Rusiya sülhməramlıları 10 müxalif erməni deputatın Azərbaycanın Qarabağ iqtisadi zonasının rus sülhməramlılarının müvəqqəti nəzarətində olan hissəsinə Laçın dəhlizindən keçərək gəlməsinə icazə verməyib. Bu barədə Ermənistan parlamentinin müxalif “Ermənistan” blokundan olan deputat Vahe Akopyan bildirib.
Onun sözlərinə görə, Laçın yolunun girişində rus sülhməramlılarına qanunsuz səfərə cəhd edəcək şəxslərin siyahısı verilib və onların buraxılmaması istənilib. Eyni zamanda yolun girişində Ermənistan MTX-nin əməkdaşları da buna nəzarət edir.
Akopyan rus sülhməramlıları ilə uzun-uzadı müzakirə apardığını və səfər qadağasının səbəbini öyrənməyə çalışdığını da qeyd edib:
“Rus sülhməramlıları heç bir əsas göstərmədilər, sadəcə buraxmadılar. Biz Rusiya səfirliyi ilə əlaqə saxladıq. Rusiya səfirliyindən bildirildi ki, səfirliyin rus sülhməramlılarına heç bir aidiyyəti yoxdur”.
Akopyan iddia edib ki, bu, rəsmi İrəvanın qərarıdır, Ermənistan hakimiyyəti rəsmi Bakı ilə ciddi kontaktdadır və yenicə formalaşmağa başlayan əlaqələrə zərər vermək istəmir.
Qeyd edək ki, erməni müxalif deputatlar Xankəndiyə “dördgünlük səfərə” gəlmək istəyiblər. Onların əsas məqsədi Qarabağdakı ermənilərin qanunsuz “milli şurasının iclasında” iştirak etmək olub.
Rusiya sülhməramlılarının nümayiş etdirdiyi bu davranış nə ilə bağlıdır?
Qarabağ Azadlıq Təşkilatının sədri Akif Nağı “Bakı-Xəbər”ə açıqlamasında bildirdi ki, bunun bir sıra səbəbləri var: “Biz görürük ki, artıq tərəflər ilk dəfə olaraq vasitəçilərsiz təmas qurublar. Yəqin ki, Ermənistanın özü də yaranan etimadın zədələnməyini istəmir. Sülhməramlılar öz səlahiyyətlərinə aid olan addımı atıblar. Bundan əvvəl də belə davranış ortaya qoymalıydılar. Təəssüf ki, əksər hallarda bunun tərsini görürdük. Hətta dəhlizdən silah-sürsat keçirildiyinin də şahidi olmuşuq. Onlar elə təxribatların qarşısını almaq məqsədilə ora yerəşdiriliblər. Bu deputatlar da Qarabağa siyasi təxribat törətmək üçün gedirdilər. Hətta Paşinyanın özü də parlamentdə müxalifətin Qarabağda keçirmək istədiyi aksiyanı təxribatçı adlandırmışdı. Ermənistan hakimiyyəti sülh prisesində əldə edilən razılaşmanı pozmaq istəmir. Müxalifət buna görə Paşinyanı satqınlıqda ittiham edirdi. Sülhməramlılar təxribatın qarşısını almaqla öz funksiyalarını yaxşı yerinə yetiriblər. Sonradan Ermənistan Xarici İşlər Nazirliyi müxalifəti sakitləşdirmək üçün bir bəyanat verdi ki, güya bu, 10 noyabr razılaşmasının pozulmasıdır. Bildiriblər ki, Ermənistandan gediş-gəliş sərbəst olmalıdır. Ancaq sənəddə elə bir bənd də yoxdur. Ümumi razılaşma var ki, Ermənistandan gələn sakinlər müəyyən şərtlər daxilində Qarabağa səfər edə bilərlər, ancaq siyasi və hərbi təxribatlara yol verilməməsi şərtilə. Biz artıq görürük ki, Rusiyanın sülhməramlı kontingenti Azərbaycanın haqlı mövqeyi ilə razılaşır”.
Məhəmmədəli QƏRİBLİ
