“Bir həftə Xankəndidə qaz olmayanda adam qalmayıb ki, bizə zəng etməsin - Amerikadan tutmuş Avropaya qədər”. Bunu Prezident İlham Əliyev bu ilin birinci rübünün yekunlarına həsr olunmuş müşavirədə deyib.
Ölkə başçısı qeyd edib ki, Naxçıvan 15 il qazsız qalanda narahat olmadılar: “İndi Qarabağda ermənilərin yaşadıqları yerdə qaz xətti nasaz vəziyyətə düşmüşdü və bir müddət qaz yox idi. Dünyaya hay-haray qaldırmışdılar ki, Azərbaycan burada humanitar fəlakət törədir. Naxçıvan qazını onlar 15 il kəsib belə vəziyyətdə saxlamışdılar. Naxçıvanda isə qış daha sərtdir. Haradasa şaxta mənfi 30 dərəcəyə çatır. Yaxşı, naxçıvanlılar 1990-cı ildən 2005-ci ilə qədər qazsız yaşamışlar. Kim məhrum etmişdi onları? Ermənilər və Ermənistan rəhbərliyi, Ermənistan dövləti. Bir adam, bir təşkilat, bir ölkə səsini qaldırmışdı? Yox! Biganə idilər. Amma bir həftə Xankəndidə qaz olmayanda adam qalmayıb ki, bizə zəng etməsin - Amerikadan tutmuş Avropaya qədər. Birincisi, Avropanın özündə elə ölkələr var ki, orada qaz yoxdur, ümumiyyətlə yoxdur, qazlaşdırma aparılmayıb. İndi mən ad çəkmək istəmirəm. Elə ölkələr var ki, qazlaşdırmanın səviyyəsi 3-5 faizdir. Orada humanitar fəlakət hökm sürür? Bunlar bir həftə qazsız qalıblar, bu humanitar fəlakətdir? Bəs, Naxçıvan 15 il qazsız qalanda niyə humanitar fəlakət deyildi? Sualdır bu. Bu suala cavab var? Var! İkili standartlar və ayrıseçkilik”.
Bütün bunlar bir dahsa Qərbin Azərbaycana münasibətdə ikili standartlardan çıxış etdiyini ortaya qoyur.
“Azərbaycan öz gücü və qüdrəti ilə beynəlxalq dairələrə sübut etdi ki, belə yanaşmaların nəticəsi hansı üsullarla başa çata bilər”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyevin fikrincə, Prezident dəfələrlə çıxış etdiyi tribunalarda ədalətsizliklərə qarşı qəti sözlərini bəyan etdi və bu gün də həmin cəhdlərə qarşı sərt fikirlərini bildirir: “Ermənistanın Azərbaycana qarşı işğalçılıq siyasəti apardığı bütün zamanlarda biz ikili standartların, beynəlxalq siyasi ədalətsizliklərin şahidi olmuşuq və bütün bunlara son qoyulması üçün Azərbaycan öz gücü və qüdrəti ilə məhz ikili standartlarla çıxış edən bir sıra beynəlxalq dairələrə sübut etdi ki, belə yanaşmaların nəticəsi hansı üsullarla başa çata bilər. Bu xüsusda müşavirədə vurğulanan bəyanat da həmin amili ehtiva etməkdədir. Prezident müşavirədəki arqumentləri ilə ikili standartlar siyasəti yürüdənlərə öz sərt mesajını verdi. Xankəndiyə gedən qanunsuz qaz kəməri qəzaya uğradıqdan sonra dövlətimizin humanizm siyasətinə söykənərək həmin kəməri təmir etdi. Ancaq heç bir beynəlxalq təşkilat, yaxud qurum təqdiredici münasibət göstərmədi. Əksinə, cəmi 14-15 gün qazsız qalan separatçıların maraqları kontekstində bəzi çıxışlar oldu və bu da sübut edir ki, ikili standartlar qalmaqda davam edir. Məsələn, nəyə görə Azərbaycan qaz kəmərini təmir etdikdən sonra bu addım dəstəklənmədi? Bütün bunların yerinə qərəzli ermənipərəst “insan haqları” adı altındakı fərdlər, ya da təşkilatlar bunu az qala “amansız faciə” kimi təqdim etdilər. Halbuki, biz o kəməri təmir etdik və dövlət başçımızın da vurğuladığı kimi, bunu etməyə də bilərdik, çünki bizim ermənilərə heç bir borcumuz da yoxdur”.
Politoloqun sözlərinə görə, İlham Əliyev Naxçıvanın 15 il boyunca blokada şəraitində yaşaması və naxçıvanlıların bu illər ərzində hansı əziyyətlərə məruz qalması ilə bağlı arqumentlərə əsaslanan fikirləri ilə əslində anti-Azərbaycan xarakterli qərəzli təşkilatlara kəskin cavab vermiş oldu: “Artıq bundan sonra belə olmayacaq. Azərbaycan dövləti öz gücü və qüdrəti ilə qarşısına çıxan bütün iqtisadi, siyasi problemləri həll etmək iqtidarındadır və eyni zamanda, cərəyan edən hadisələrə, yaşanan proseslərə ədalətlilik, qərəzsizlik prizmasından yanaşması ilə istənilən iddialara dolğun və qəti cavab vermək gücündədir. Məhz bu kimi məntiqləri irəli sürən dövlətimizin başçısı bir daha dünyaya mesaj yolladı ki, bizi zəif görməsinlər və heç bir ikili standartlar bizə təsir edə bilməz. O cümlədən, artıq Ermənistan tərəfi də anlamağa məhkumdur ki, üzərinə götürdüyü bütün öhdəlikləri icra etməlidir və onun başqa çıxış yolu da qalmayıb. Və Qarabağdakı ermənilərin də iki seçim yolları var – ya Azərbaycanın bayrağı altında yaşamağa, Azərbaycan vətəndaşlarına aid olan bütün imtiyazlardan istifadə etməyə hazır olmalıdırlar, ya da buna əks fikirdədirlərsə Ermənistana, yaxud digər ölkələrə köçüb həmin ölkələrin qanunları ilə yaşamağa başlamalıdırlar. Yəni burada qapalı heç nə yoxdur və açıq şəkildə hər şey izah olunub”.
O baxımdan politoloq hesab edir ki, Ermənistan bütün bunlardan ciddi nəticə çıxarmalıdır.
Vidadi ORDAHALLI
