Vejnəli qızıl yatağımızı on illərlə talan etmiş hər bir əcnəbi erməninin adı məlumdur - Baş Prokurorluğumuz nə edəcək...
“Vejnəli qızıl yatağının xarici vətəndaşlar tərəfindən, o cümlədən erməni əsilli xarici vətəndaşlar tərəfindən qanunsuz istismar edilməsi onlara baha başa gələcək. Biz o adamların adlarını bilirik. Biz onları dünya qarşısında ifşa edəcəyik və bizə təzminat ödəyəcəklər. Vurulmuş ziyanın təzminatını mütləq ödəyəcəklər”.
Bunu Prezident İlham Əliyev mayın 4-də Vahid Hacıyevi Prezidentin Şərqi Zəngəzur iqtisadi rayonuna daxil olan Zəngilan rayonunda xüsusi nümayəndəsi təyin olunması ilə əlaqədar videoformatda qəbul edərkən çıxışı zamanı deyib.
Ölkə başçısı daha sonra bildirib: “Ermənistan işğal dövründə işğal altında olan torpaqların ekologiyasına da böyük zərər vurmuşdur və mən həmin rəqəmləri səsləndirmişdim. Əlli-altmış min hektar meşə ilə örtülü sahə tamamilə məhv edilmişdir. Biz bunu peyk vasitəsilə müşahidə edirdik. Xüsusilə Kəlbəcər, Laçın, Zəngilan və Qubadlı rayonlarında meşələrin kütləvi surətdə qırılması prosesi gedirdi. Yəni, bu, faktiki olaraq vəhşilik və talançılıqdır. Ermənistanın işğal dövründə çirkin əməllərini təsvir etmək üçün, hesab edirəm ki, bu iki ifadə ön planda olmalıdır – vəhşilik və talançılıq. Zəngilanda da bu mənfur işlər görülmüşdür və bunun nəticəsində təbiətə çox böyük ziyan vurulmuşdur…”
Prezident eyni zamanda vurğulayıb ki, Ermənistan Zəngilandakı və digər rayonlardakı qızıl və digər qiymətli metallar yataqlarını da vəhşicəsinə istismar etmişdir: “…Zəngilanda Vejnəli qızıl yatağını vəhşicəsinə istismar etmişdir. Oranı da ekoloji fəlakət zonasına çevirmişdir və qanunsuz olaraq orada çıxarılan qızıl xaricə aparılıb satılmışdır.
Biz indi bütün hüquqi prosedurlara start vermişik. Mən bu haqda Azərbaycan ictimaiyyətini məlumatlandırmışdım. Bir cinayət də cavabsız qalmayacaq. Birincisi, biz dəymiş bütün ziyanı hesablayırıq, bütün şəhər və kəndlərimizin pasportlaşdırılması prosesi gedir. Hər bir binanın, yaxud da ki, o binadan qalan dağıntıların video-foto çəkilişi aparılır. Bu, sübutdur və biz beynəlxalq məhkəmələrə də müraciət etmək əzmindəyik, hazırlıq işləri gedir. Həmçinin Vejnəli qızıl yatağının xarici vətəndaşlar tərəfindən, o cümlədən erməni əsilli xarici vətəndaşlar tərəfindən qanunsuz istismar edilməsi onlara baha başa gələcək. Biz o adamların adlarını bilirik. Biz onları dünya qarşısında ifşa edəcəyik və bizə təzminat ödəyəcəklər. Vurulmuş ziyanın təzminatını mütləq ödəyəcəklər”.
Prezident qeyd etdi ki, Vejnəli qızıl yatağını on illərlə talan etmiş hər bir əcnəbinin, erməninin adı məlumdur. Bütün bu faktlar bəllidir, bu halda Baş prokurorluq nə edəcək? Yaxud nə etməlidir?
