“Mən hələ də ümid edirəm, beynəlxalq təşkilatlar, böyük fondlar, xeyriyyəçiliklə məşğul olan beynəlxalq qeyri-hökumət təşkilatları bir nəzər yetirəcəklər”. Bunu Prezident İlham Əliyev bu ilin birinci rübünün yekunlarına həsr olunmuş müşavirədə deyib.
Ölkə başçısının sözlərinə görə, müharibədən bir il yarım keçsə də, bir fond belə Azərbaycana yardım etməyib: “Ağdam Qafqazın Xirosimasıdır. Bunu mən yox, beynəlxalq mütəxəssislər deyir. Ağdam kimi bütün şəhərlər ermənilər tərəfindən yerlə-yeksan edilib. Biz heç kimdən bir manat almamışıq. Ancaq bu ədalətsizliklə barışmaq da olmaz. Mən hesab edirəm ki, bizim qurumlarımız, hökumət, Prezident Administrasiyası, nazirliklər, hərə öz xətti ilə bu məsələ ilə bağlı gərək ciddi fəaliyyət göstərsin. Yardım göstərmək istəmirlərsə, desinlər ki, biz sizə yardım etməyəcəyik. Biz də işimizi bilək. Yəni müharibədən təxminən bir il yarım keçibdir. Bir fond belə bizə heç bir yardım göstərməyib. Yenə də deyirəm, biz onsuz da öz gücümüzlə hər şeyi bərpa edəcəyik. Mən demişəm, Qarabağı da, Zəngəzuru da nümunəvi bir bölgə kimi quracağıq. Azərbaycan vətəndaşları orada rahat, firavan yaşayacaqlar. Dünya üçün də bir nümunə olacaq. Ancaq mənim sözüm beynəlxalq təşkilatlaradır. İnsan hüquqları ilə məşğul olanlar, ədalət prinsiplərini rəhbər tutanlar heç olmasa, Azərbaycana da diqqət yetirsinlər və ikili standartlardan kənar olsunlar”.
Həqiqətən də işğal dövründə Azərbaycan əraziləri böyük dağıntılara məruz qalıb. Ancaq nədənsə hələ də dünyadakı böyük fondlar bərpa prosesinə yardım etmək istəmir. Hansı ki, yardımlar bərpa prosesini sürətləndirə bilər.
“Qərbin siyasi iradəsi olsaydı, dərhal beynəlxalq fondlar bərpa prosesində iştirak edərdilər”
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlı beynəlxalq fondların bərpa prosesinə laqeyd yanaşmasını Qərbin müstəqillikdən bəri Azərbaycana münasibətdə sərgilədiyi ikili standartlarla əlaqələndirdi: “Azərbaycan dövlət müstəqilliyini bərpa etdiyi dövrdən indiyə qədər ikili standartlara məruz qalır. Qarabağ məsələsi ilə bağlı Qərbin, ATƏT-in sərgilədiyi mövqe hər kəsə bəllidir. Ukrayna məsələsində Qərb var gücü ilə bu ölkəni dəstəkləyir. Ancaq Qarabağ məsələsində bizə heç bir dəstək verilmədi. Hər yolla bunu görməzdən gəldilər. Həmin ədalətsiz yanaşma bu gün də davam edir. Qərbin siyasi iradəsi olsaydı, dərhal beynəlxalq fondlar bərpa prosesində iştirak edərdilər. Onlar yaxşı bilir ki, işğal dövründə erməni vandalları daşı daş üstə qoymayıblar. Sadəcə, yardım etməkdə maraqlı deyillər. Ona görə də hər bir dövlət problemin həllini özündə görməlidir. Necə ki, Azərbaycan bunu etdi. Əgər Azərbaycan verilən boş vədlərə inanmaqda davam etsəydi, o zaman işğal davam edərdi. İndinin özündə də Azərbaycan öz imkanları hesabına bərpa işlərini görür. Baxmayaraq ki, dağıntıların miqyası çox böyükdür. Bərpa prosesini sürətləndirmək üçün əslində dünya birliyi yardım etməlidir. Ancaq əfsuslar olsun ki, bizə gəlib çatanda dünyanın gözü kor, qulağı kar olur. Ancaq erməninin adi bir problemi olanda bütün dünya birliyi ayağa qalxır”.
Professorun fikrincə, bütün bunlar onu göstərir ki, dünyada ciddi ədalətsizliklər var.
Vidadi ORDAHALLI
