“Vaxtilə biz torpaqlarımızı işğaldan azad edəndə və məşhur “Bayraktar” dronlardan istifadə edəndə xarici ekspertlər və mətbuat bunu ölüm silahı kimi qələmə verirdi. İndi isə Rusiya-Ukrayna müharibəsində bunu mələk adlandırırlar”.
Bunu Prezident İlham Əliyev bu ilin birinci rübünün yekunlarına həsr olunmuş müşavirədə deyib.
Ölkə başçısının sözlərinə görə, işğal dövründə beynəlxalq təşkilatlardakı fəaliyyətimiz, eyni zamanda, ikitərəfli formatda apardığımız danışıqlar əsnasında biz güc-bəla ilə, zorla ölkəmizin ərazi bütövlüyü prinsipini o bəyannamələrə saldırırdıq: “Bir çoxları imtina edirdi. Halbuki bu, gün kimi aydın idi kim işğalçıdır, kim işğala məruz qalan ölkədir. İkili standartlar, ədalətsizlik bax, budur. Biz bunu bu gün də görürük, Rusiya-Ukrayna müharibəsində görürük. Vaxtilə biz torpaqlarımızı işğaldan azad edəndə və məşhur “Bayraktar” dronlardan istifadə edəndə xarici ekspertlər və mətbuat bunu ölüm silahı kimi qələmə verirdi. İndi isə Rusiya-Ukrayna müharibəsində bunu mələk adlandırırlar. Fərq budur, ikili standartlar budur, bizə qarşı ədalətsizlik budur. Bu reallıqdır. Biz isə öz gücümüzlə yeni reallıq yaratmışıq və yaradırıq”.
Görünən odur ki, xarici dairələr maraqlarına uyğun olanda bir cür, uyğun olmayanda məsələni başqa cür təqdim edirlər.
“Bir sıra xarici media resursları Vətən müharibəsində “Bayraktar”ları “qatil dronlar” kimi təqdim edirdi”
Məsələyə münasibət bildirən politoloq Tural İsmayılovun sözlərinə görə, cənab Prezidentin sözügedən müşavirədə səsləndirdiyi fikirlər xüsusi əhəmiyyətə malikdir: “Xüsusən də beynəlxalq aləmdə regionlara, dövlətlərə fərqli münasibətin bir daha ölkə başçısı tərəfindən ifşa olunması həm öz vətəndaşlarımız üçün, həm də beynəlxalq media üçün kifayət qədər maraqlı nüansların ortaya çıxmağı ilə nəticələndi. Məsələ ondadır ki, 44 günlük Vətən müharibəsində indiyə qədər BMT-nin 4 qətnaməsinin yerinə yetirilməməsinə etiraz edən və buna əks-hücum əməliyyatları ilə cavab verən Azərbaycana yönəlik haqsız informasiya basqıları oldu. Eyni zamanda, həmin vaxt müxtəlif ədalətsiz qərarlar verilirdi. Həmin dövrdə ölkəmizin ərazi bütövlüyü ilə bağlı beynəlxalq siyasi təşkilatlarda və dünyada haqq-ədalətdən dəm vuran dövlətlər Ermənistanın işğalçılıq siyasətini görməzdən gəlirdilər. Biz görürdük ki, müxtəlif ölkələrdə Azərbaycan əleyhinə bəyanatlar səslənir. Bu, Rusiya ilə Ukrayna arasında gedən proseslərdə daha aydın şəkildə özünü göstərir. Prezident “Bayraktar”larla bağlı məsələni xüsusilə qabartdı. Bir sıra xarici media resursları Vətən müharibəsində “Bayraktar”ları “qatil dronlar” kimi təqdim edirdilər. Nədi-nədi, Azərbaycan Qarabağ müharibəsində ondan səmərəli istifadə edirdi. Bu, bəlli dairələri narahat edirdi. O vaxt bir neçə Kanada şirkəti Türkiyə müdafiyə sənayesi ilə əməkdaşlığı dayandırdı. O cümlədən, dünyadakı bir sıra silah şirkətləri bu məsələ ətrafında süni ajiotaj yaratmağa çalışdılar. Ancaq indi Ukraynanın “Bayraktar”lardan istifadə etməsinə həmin qurumlar fərqli mövqedən yanaşırlar. Bunu xilas yolu kimi təqdim edirlər. Bəs Azərbaycan nə edirdi? Azərbaycan bu dronlardan istifadə edərək ərazilərini işğaldan azad edirdi. Əfsuslar olsun ki, ikili standartlardan çıxış edən bir sıra dünya dövlətləri bunu fərqli yozurdular”.
Politoloq onu da əlavə etdi ki, Azərbaycan 30 il beynəlxalq çevrələrdən haqq-ədalətə dəstək görmədi. Bundan sonra da belə olacağını nəzarə alsaq, o zaman yalnız öz gücümüzə arxalanmalıyıq.
Vidadi ORDAHALLI
