“Beləliklə, onlar bu prosesdə iştirak etməsələr, onda onlardan dolayı yollarla keçəcəyik”. Bunu Prezident İlham Əliyev ADA Universitetində “Cənubi Qafqaz: İnkişaf və əməkdaşlıq” mövzusunda beynəlxalq konfransda deyib.
Ölkə başçısı açıq bəyan etdi ki, Ermənistan Zəngəzur dəhlizindən imtina etsə, İrandan keçidə üstünlük veriləcək: “Bizim təklif etdiyimiz Zəngəzur dəhlizi adlandırılan dəhliz onların ərazisindən keçəcək. Əminəm ki, keçəcək, lakin onlar yenə də vaxt itirirlər. Çünki biz artıq Ermənistan sərhədinə avtomagistralı və dəmir yolunu tikirik və dəmir yolu bu ilin sonuna kimi hazır olacaq və avtomagistral ola bilsin sonra. Beləliklə, onlar bu prosesdə iştirak etməsələr, onda onlardan dolayı yollarla keçəcəyik. Ötən ay biz İranla Ermənistandan yan keçən körpülərin tikilməsi üçün artıq anlaşma memorandumunu imzaladıq. Baxın, biz neft və qaz kəmərləri layihələri ilə bağlı onlardan yan keçdik və Gürcüstan bundan faydalanır, tariflərdən yaxşı vəsait əldə edir. Tbilisidən Qarsa yol çəkəndə də biz onlardan yan keçdik. İndi isə hərbi uğursuzluğunun faydalarının mümkün olduğunu öz xalqına göstərmək üçün əllərinə tarixi fürsət düşdükdə, - bu fayda regionun bir hissəsi olmaq və sərvətə çıxış əldə etməyi nəzərdə tutur, - yenə də onlar bir il yarım müddətində bu işi əngəlləyirlər. Onlar bizə Mehri regionunda yolun keçəcəyi yerin coğrafi koordinatlarını vermədilər və onlar dəmir yolunun tikintisi ilə bağlı isə heç texniki-iqtisadi əsaslandırma işlərinə belə başlamayıblar”.
Görünən odur ki, Ermənistanın seçim imkanı məhduddur.
“Kreml nədənsə Zəngəzurdan keçəcək yolların açılması ilə bağlı İrəvana təzyiq etmir”
Məsələyə münasibət bildirən AMİP funksioneri Əli Orucovun fikrincə, Zəngəzur dəhlizi ilə bağlı alternativ olsa a Ermənitan tərəfi tələsmir: “Bu, isə bir sıra məqamlardan xəbər verir. Ermənistanın prosesi uzatmasının arxasında bir sıra məsələlər ola bilər. Ermənistan vaxt uzatmaqla, bir sıra güzəştər qoparmaq istəyir. Hesab edirlər ki, dirəniş göstərsələr Azərbaycan bəzi güzəştlərə gedə bilər. Əsas məqsədləri odur ki, Zəngəzura dəhliz statusu verilməsin. Digər tərəfdən, revanşistlərdən özlərini sığortalamaq üçün prosesi uzadırlar. Düzdür, Azərbaycan İran vasitəsi ilə alternativ variant ortaya qoyub. Ancaq Ermənistanda hesab edirlər ki, İran sanksiyalar atında olduğu üçün guya bu variant elə də işləməz. Qərb belə olduğu halda daşımalarda Bakı-Tbilisi-Qarsa üstünlük verəcək. Sözügedən məsələdə Rusiyanın da şübhəli davranışları var. Düzdür, Rusiya kommunikasiyaların açılmasında maraqlı olduğunu bəyan edir. Rusiya rəsmisi Overçuk bununla bağlı bir neçə dəfə regiona səfər edib. Ancaq Kreml nədənsə Zəngəzurdan keçəcək yolların açılması ilə bağlı İrəvana təzyiq etmir. Ermənistanın prosesi uzatmasının bir səbəbi də bununla bağlıdır. Ancaq istənilən halda prosesi uzatmaqda davam edəcəksə, bundan Ermənistan itirəcək”.
O üzdən, partiya funksioneri hesab edir ki, Ermənistan əməli addımlar atmalıdır.
Vidadi ORDAHALLI
