Ermənistanın Baş naziri Nikol Paşinyan aprelin 13-də Ermənistan parlamentində çıxışı zamanı Azərbaycana qarşı əsassız iddialar irəli sürüb. Paşinyan iddia edib ki, guya keçən il mayın 12-də Azərbaycanın “hücumu nəticəsində” Qaragöl ətrafında Ermənistanın 45 kvadrat kilometr ərazisi Azərbaycan tərəfindən “tutulub”.
Bununla kifayətlənməyən erməni baş nazir onu dinləyənlərə daha ağ yalanlar danışıb. O deyib ki, “bu yeganə hal deyil, ötən əsrin 90-cı illərində də Azərbaycan 70 kvadrat kilometr torpağımızı işğal edib”. “...Azərbaycan Ordusu Ermənistanın “təhlükəsizliyinə təhdidlər” yaratmaqla Zod-Xəznəvar bölməsində qalmaqda davam edir. Amma demək istəyirəm ki, bunun nəticəsində işğal olunmuş Ermənistan ərazisinin 45 kvadrat kilometri, təəssüf ki, tək deyil. 1990-cı illərdən daha 70 kv.m ərazi “işğal” altındadır...” Bu, Ermənistanın Baş nazirinin növbəti pozuculuq davranışıdır.
Bütün bu yalanlar delimitasiya və demarkasiya danışıqlarının başlanması ərəfəsində Paşinyanın prosesə təxribat törətmək, onun qarşısını almaq cəhdi kimi dəyərləndirilə bilərmi?
Sərhədlərin dəqiqləşdirilməsi məsələsinin müzakirə olunmağa başladığı ərəfədə, belə bir vaxtda Paşinyan süni şəkildə ortalığa “mübahisəli ərazilər” məsələsini çıxarır. Keçən əsrin 90-cı illərində Azərbaycan Ermənistanın hansı ərazisini “işğal” edə bilərdi ki, özü Ermənistanın təcavüzünə məruz qalmışdı? Ermənistan həmin dövrdə ölkəmizə təcavüz edib, az qala ölkənin yarısını işğal etmişdi. Azərbaycan harda Ermənistanın torpağını “tutub” ki, Paşinyan yenə də pozuculuqla məşğul olur?
“Paşinyan göstərsin görək, keçən əsrin 90-cı illərində Azərbaycan hansı 70 kvadratmetrlik ərazisini “işğal” edib, həmin ərazinin adını çəksin”
AMEA-nın Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev bizimlə söhbətində bildirdi ki, Paşinyanın bu bəyanatı birbaşa qarşıda bizi gözləyən delimitasiya və demarkasiya danışıqlarına zərbə vurmağa xidmət edir. “Müharibə il yarımdır ki, bitib, bu müddət ərzində sülh danışıqlarına başlanılmalı idi. Lakin Ermənistan bütün vasitələrdən istifadə edərək sülh danışıqlarını ləngidir. Hazırda sərhədlərin delimitasiyası aktualdır. Delimitasiya və demarkasiya məsələsi həll edilməlidir. Bu gün tez-tez suallar eşidilir ki, delimitasiya və demarkasiya çərçivəsində Ermənistan hansı əraziləri Azərbaycana qaytaracaq. Maraqlı sualdır. Keçən əsrin 90-cı illərində, müharibənin qızğın vaxtdında Ermənistan Azərbaycanın bütün sərhəd ərazilərinə qarşı işğalçılıq edib. Bizim bütün otlaq, örüş sahələrimiz, yaylaq yerlərimiz 90-cı illərdə Ermənistan tərəfindən işğal olunub. Bunu Paşinyan çox yaxşı bilir. Onu da yaxşı dərk edir ki, delimitasiya və demarkasiya məsələsi gerçəkləşəndə onlar qeyri-qanuni olaraq ələ keçirdikləri ərazilərimizi geri qaytarmağa məcbur olacaqlar. Ermənistan 90-cı illərdə zəbt etdikləri əraziləri sonradan quraşdırdıqları xəritəyə daxil edib. Proses başlayan kimi bu məsələyə mütləq diqqət yetirləcək, xəritələr incələnəcək. Paşinyan özü də gözəl bilir ki, Azərbaycan 2021-ci ilin mayında heç bir ərazini işğal etməyib. Bizim qoşunların dayandığı Qaragöl də, onun ətrafı da bizim torpağımızdır, biz öz sərhəddimizdə dayanmışıq. Amma Ermənistan o vaxt bu ərazini qanunsuz olaraq “rəsmiləşdirdiyi” üçün oranı özününkü sayır. Elə də ötən əsrin 90-cı illərində Azərbaycan bu ölkədən ərazi almayıb, əksinə, Ermənistan Zəngəzur ərazisi də daxil olmaqla Qazax, Tovuz, Gədəbəy və başqa rayonlarımızdan ərazi qoparmağa çalışıb, bəzilərindən də qoparıb. Bu baxımdan Paşinyanın bəyanatı Ermənistanın özünü ifşa etməkdən başqa heç nəyə yaramır”.
Q.Hacıyev hesab edir ki, Ermənistanın Baş naziri Azərbaycana qarşı ərazi iddialarına son qoyulacağını bəyan etsə də, sonradan sözünü dəyişib əsassız olaraq Azərbaycanı qaralamağa cəhd edir: “Ermənistan bəyan edir ki, Azərbaycanın ərazi bütövlüyünü tanımağa hazırdır. Onu da deyirlər ki, delimitasiya və demarkasiya prosesinin başlamasını da istəyirlər. Bütün bunların ardınca isə Paşinyan yalan bəyanatlarla delimitasiya və demarkasiya prosesinə zərbə vurmağa çalışır. İstəyir ki, bu proses ya baş tutmasın, ya da uzansın. Çünki bu prosesin gerçəkləşməsi bu ölkənin maraqlarına uyğun deyil. Ermənistan bütün imkanlardan istifadə edib qanunsuz olaraq Azərbaycandan qopardığı əraziləri özündə saxlamaq istəyir. Ona görə də, proses öncəsi bu cür uydurmalar ortaya atılır. Hesab edirəm ki, delimitasiya və demarkasiya prosesi tam qaydalara uyğun keçiriləcək və Ermənistanın pozuculuq cəhdlərinin qarşısı alınacaq. Paşinyan göstərsin görək, keçən əsrin 90-cı illərində Azərbaycan hansı 70 kvadratmetrlik ərazisini “işğal” edib, həmin ərazinin adını çəksin. Yoxdur belə şey. Biz deyə bilərik ki, Ermənistan Azərbaycanın ərazisini işğal edib, 44 günlük Vətən müharibəsində o əraziləri azad etmişik. Müharbədən sonra məlum oldu ki, Ermənistan fürsətdən istifadə edib Ermənistan-Azərbaycan sərhədində qanunsuz dəyişiklik edib. Delimitasiya və demarkasiya prosesi zamanı bunlar ifşa olunacaq”- deyə Q.Hacıyev qeyd etdi.
İradə SARIYEVA
