildən Dərbənd şəhərinin meridir və indi yeni statusda rəhbər vəzifəni icra edir. Dərbənd rayonunun meri isə seçki yolu ilə seçilmiş əslən azərbaycanlı Qurban Qurbanov idi. Rəhbərlik müddətinin 2015-ci ilin ortalarında başa çatmasına baxmayaraq, Dağıstan prezidenti Ramzan Abdulatipov 2014-cü ildə Q.Qurbanovu vəzifədən kənarlaşdırıb. Abdulatipov bu addımı ilə azərbaycanlıların mövqeyini zəiflətmək, Dərbənd rayonunun təbii resurslarını qeyri-azərbaycanlılara paylamaq kimi niyyətini həyata keçirmək istəyir. Qurban Qurbanovun vəzifəsindən çıxarılması haqda qərarı Mahaçqalanın Sovetsk rayon məhkəməsi qəbul edib. Məhkəmə qarşısında Qurbanovun vəzifədən azad edilməsi barədə vəsatəti Rusiya İstintaq Komitəsinin Şimali Qafqaz regionu üzrə idarəsi qaldırmışdı. Q.Qurbanov hazırda ev dustağıdır və onun barəsində cinayət işinin araşdırması gedir. Ona yaxın şəxslərin də sıradan çıxarılması isə soydaşlarımıza qarşı kampaniyanın hələ səngiməyəcəyini deməyə əsas verir.