Məhəmməd Əsədullazadə: “Azərbaycanın 2023-cü ildə öz suverenliyini bərpa etməsi Qərb dairələrini çox ciddi narahat edir”
Prezident İlham Əliyev sentyabrın 15-də Türk Dövlətləri Təşkilatının Baş katibi Kubanıçbek Ömüralıyevi, Türk Dövlətləri Təşkilatının müsəlman dini idarə rəhbərləri Şurasının üzvlərini və müşahidəçilərini, Yəhya Bakuvi beynəlxalq Konfransının həmtəşkilatçıları və Qafqaz Xalqları Ali Dini Şurasının üzvlərindən ibarət nümayəndə heyətini qəbul edərkən bildirib ki, Ermənistanı dəstəkləyən böyük sayılan dövlətlər isə məsələni həll etmək yox, uzatmaq və bu işğalı əbədi etmək istəyirdi. Prezident bildirib ki, bu dövlətlər Ermənistana hərbi, iqtisadi, siyasi dəstək verərək faktiki olaraq işğalçını mükafatlandırıldı.
“Dünya 30 il ərzində buna göz yumub. Ermənistanın arxasında duran böyük dövlətlər, o cümlədən və ilk növbədə, mənfur Minsk qrupunun həmsədr ölkələri bütün bu işləri ört-basdır etmək istəyirdi. Ermənistan işğal edilmiş torpaqlara heç bir xarici müşahidəçi buraxmırdı. Ancaq Qərbdən və digər ölkələrdən olan pulla alınmış bəzi siyasətçiləri, ictimai xadimləri gətirirdilər ora göstərsinlər ki, onlar burada necə yaşayırlar. Amma beynəlxalq təşkilatlar buna səssiz qalıb. Birləşmiş Millətlər Təşkilatı, - hansı ki, Təhlükəsizlik Şurası dörd qətnamə qəbul etmişdi ki, işğal edilmiş torpaqlardan erməni silahlı qüvvələri çıxarılmalıdır, - səssiz qalıb, ATƏT səssiz qalıb. Avropa Şurası faktiki olaraq işğalı dəstəkləyib. Avropa Parlamenti işğalçı Ermənistana hər zaman dəstək verib və bu gün də bu belədir. Yəni bax bu, bizə olan münasibətin kiçik bir təsviridir. Görün, biz kimlərlə üzbəüz qalmışdıq, yəni Ermənistan təkbaşına deyildi. Ermənistan təkbaşına olsaydı, bu məsələ çoxdan həll olunardı. Yaxud da ki, o vaxt bu işğala, bu vəhşiliyə, bu soyqırımına görə Ermənistana beynəlxalq sanksiyalar tətbiq edilsəydi, məsələ çoxdan həll olunardı. Eləmədilər, bilərəkdən, qəsdən. İndi yeri gəldi-gəlmədi, hər yerə sanksiyalar qoyulur. Amma yaxşı, Ermənistan burada başqa dövlətin 20 faiz torpağını zəbt edib, 700 min insanı oradan qovub, 250 min insanı - azərbaycanlıları Ermənistandan qovub, dağıdıb hər şeyi, bütün şəhərləri. Sən niyə ona sanksiya tətbiq etmirsən? Bu, deməli, ikili standartlardır. Haradan gəlir bu ikili standartlar, aydın məsələdir. Hər halda İslam aləmindən gəlmir. Ona görə bax, biz hamımız bunu bilməliyik.
