Azərbaycan mətbautı “Hraparak” qəzetinə istinadən yazır ki, bir qrup erməni deputat Qarabağın Azərbaycan ərazisi kimi tanınmasını təklif edib.
“Adıçəkilən deputatlar geri çəkilməyiblər və bu gün də deputat həmkarlarını inandırmağa davam edirlər ki, hazırda yeganə çıxış yolu budur…”
Bir qrup deputatın Qarabağın Azərbaycanın ərazisi kimi tanınması ilə bağlı təklif-tezisindən sonra Ermənistan parlamentinin “Vətəndaş müqaviləsi” fraksiyasında əsl dava başlayıb.
Qəzetin məlumatına görə, “Vətəndaş müqaviləsi”nin deputatları Marina Karapetyan, Sona Qazaryan, Lena Nazaryan və Arsen Torosyan sentyabrın 13-də səhər saatlarında Nikol Paşinyan parlamentə gəlməmişdən əvvəl qapalı fraksiya iclasında bildiriblər ki, Azərbaycanın ərazi bütövlüyünün tanınması ilə bağlı tələbinə baxılması və sərhəddə davam edən gərginliyə son qoyulması mümkündür.
“Yəni Qarabağı Azərbaycanın bir hissəsi kimi tanımaq və bununla da bu mövzunu həmişəlik bağlamaq… Bəyanat, xoşbəxtlikdən, birmənalı qəbul edilməyib. Amma mənbələrimizin bildirdiyinə görə, adıçəkilən deputatlar geri çəkilməyiblər və bu gün də deputat həmkarlarını inandırmağa davam edirlər ki, hazırda yeganə çıxış yolu budur”- deyə erməni qəzeti yazıb.
Sona Qazaryan isə “Joqovurd”a müsahibəsində belə bir təklifin olduğunu inkar etmədən bildirib: “Mən fraksiyanın qapalı iclasını şərh etmək fikrində deyiləm”.
“...Bəziləri reallıqları anlayır, Azərbaycanın ərazi bütövlüyünün tanınmasını vacib sayır”
Məsələyə şərh verən AMEA-nın Qafqazşünaslıq İnstitutunun Ermənişünaslıq şöbəsinin müdiri, professor Qasım Hacıyev “Bakı-Xəbər”ə bildirdi ki, Ermənistan parlamentində belə bir hadisənin baş verəcəyi gözlənilən idi. Q.Hacıyev deyir ki, Ermənistanda Azərbaycanın ərazi bütövlüyün tanınmasını, Qarabağ iddiasından əl çəkilməsini istəyən siyasilər də, deputatlar da az sayda da olsa olub, lakin onlar qorxudan səslərini çıxara bilməyiblər. Bəzi deputatların cəsarətli çıxış etməsinin səbəbinə gəlincə, Q.Hacıyev hesab edir ki, artıq obəzi ermənilər də başa düşür ki, Ermənistanın apardığı bu terrorçu, revanşizm siyasəti bu ölkənin özünə və vətəndaşlarına daha çox ziyan vurur. “Doğurudan da bu çox maraqlı və neçə ildir ki, gözlədiyimiz prosesdir. Çünki son illər daha çox eyforiyalarla, uydurmalarla yüklənən erməni ideoloqları, siyasətçiləri həm erməni, həm də Azərbaycan xalqına ziyan vuran çıxışlar edirdilər. Obyektiv danışmaq, obyektiv düşünmək sanki bunlar üçün ya qadağan idi, ya da özləri obyektiv olmaq istəmirdilər. Amma son dövrlərdə həm bəzi erməni tarixçilərinin, həm siyasətçilərin, həm də başqa sənət sahiblərinin obyektiv, ədalətli mövqe tutmağa cəhdlərini müşahidə etməkdəyik. Bəziləri artıq gerçəkliyi dilə gətirməyə cəsarət etməyə başlayıb. Əgər hansı xalq ki, öz xalqına, tarixinə hörmət qoyursa başqasının da tarixinə, torpağına, dövlətinə hörmət qoymalıdır.
