Polşa Rusiyanın hücumlarından sonra Ukrayna ilə sərhəd keçid məntəqələrinin təhlükəsizliyini gücləndirmək üçün sərhədə qoşun yerləşdirib, Baş nazirin müavini və milli müdafiə naziri Vladislav Kosiniak-Kamış bildirib ki, son günlər Rusiyanın hərəkətləri bütün Avropanın təhlükəsizliyini təhdid edir, buna görə də qoşunlar Sərhəd Mühafizəsinə kömək etmək üçün göndərilib.
Nazir həmçinin qeyd edib ki, 18-ci Mühəndis Alayının əsgərləri Polşa-Ukrayna sərhədi boyunca nəzarət məntəqələrini və infrastrukturu gücləndirmək üçün tapşırıqlar yerinə yetirirlər.
Polşa Baş naziri Donald Tusk isə sərhəd keçid məntəqələrinin yaxın aylarda "xüsusi rejimdə" fəaliyyət göstərəcəyini açıqlayıb. Podkarpatski əyalətinin qubernatoru Tereza Kubas-Hul, nəzarət məntəqəsinin təhlükəsizliyini təmin etmək üçün böhran qrupu yaradacağını açıqlayıb. Onun sözlərinə görə, digər məsələlərlə yanaşı, infrastrukturun təcili vəziyyətdə insanları tez bir zamanda təxliyə etmək qabiliyyəti yoxlanılacaq.
Bu arada, Sərhəd Mühafizəsinin Nadbuzan şöbəsinin komendantı general Yaçek Şonçor, nəzarət məntəqəsi işçilərinə dəbilqə və zirehli geyimlərin verilməsini və sığınacaq yerlərinin müəyyən edilməsini əmr edib.
Qeyd edək ki, 13 sentyabrda Rusiyanın Ukraynaya hücumu zamanı bir dron Polşa sərhədindən 1 km, ikincisi isə 5 km aralıda qəzaya uğrayıb. Üçüncü dron isə Volın bölgəsindəki Yaqodin stansiyasında Kiyev-Varşava qatarını hədəf alıb. Sərnişinlər planlaşdırılan gəlişlərindən 15 dəqiqə əvvəl təxliyə edilib və heç kim xəsarət almayıb.
Ukrayna bildirib ki, dronun hədəfi stansiyadan vaxtından əvvəl yola düşən diplomatik qatarı ola bilərdi. Qatarın sərnişinləri arasında Britaniyanın keçmiş Baş naziri Boris Conson və Almaniya kanslerinin xarici siyasət və təhlükəsizlik üzrə müşaviri Günter Sautter də var olub. O vaxt stansiyada olan başqa bir qatarda Mərkəzi Kəşfiyyat İdarəsinin keçmiş direktoru Devid Petreus da var olub. Hücum zamanı Polşa hərbçiləri qırıcı təyyarələri havaya qaldırıblar.
Tusk, Rusiyadan qarşıdakı həftə və aylarda intensiv hərbi əməliyyatlar gözlənildiyini və bunun Polşa ərazisinə potensial təsir göstərəcəyini bildirib. O, Polşa və onun NATO müttəfiqlərinin "lazım gələrsə, birgə cavab verməyə hazır olmalı olduqlarını" vurğulayıb.
Daha əvvəl Polşa ölkənin şərq hissəsində hava məkanını 9 dekabra qədər məhdudlaşdırmışdı və bu zonada gecə uçuşları tamamilə qadağan edilmişdi. Bu qərar Ukraynadakı müharibə fonunda hava hücumundan müdafiə sisteminin effektivliyini təmin etmək üçün qəbul edilib. Yay aylarında Polşa Rusiya hava qüvvələrinin fəaliyyəti səbəbindən qırıcı təyyarələrini bir neçə dəfə havaya qaldırıb.
Son aylarda Avropada Rusiyanın Litva, Latviya və ya Estoniya kimi NATO-nun şərq cinah ölkələrindən birinə hücum edə biləcəyi ilə bağlı narahatlıqlar artmaqdadır. Putinin köməkçisi Patruşev Polşanı Rusiya ilə müharibəyə girməmək barədə xəbərdar edərək, əks halda "Polşa dövlətçiliyinin iki-üç gün ərzində mövcudluğuna son qoyacağını" vurğulayıb.
Rusiya XİN rəhbəri Lavrov isə Leypsiq hava limanında partlayıcı maddələr daşıyan bir neçə dron aşkar edildiyi iddialarından sonra bunun "Almaniya ilə əsl müharibənin başlanğıcı" olduğunu deyib.
Lavrov son açıqlamasında isəbildirib ki, birbaşa müharibə başlayarsa, Rusiya Avropaya dərhal cavab verəcək. O, Moskvanın belə bir aqressiv planının olmadığını əminliklə bildirib, lakin qeyd edib ki, "Rusiyaya qarşı müharibəyə hazırlıq barədə hər gün danışan Avropa hücum edərsə, bu, tamamilə fərqli bir müharibə olacaq və çox qısa olacaq". Lavrov ümid etdiyini bildirib ki, bu xəbərdarlığa "Avropa paytaxtlarında" və vahid Avropanı "təmsil etməyə çalışan" qurumlar tərəfindən diqqət yetiriləcək.
Lavrov həmçinin bildirib ki, Aİ ölkələri "ciddi dialoqu" bərpa etmək istədikdə, Rusiya "onların nə düşündüklərini, nə təklif etdiklərini" dinləyəcək və sonra bununla razı olub-olmadığına qərar verəcək: "Sizi yalnız bir şeyə əmin edə bilərəm: milli təhlükəsizliyin asılı olduğu ərazilərdə avropalılarla heç bir müqavilə və ya razılaşma bağlamayacağıq və bağlamaq niyyətində də deyilik".
Daha əvvəl Rusiya prezidenti Vladimir Putin Avropa ölkələrinə hücum etmək planlarının olmadığını, lakin Ukraynaya qoşun göndərəcəkləri halında müharibənin qaçılmaz olacağını deyib.
Tahir TAĞIYEV
