Bildiyimiz kimi, Kollektiv Təhlükəsizlik Müqaviləsi Təşkilatının (KTMT) missiyası Ermənistan sərhədində monitorinq həyata keçirib. KTMT missiyasının qrupu Ermənistan-Azərbaycan sərhədində gərginliyin azaldılması üçün təkliflər hazırlayıb. Bu barədə KTMT-nin Birgə Qərargahının mətbuat xidməti məlumat yayıb.
Qeyd edilir ki, bu gün Ermənistanın Müdafiə Nazirliyində KTMT-nin bu ölkədəki missiyası qrupunun işinin yekunlarına dair iclas keçirilib. Qrupa rəhbərlik edən general-polkovnik Anatoli Sidorov Ermənistanla Azərbaycan arasında sərhəddə müəyyən ərazilərdə vəziyyətin təhlilinin nəticələri, əsas nəticələr və müvafiq tədbirlərə dair təkliflər haqqında Ermənistanın müdafiə nazirinə məlumat verib.
Bildirilir ki, konstruktiv fikir mübadiləsi aparılıb. Hazırlanan təkliflər yaranmış gərginliyin azaldılmasına yönəlib.
Məlumata görə, Müdafiə Nazirliyində keçirilən görüşdən sonra KTMT missiyasının qrupu Moskvaya yola düşüb.
Onu da bildirək ki, səfər öncəsi verilən məlumatlarda qeyd edilirdi ki, səfərin yekunlarına əsasən KTMT missiyası təşkilata üzv ölkələrin dövlət başçılarının rəhbərlərinə hesabat təqdim edəcək.
Bilindiyi kimi,12-13 sentyabr tarixlərində Ermənistanın sərhəddə törətdiyi təxribatdan sonra sərhəddə monitorinq aparılması üçün KTMT-nin missiyası İravana gəldi, sərhəddə monitorinq apardı
Yayılan məlumatlara görə, monitorinqin nəticələri ilə bağlı KTMT missiyanın hesabat hazırlayıb və hesabat İrəvanda müzakirə də edilib. Amma maraqlıdır ki, hesabatın mətni açıqlanmayıb, monitorinq qrupunun hansı qənaətə gəldiyi barədə məlumat verilmir.
KTMT-nin missiyası sərhəddə apardığı monitorinqin nəticələri ilə bağlı nə qənaətə gəldi? Vəziyyətin gərginliyini azaltmaq üçün hansı tədbirləri göriblər?
Belə yazırlar ki, tədbirlər barədə KTMT hesabat hazırlayıb. Bizim üçün maraqlıdır ki, orada nədən bəhs edilib?
Bu məsələnin bizə də aidiyyatı var. Bu baxımdan, monitorinqin nəticələri Azərbaycan üçün də açıqlanmalıdır, yoxsa yox?
“...Tətbiq mexanizmi yekdil qərara əsaslanmalıdır ki...”
Siyasi ekspert Aqşin Kərimov “Bakı-Xəbər”ə şərhində bildirdi ki, KTMT-nin Azərbaycan-Ermənistan sərhədinin Şərqi Zəngəzur zolağına qoşun göndərəcəyi inandırıcı gəlmir.
Bu fikri ən azından iki səbəb gücləndirir:
“1. KTMT-nin tətbiq mexanizmi yekdil qərara əsaslanmalıdır ki, qurumdakı Belarus və Qazaxıstan Azərbaycan əleyhinə fəaliyyətdən qaçırlar. Tacikistan və Qırğızıstanın isə özünün sərhəd münaqişəsi var və onlara əlavə risklər lazım deyil.
2. Rusiya özü Azərbaycanın keçirdiyi hərbi əməliyyatları dəstəkləyən mövqedə dayanır, deməli, KTMT-nin “hökmdarı” da sərhədə kollektiv qoşun göndərmək niyyətində deyil.
Üstəgəl, Rusiya Ukraynada apardığı müharibənin ortaya çıxardığı itkilərini kompensasiya etmək üçün kanallar axtarır və indiki şəraitdə Ermənistana resurs sərf etmək ona faydalı deyil.
Hərçənd ki, Rusiya qoşunlarının Ermənistana dislokasiya edilmiş bölmələri var və onlar 102-ci bazanın tabeliyindən xidmət keçirlər.
KTMT-nin hesabatı Azərbaycanın əleyhinə çevrilməyəcək. Rusiya təkbaşına sərhəddə təhlükəsizliyin Ermənistan tərəfdən hərbçilərini Azərbaycanla sərhədə yönləndirə bilər ki, bu da normaldır”.
A.Kərimovun sözlərinə görə, nəzərə alaq ki, 2021-ci ildə də 102-ci bazanın hərbi qulluqçularının bir qismi sərhədə dislokasiya edilmişdi və sərhəd motivləri Azərbaycanın xeyrinə inkişaf etdi: “ Əldə olunan nəticə isə Azərbaycana ərazi nailiyyətləri qazandırdı”.
Qeyd edək ki, bəzi erməni mənbələri KTMT-nin, yaxud da Rusiyanın sərhəddə qoşun yeridəcəyi barədə fikirlər irəli sürürlər.
İradə SARIYEVA