Avropa Şurasında Ermənistana qarşı sanksiya tətbiq edilmədi. Amma biz ki, 2023-cü ilin sentyabrında Qarabağı tam azad etdik, separatçılığın kökünü kəsdik və separatçıları həbs etdik, deməli, ondan dörd ay sonra Avropa Şurası bizə qarşı sanksiya tətbiq etdi. Bax, onların əsl siması budur. Avropa Parlamenti rüşvətxorlar yuvasıdır. Bunu mən tam məsuliyyətlə deyirəm - rüşvətxorlar yuvasıdır Avropa Parlamenti. Onun vitse-prezidentinin evindən çamadanlarla dolu milyonlarla dollar çıxdı, hamısını ört-basdır etdilər. Elə bil olmayıb bu. Onun adı bəllidir, o Yunanıstandan olan bir xanım deputatdır. Neçə il keçib onun üstündən? Bir ölçü götürülüb ona qarşı? Yox! Məsuliyyətə cəlb edilib? Yox! Sərbəst buraxılıb. Avropa Parlamenti bax, bu islamofoblardan ibarətdir və bu da daim diqqət mərkəzində olmalıdır”-deyə Azərbaycan Prezidenti bəyan edib.
Xarici qüvvələr, ikili standartlar, Ermənistanı dəstəkləyən dövlətlərin işğalı uzatmaq və əbədi etmək istəyi, BMT, ATƏT kimi təşkilatların səssizliyi, Avropa Şurası və Avropa Parlamentinin işğalı dəstəkləməsi, Avropa Parlamentinin Ermənistana hər zaman dəstək verməsi, Ermənistana qarşı sanksiyaların olmaması, 2023-cü ildə Qarabağ tam azad edildikdən cəmi 4 ay sonra Avropa Şurasının Azərbaycana qarşı sanksiya tətbiq etməsi kimi məsələlərə şərh verən poltoloq Məhəmməd Əsədullazadə baki-xeber.com-a bildirdi ki, Prezident İlham Əliyev bu görüşdə çox ciddi məsələlərə toxundu. “Prezidentin Qərb ölkələrində islamafobiya ilə bağlı dedikləri, islam həmrəyliyi istiqamətində mesajları yeni dünyanın siyasi problemləridir. Bununla əlaqədar dünyada böhranlar yaranır. Təbii ki, cənab Prezident bununla ölkə daxilində islam həmrəyliyinə qarşı olanlara da bir mesaj verdi. Azərbaycanın tarixi şəxsiyyətləri, sərkərdələri haqda da danışdı, həmçinin də islam həmrəyliyini önə çəkdi.
Ölkə başçısı çox ciddi məsələlərə diqqət yetirdi, mesajlar verdi.
Eyni zamanda Qərbin uzun illərdir sərgilədiyi ikili standartları, Azərbaycan Ermənistan münaqişəsi dövründə Ermənistanın işğalı ilə bağlı ciddi tədbir görməməsi, Avropa Şurasında separatçıları müdafiə edən anti-Azərbaycan qətnamələri qəbul edilməsi, ölkəmizə qarşı sanksiya tətbiq edilməsi kimi çağrışları müşahidə edirik. Görünür ki, xarici qüvvələr, Qərb təşkilatları ikili standarlardan çıxış edərək Ermənistanı dəstəkləyib. BMT, ATƏT kimi təşkilatların tədbir görməməməsi, səssiz qalması, Avropa Parlamentinin işağlı dəstəkləməsi faktdır. Konkret olaraq Azərbaycanın 2023-cü ildə öz suverenliyini bərpa etməsi Qərb dairələrini çox ciddi narahat edir. Bunu həzm edə bilməyən Qərb dairələri ölkəmizə qarşı açıq düşmənçilik mövqeyi göstərirlər”.
M.Əsədullazadənin sözlərinə görə, Prezident Əliyev bir daha milli maraqlardan irəli gələn siyasəti ortaya qoydu: “Prezident xarici qüvvələrə etimad etməmək, heç bir xarici mərkəzlə koordinasiyalı çalışmamaq, ciddi şəkildə Azərbaycanın milli maraqlarını qoruyacağıq və heç kimə boyun əyməyəcəyik mesajını da verdi. Hesab edirəm ki, bundan həm daxildəki bəzi qüvvələr, həm də xarici mərkəzlər nəticə çıxarmalıdır. Türk birliyini, islam həmrəyliyini, Azərbaycanın milli maraqlarını əsas ştrix kimi xarakterizə etmək olar”.
İradə SARIYEVA
