Brüsseldə Prezidentin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev və Ermənistan Təhlükəsizlik Şurasının katibi Armen Qriqoryanın görüşü olub.
Bu barədə Avropa İttifaqının (Aİ) Cənubi Qafqaz və Gürcüstan böhranı üzrə xüsusi nümayəndəsi Tovio Klaar tvitter hesabında paylaşım edib: “Hikmət Hacıyev və Armen Qriqoryanı bu formatda ikinci bir görüş üçün Brüsseldə qarşılamaqdan məmnunam”. Qeyd edək ki, bəzi təhlilçilər bu təması iki ölkə başçısının bu yaxınlarda baş tuta biləcək görüşünə hazırlıq kimi qiymətləndirir. Çünki bir ay əvvəl, ölkə başçılarının görüşündən qabaq məhz buna bənzər formatda hazırlıq görüşü keçirilmişdi. İndiki şəraitdə ölkə başçıları səviyyəsində görüşün keçirilmə ehtimalını nə dərəcədə əsaslı saymaq olar və belə bir təmas olarsa, onun nə kimi effekti olar? Çünki ötən ay ərzində əldə olunan razılaşmaların heç birini Ermənistan yerinə yetirmədi.
Azərbaycan Naminə Alyans Partiyasının sədr Abutalıb Səmədov “Bakı-Xəbər”ə açıqlamasında bildirdi ki, Brüsseldə keçirilən İlham Əliyevlə Paşinyan arasındakı son görüşdən sonra Azərbaycan cəmiyyətində, xüsusilə də müxalifət cəbhəsində olduqca ümidli bəyanatlar verilməyə başladı: “Bu fikirləri nəyə əsasən dediklərini anlamaq bir az çətindi. Əslində, Paşinyanın məhz həmin görüşdən sonra səsləndirdiyi bəyanatlar bizi dərindən narahat etməlidir. Ancaq görürəm ki, müxalif cameə “Ermənistan bizim ərazi bütövlüyümüzü qəbul etdi” deyib, az qalırlar şadyanalıq etsinlər. Paşinyanın fikirlərindən belə nəticələri çıxarıb sevinmək çox tezdir. Madrid prinsiplərinə qədər bizə təklif olunan bütün sənədlərdə ərazi bütövlüyümüz dəstəklənirdi. Bütün bunlar kağız üstə olurdu, əslində isə ermənilərə tam müstəqillik verilirdi. Bu baxımdan da, mən Brüsselə o qədər də ümid etmirəm. Çünki hansısa ciddi nəticəyə nail olmaq üçün mütləq mənada təzyiq olmalıdır. Ermənilərin asanlıqla bizim tələblərimizi qəbul etmələri qeyri-mümkündür. Azərbaycan heç bir statusun verilməyəcəyini deyir, Ermənistan isə status istəyir. Mütləq onlara təzyiq edilməlidir. Belə təzyiq imkanları daha çox Rusiyanın əlində var. Qarabağda sülhməramlılar var, Ermənistanda Rusiyanın hərbi bazaları mövcuddur. Avropanın əlində olan iqtisadi imkanlardır. Bu amil ermənilərin mövqeyinin biz istəyən səviyyədə dəyişməsinə təsir edə bilməz. Hikmət Hacıyevin Qriqoryanla görüşü, çox güman ki, ölkə başçılarının gələcək görüşü üçün hazırlıq xarakteri daşıyır. Bunun da yaxın zamanlarda keçiriləcəyini güman etmirəm. Brüsseldə belə bir nəticənin əldə olunacağını isə ümumiyyətlə qəbul etmirəm. Bizim istədiyimiz sülh sazişinin imzalanması yalnız Rusiya ilə Türkiyənin vasitəçiliyi ilə mümkündür. Azərbaycan danışıqlardan heç vaxt imtina etmir. Brüsselin yenidən belə bir görüşü təşkil etməsi ciddi nəticəyə səbəb olmasa da, olsa-olsa, yardımçı xarakter daşıyacaq. Moskvada imzalanacaq sülh sazişinə Brüssel yalnız dəstəyini verə bilər”.
Məhəmmədəli QƏRİBLİ
