“Mənim Avropa İttifaqı Şurasının Prezidenti cənab Şarl Mişel ilə sonuncu söhbətimdə o mənə dedi ki, minatəmizləmə işlərinə 5 milyon avro ayrılacaq”. Bunu ADA Universitetində “Cənubi Qafqaz: İnkişaf və əməkdaşlıq” mövzusunda keçirilən beynəlxalq konfransda Prezident İlham Əliyev deyib.
Ölkə başçısının fikrincə, təklif olunan məbləğ çox aşağıdır: “Biz buna görə təşəkkür edirik. Lakin bu rəqəmin böyük təsiri olmayacaqdır. Bizim ciddi dəstəyə ehtiyacımız var. Bundan əlavə, mina problemi ilə məşğul olan beynəlxalq QHT-lərin dəstəyinə ehtiyac duyuruq. Onların hələ ki, heç biri Azərbaycana nəzər salmayıb. Biz bilirik ki, minaların təmizlənməsinə yardım edən bir sıra QHT və fondlar var. Bizə gəldikdə heç kəs yardım etmir”.
Bu arada Avropa İttifaqının Azərbaycandakı nümayəndəliyinin rəhbəri Peter Mixalko bəyan edib ki, hazırda Avroittifaq Azərbaycanda minaların təmizlənməsinə 1,5 milyon avro həcmində maliyyə dəstəyi verir. Daha sonra diplomat qeyd edib ki, gələcəkdə maliyyələşdirmə artırılacaq və ümumilikdə 2,5 milyon avro təşkil edəcək. Çox qəribədir belədə Ukraynaya pul əsirgəməyən Avroittifaq Azərbaycana gələndə qəpik-quruş ayırır. Minatəmizləmə kimi ağır, çox vaxt və maliyyə tələb edən prosesə normal vəsait ayırmağı əsirgəyir. Halbuki, Aİ-nin buna kifayət qədər maliyyə imkanı var.
“Minalanmış ərazilərin təmizlənməsi məsələsində qurumun ayırdığı vəsait simvolik xarakterlidir”
Məsələyə münasibət bildirən politoloq Tural İsmayılov Aİ-nin belə ədalətsiz yanaşmasına bir neçə prizmadan yanaşdı: “Avroittifaq ümumilikdə Cənubi Qafqaz regionuna yanaşmada bir sıra hallada ədalətsiz mövqedən çıxış edib. Bu günə qədər erməni lobbisinin təsiri altında Avropa İttifaqı tərəfindən Azərbaycan əleyhinə bir sıra bəyanatlar səslənib. Demokratiya, insan haqları və digər həssas mövzularda acınacaqlı vəziyyətdə olan Ermənistanı görməzdən gəliblər. Yeri gəldi-gəlmədi Ermənistandakı vəziyyət pozitiv qiymətləndirilib. Azərbaycana gəldikdə isə, fərqli mövqe sərgiləyiblər. 30 ilə yaxın işğal altında qalan yaşayış məntəqələrinin məhv edilməsinə, Xocalı soyqırımına görə Ermənistana hansısa təzyiq edilməyib. O cümlədən, 44 günlük Vətən müharibəsindən sonra Aİ-nin moderatorluğu altında Ağdamın mina xəritələri veriləndə qurum mövqe ortaya qoymadı. Söhbət ondan gedir ki, xəritələrin çoxu saxta idi. Ancaq Aİ-dən bununla bağlı Ermənistana yönəlik hansısa tənqid və ya qınaq səslənmədi. Bütün bunlar bir daha Aİ-nin Azərbaycana yanaşmasında nə qədər ədalətsiz olduğunu göstərir. Bu ədalətsizlik Türkiyəyə qarşı da göstərilir. Bütövlükdə, cənab prezidentin siyasi nüfuzu nəticəsində Avropa İttifaqı Şurasının Prezidenti cənab Şarl Mişellə ünsiyyətlərin davamlı olması müsbət qiymətləndirilir. Brüsselin Azərbaycan-Ermənistan münasibətlərinin normallaşdırılmasında fəallığı təqdirediləndir. Lakin minalanmış ərazilərin təmizlənməsi məsələsində Aİ lazım olanı etmir. Bu məqsədlə ayrılan vəsait simvolik xarakterlidir. Nəninki Ukraynada, dünyanın bir sıra ölkələrində külli miqdarda vəsaitlər xərcləyən Aİ Azərbaycanın haqq işində lazımı dəstəyi vermir. Hansı ki, Avroittifaq rəsmiləri minatəmizləmə işinin necə bahalı olduğunu yaxşı bilirlər. Eyni zamanda bu işlə məşğul olan QHT-lər də Azərbaycana münasibətdə ayrıseçkilik edir. Fikrimcə, Aİ-nin siyasi iradəsi olsa, yanaşma fərqli olacaq”.
Politoloq onu da qeyd etdi ki, mina təmizlənməsi məsələsində passiv olan beynəlxalq təşkilatlar bir növ məcburi köçkünlərin geri qayıtmasını yubadırlar.
Vidadi ORDAHALLI