Ermənistan parlamentinin bəzi deputatlarının qapalı iclasda belə bir təkliflə çıxış etməsi maraq doğurmaqla yanaşı həm də artıq onların reallığı dərk etməyə başladığı anlamına gəlir. Bu deputatların Qarabağın Azərbaycanın ərazisi kimi tanınması fikrini, ideyasını irəli sürməsi və buna rəsmən qərar verilməsini təklif etməsi onu göstərir ki, bəziləri reallıqları anlayır, Azərbaycanın ərazi bütövlüyünün tanınmasını vacib sayır. Əslində, bu gözlənilməz deyildi, gözlənilən idi. Təəssüflər olsun ki, ermənilər bu qərara gec gəlirlər. Ermənistanın əsassız ərazi iddialarına, miflərinə görə nə qədər insan həyatını itirdi, biz nə qədər şəhid verdik, şəhərlərimiz, kəndlərimiz, evlərimiz dağıldı, insanlarımız didərgin düşdü”.
Q. Hacıyevin sözlərinə görə, amma zamanında Qarabağı Azərbaycandan qoparmaq niyyəti ilə ermənilər revanşizmə, işğala başlamasaydılar nə bu qədər tələfat olardı, nə də hər iki ölkəyə ciddi ziyan dəyərdi. Baş verənlərin məsuliyyətini Ermənistanın daşıdığını qeyd edən Q. Hacıyev hesab edir ki, Ermənistanın cinayətləri hələ də bitib tükənmir. Q. Hacıyevin bildirdiyinə görə, əgər vaxtilə erməni lobbisinə də, Qarabağdakı ermənilərə də erməni baş bilənləri desəydilər ki, bura Azərbaycan torpağıdır, bizim deyil, Qarabağ Azərbaycan Respublikasının tərkibində olmalıdır, bu qədər qan tökülməzdi. “Amma bunu deyən olmadı, erməni rəhbərlər, siyasətçilər, din adamları insanları revanşizmə çağırdı. Bütün hallarda məsuliyyət ermənilərin üstündədir. Amma təəssüf ki, onlar hələ də məsuliyyətlərini hiss etmirlər. Ermənistan başa düşməlidir ki, Azərbaycanın ərazi bütövlüyünü tanımalıdırlar, sülh sazişi imzalanmalıdır. Amma görün o nə edir? Sərhəddə təxribat törədirlər. Azərbaycan ordusu da əks hücuma keçib bu ölkənin ordusunu darmadağın edib. Bu ölkənin ordusunun 80 faizi dağılıb, siyasəti zəifləyib, iqtisadiyyatı da çöküb. Bu vəziyyətdə artıq Azərbaycanın etdiyi təkliflərlə razılaşmalıdırlar. Son günlərdə sərhəd boyu erməni təxribatının qarşısını almaq üçün ordumuzun həyata keçirdiyi cavab əməliyyatı bir daha erməniləri ayıltdı ki, əgər siz obyektiv mövqedən çıxış etməsəniz, Azərbaycanln haqq işinin gedişinə mane olsanız onun cəzası daha ağır olacaq Gördüyünüz kimi, son təxribat zamanı Ermənistan etdiyinin cəzasını aldı. Bu da nəhayət ki, erməni xalqının, siyasətçilərinin, dövlət rəhbərlərinin ağlını başına gətirməlidir. Onları qızışdıran böyük dövlətlərini də, onlara dəstək olan erməni diasporunu da başa salmalıdır ki, burada əzilən də, məhv olan da bu iki xalqın övladlarıdır. Xaricdəki erməni lobbisi də, böyük dövlətlər də gedib öz evlərində otursunlar ki, proses sülhlə nəticələnsin, sülh müqaviləsi imzalansın. Qarabağın Azərbaycan torpaqları olduğunu hamısı bilir, bunu tam etiraf etsələr, Ermənistan birdəfəlik bu iddiadan əl çəksə nəticəsi yaxşı olar”.
Q.Hacıyev qeyd etdi ki, bu Ermənistanın özünün də inkişafına təkan olar. O, hesab edir ki, bütün hər şeyi nəzərə alıb Ermənistan belə qərar qəbul etməlidir ki, artıq onlar Qarabağa olan əsassız iddialarlndan tamamilə əl çəkirlər. “Parlamentdə səsləndirilən fikirlərə Ermənistan hökuməti ciddi yanaşmalıdır, çünki bu ölkənin xilası üçündür. Deputatların bu çağırışına bəzi erməni tarixçilərinin də, ziyalıların da qoşulması lazımdır ki, onlar hökuməti bu addımı atmağa məcbur edə bilsinlər ”-deyə Q.Hacıyev bildirdi.
İradə SARIYEVA
