“Ermənistan da görməlidir ki, o bizim planlarımızı əngəlləyə bilməz”. Məlum olduğu kimi, bunu Prezident İlham Əliyev bu ilin birinci rübünün yekunlarına həsr olunmuş müşavirədə deyib.
Dövlət başçısının fikrincə, Azərbaycan onsuz da öz istəyinə nail olacaq: “Əgər Zəngəzur üzərindən bizə keçid verməsə, özü itirəcək və birinci növbədə, 10 noyabr Bəyannaməsini pozmuş olacaq. Çünki 10 noyabr Bəyannaməsində açıq-aşkar yazılıb ki, Azərbaycanın qərb rayonları ilə Naxçıvan Muxtar Respublikası arasında əlaqə olmalıdır və bu, Ermənistanın öhdəliyidir. Əgər o, öz öhdəliyini yerinə yetirmək istəmirsə, onda biz də hər hansı bir öhdəliyin yerinə yetirilməsi ilə bağlı heç bir məsuliyyət daşımayacağıq. Onlar bunu bilməlidirlər, vaxtı uzatmamalıdırlar. Onsuz da biz istədiyimizə gec-tez nail olacağıq. Daha yaxşı olar ki, onlar özləri də bir az cəld tərpənsinlər. Yoxsa yenə də dalan kimi qalacaqlar”.
Bütün bu deyilənlərin fonunda, Zəngəzurla bağlı indiki şəraitdə, yəni hərbi-siyasi, diplomatik üstünlüyün Azərbaycanın tərəfində birmənalı təsdiqləndiyi bir vaxtda verilən bu mesajın əvvəlki mesajlardan məzmunca nə fərqi var? Düzdür, 5-6 ay əvvəl, bir il əvvəl də prezident sözügedən fikirləri səsləndirib. Ancaq bu gün bunun ayrı bir mənası var. Ona görə ki, Azərbaycanın diplomatik, hərbi, siyasi üstünlüyü artıq beynəlxalq miqyasda etiraf olunub. O baxımdan belə vəziyyətdə deyilən bu mesajın nə kimi gücü var?
“Bütün bunlar o deməkdir ki, Ermənistan öhdəliklərindən yayınsa, bu, Paşinyan hakimiyyətinə baha başa gələcək”
Məsələyə münasibət bildirən “İki sahil” qəzetinin baş redaktoru Vüqar Rəhimzadənin fikrincə, verilən mesaj məzmun baxımından əvvəlkilərdən daha güclü və təsirlidir: “Ən azından ona görə ki, proseslər praktiki mərhələyə qədəm qoyub. Dünya birliyi yaranan reallıqları, həyata keçirilən layihələri dəstəkləyir və əməli nəticələr gözləyir. Əgər əvvəl Rusiya kommunikasiya xətlərinin açılmasında müəyyən fəallıq göstərirdisə, artıq Avropa İttifaqı bu yöndə daha çox səy göstərir. Regional platformalar çərçivəsində əməkdaşlığın genişləndirilməsinə xüsusi önəm verirlər. Əgər bir il əvvəl Ermənistan qeyri-müəyyən vədlər verirdisə, konkret tarix göstərməkdən yayınırdısa, indi vəziyyət tamam fərqlidir. Brüssel görüşündə bəyan olundu ki, aprelin sonuna qədər müvafiq komissiyalar formalaşmalıdır. Bütün bunlar o deməkdir ki, Ermənistan öhtəliklərindən yayınsa, bu, Paşinyan hakimiyyətinə baha başa gələcək. Haqlı olaraq Prezident İlham Əliyev Ermənistanın götürdüyü öhtəlikləri xatırlatdı. Biz nəzərə almalıyıq ki, dünya birliyi, xüsusən də aparıcı güc mərkəzləri müharibədən sonra yaranan yeni reallıqları qəbul edir. Siyasətlərini də bunun üzərində qurur. Bütün bunlardan çıxış edərək hesab edirəm ki, Prezidentin bu dəfəki mesajları bütün mənalarda əvvəlkilərdən fərqli idi”.
Bu baxımdan V.Rəhimzadə hesab edir ki, Ermənistan vaxt itirmədən götürdüyü öhdəlikləri yerinə yetirməlidir.
Vidadi ORDAHALLI