- “Baş Prokurorluq bu cinayətkar şəbəkənin üzvlərini beynəlxalq axtarışa verəcək, onların saxlanılıb Azərbaycana təhvil verilməsinə nail olacaq”
Siyasi ekspert Rövşən Rəsulov “Bakı-Xəbər”ə şərhində bildirdi ki, ölkə başçısı artıq Vejnəli qızıl yatağını talan edib xarici ölkələrə daşıyanların cinayətlərinin cavabsız qalmayacağını bildirib. O vurğuladı ki, Baş Prokurorluq da öz üzərinə düşən vəzifəyə görə hərəkət edib onlar barədə cinayət işi qaldırmalı və beynəlxalq hüquqa söykənərək həmin canilərin məsuliyyətə cəlb edilməsinə nail olmalıdır: “Bildiyimiz kimi torpaqlarımız işğalda olan dövrlərdə bizim yeraltı və yerüstü sərvətlərimiz, qızıl və digər qiymətli metal yataqlarımız qanunsuz istismara məruz qalıb. Ermənilər əcnəbilərlə birləşib yalnız Vejnəli qızıl yatağını talan etməyiblər, Kəlbəcərdəki qızıl yataqlarını da talayıblar. Bütün bu sərvətrlərimiz qanunsuz istismar edilərək xaricdəki erməni iş adamları tərəfindən xarici ölkələrə daşınıb və satılıb. Hətta bildiyimiz kimi, bahalı brend saatlar var ki, onların müəyyən hissələri məhv Azərbaycan qızılından istifadə edilərək düzəldilib. Bu saatlar çox baha qiymətə satılıb.
Bu gün cənab Prezidentin belə bir bəyanatla çıxış etməsi onu göstərir ki, Azərbaycan dövləti qətiyyətlə Vejnəli və digər qızıl yataqlarımızı talan edən bütün cinayətkarları ifşa edəcək. Əlbəttə ki, cinayətkarlar beynəlxalq hüquq müstəvisində beynəlxalq məhkəmələrdə dünyanın gözü qarşısında cəzalandırılacaq. Azərbaycanın Baş Prokurorluğu bütün müvafiq sənədləri toplayıb beynəlxalq məhkəmələrdə talançıların ifşa eidlməsinə, Azərbaycana təzminat ödəməsinə nail olacağına şübhə etmirəm. Onlar Azərbaycana bütün beynəlxalq qanunlar çərçivəsində təzminat ödənişini həyata keçirəcək. Eyni zamanda bu məsələnin aktuallaşdırılması belə deməyə əsas verir ki, erməni iş adamlarının, onlarla iş birliyində olan xarici şirkətlərin də reputasiyaları sıfıra enəcək”.
R.Rəsulovun sözlərinə görə, Azərbaycanın səyləri nəticəsində ermənilərlə birləşib Azərbaycanın qızıl yataqlarını talayanlar ciddi şirkətlər kimi deyil, talançı, oğru şirkətlər kimi damğalanacaq: “Azərbaycanın beynəlxalq müstəvidə başladacağı hüquqi prosedur nəticəsində qızıl yataqlarımızı qanunsuz olaraq istismar edən şəxslər, şirkətlər talançı, oğru kimi dünyada rəzil olacaqlar. Qeyd edim ki, bizim Baş Prokurorluq artıq bu istiqamətdə işlərə başlamaq üzrədir, hüquq prosedurları həyata keçirilir. Təbii ki, Baş Prokurorluq bu cinayətkar şəbəkənin üzvlərini beynəlxalq axtarışa verəcək, onların saxlanılıb Azərbaycana təhvil verilməsinə nail olacaq. Bu oğru və talançılar ilk növbədə Azərbaycan xalqı, Azərbaycan dövləti qarşısında cavab verməli olacaqlar, oğurladıqlarının pulunu təzminat şəkilində qəpiyinə qədər ödəyəcəklər. Heç də oğurladıqları onlarda qalmayacaq və təzminat ödəyəcəklər, bu da Azərbaycanın xeyrinə xərclənəcək” - deyə R.Rəsulov vuğuladı.
İradə SARIYEVA
