Ermənistanda baş nazir Nikol Paşinyanın istefası tələbilə müxalif qüvvələrin etiraz aksiyası davam edir. İrəvanın müxtəlif küçələrində müxalif qüvvələr tərəfindən yürüşlər keçirilir.
Etirazçılar paytaxtda və ölkənin digər bölgələrində itaətsizlik aksiyaları keçirir, yolları bağlayıb nəqliyyatın hərəkətini iflic edirlər. Polis güc tətbiqi ilə hərəkəti bərpa edir, daha fəal etiraz iştirakçıları saxlanılıb polis bölmələrinə aparılır. Artıq xeyli sayda etirazçı saxlanılıb. Polisin məlumatına görə, onların hamısı sərbəst buraxılıb, bəzilərinə dair cərimə cəza tədbiri tətbiq edilib. “Hayastan” və “Şərəf duyuram” müxalif parlament fraksiyaları bu fonda parlamentin plenar sessiyasında iştirak etmir. Parlamentin vitse-spikeri İşxan Saqatelyan küçə və parlament etirazlarının davam edəcəyini bildirir. Saqatelyan digər erməniləri də itaətsizlik aksiyasına qoşulmağa və küçələri bağlamağa çağırır. Onu da qeyd edək ki, Ermənistanda mayın 1-də müxalifət qüvvələri dörd şəhərdən paytaxt İrəvana doğru yürüşə başlayıb. Müxalifət qüvvələrinin bu hərəkəti fonunda Ermənistan hökuməti ölkədə kütləvi iğtişaşlar təhlükəsi ilə bağlı xəbərdarlıq edib. Hazırda müxalifət Paşinyanın başçılıq etdiyi hökuməti Qarabağ məsələsində "yolverilməz güzəştlərə getməkdə" ittiham edir, onun "fərsiz siyasəti" sayəsində Ermənistanın yeni təhdidlərə düçar olduğu və hətta dövlətçiliyini itirmək təhlükəsi ilə üzləşdiyini iddia edir. Xatırldaq ki, aprelin 6-da Brüsseldə görüşmüş Azərbaycan prezidenti İlham Əliyev və Nikol Paşinyan sülh sazişi üzərində işləməyə razılaşıblar. Bundan sonra ölkə parlamentində çıxış edən Nikol Paşinyan bildirib ki, beynəlxalq ictimaiyyət onların "Dağlıq Qarabağın statusu" ilə bağlı tələbin həddini "aşağı salmağını" istəyib. Onun bu çıxışından sonra ölkənin bəzi müxalif qüvvələri oturaq aksiyaya çağırıblar. Müxalifət mövcud iqtidarın erməni xalqının təhlükəsizliyini təmin etməyə, ölkənin suverenliyini müdafiə etməyə qadir olmadığını bildirir. Bundan sonra başlanan etirazlarda iştirakçılar İrəvanın müxtəlif yerlərində itaətsizlik hərəkətlərinə strat veriblər. "Paşinyan - satqın", "Paşinyan Azərbaycan və Türkiyə maraqlarına xidmət edir", "Ayağa qalx, Ermənistan", "Nikol-türk" çağırışları ilə yürüşlər keçirir, şəhərin bir hissəsini o biri hissəsi ilə birləşdirən körpüləri, küçə və prospektləri bağlayıb nəqliyyatın hərəkətini iflic edirlər. Polis etirazçıları sıxışdırıb çıxarır, nəqliyyat hərəkətini bərpa edir, daha fəal müqavimət göstərənləri saxlayıb polis şöbələrinə aparırlar. Hazırda polis daha sərt hərəkət edir, itaətsiz aksiya iştirakçılarının küçə bağlamaq cəhdlərinin qarşısı dərhal alınır.
Ermənistan parlamentinin “Vətəndaş Müqaviləsi” fraksiyasının katibi Artur Hovhannisyan məsələ ilə bağlı bildirir: “Bu insanlar Qarabağ məsələsi ilə hakimiyyəti ələ keçirməyə çalışırlar, onların başqa məqsədi yoxdur”. Onun sözlərinə görə, müxalifətin ictimai dəstəyi yoxdur və olmayacaq, bu mənasız gündəmdir: “Müxalifət demokratiyanı şübhə altına almağa və təhlükəsizliyə qarşı çıxmağa çalışır. Hüquq sistemi ölkəmizdə ictimai asayişi pozmaq gücündədir. Ermənistanda Qarabağ məsələsi uzun illər əvvəlki hakimiyyət nümayəndələri üçün hakimiyyətin formalaşdırılması mənbəyi olub”. Erməni hüquq müdafiəçisi Nina Karapetyants da qeyd edir ki, İrəvan küçələrində baş verənlər dövlət çevrilişinə cəhddən başqa bir şey deyil. Onun sözlərinə görə, küçələrdə olan bir qrup insanın məqsədi revanşdır: “Bu müxalifət guya bütün sənədlərin imzalanması, hakimiyyətə gəlməsi üçün münasib anı gözləyir. İnsanların küçələrə çıxmasında müxalifət günahkardır”. Erməni vəkil Gevorq Davtyan vurğulayıb ki, baş verənlər xalqın iradəsi deyil: “Küçədə bir neçə nəfər var, bu, xalqın iradəsi deyil. Uğursuz olacaq. Küçədə o qrupların yanında xalq yoxdur”. Ermənistanın “Adekvat”“ ictimai təşkilatının rəhbəri Artur Danielyan isə qeyd edir: “Son günlər Paşinyanın necə satqın olduğunu hiss etdinizmi?. Kapitulyasiyadan sonra etiraz dalğasına nəzarət və yatırma prosesi başlayanda insanlar israr edirdilər ki, Paşinyan o qədər də satqın deyil. Təbii ki, Putin Paşinyanın satqın olmadığını iddia etsəydi, onun yerli marionetləri şefə qarşı çıxa bilməzdi. Ancaq gəl və gör ki, bir il yarım sonra Paşinyan satqın olub... Təbiidir ki, onun xəyanəti Qarabağı verməkdə deyil, Moskvanın boyunduruğundan çıxmaq cəhdindədir. Bu “müxalifət”in Qarabağı təhvil vermək problemi yoxdur, onların yeganə tələbi Qarabağı Brüsselin yox, Moskvanın himayəsi altında təhvil verməkdir”. Ermənistanın “1in.am” nəşri isə yazır: “Ermənistanın bütün daxili gündəmi həm hakimiyyətin, həm də müxalifətin dili ilə Qarabağ ətrafında formalaşır. Bir qrup hansısa plankanın aşağı salınmalı olduğunu, digər qrup isə bənzər şeyi etməyin xəyanətə bərabər bir şey olduğunu deyir. Yeri gəlmişkən, xəyanət mövzusu bizim sevimlilərimizdən biridir. Ermənistanda su qıtlığı var: xəyanət olub. Qış soyuqdur, xəyanətin nəticəsidir. Pişik acdır, mütləq xəyanətin izi var. Hamı hamıdan xəyanətdə şübhələnir. Bu mənada Ermənistanda Qarabağ məsələsi yalnız siyasi hay-küy və spekulyasiyaların təşkili məsələsinə çevrilib”.
Nahid SALAYEV
