Pakistan parlamentində keçirilən səsvermədə müxalifət blokunun namizədi Şahbaz Şərif yeni baş nazir seçilib. Parlament çoxluğu limiti olan 172-dən çox səs toplayan PML-N lideri Şahbaz Şərif ölkənin yeni və 23-cü baş naziri seçilib. Keçmiş xarici işlər naziri Şah Mahmud Qureşi səsvermə başlamazdan əvvəl verdiyi açıqlamada xalqın qarşısında iki yol olduğunu deyib:
"Bu gün xalqın qarşısında iki yol var - köləlik və özünə hörmət. Seçkini boykot edərək, kütləvi şəkildə istefa veririk".
Qureşinin bəyanatından sonra 120-dən çox PTI deputatı parlamenti tərk edib. Parlamentdən çıxan deputatlar "idxal hökumət"ə qarşı küçələrə çıxacaqlarını bəyan ediblər.
Pakistanın yeni seçilmiş Baş naziri Şahbaz Şərif ölkəsinin Türkiyənin strateji müttəfiq olduğunu bəyan edib. O, hökumətin ilk iclasında İmran Xan hökumətinin xarici siyasətini tənqid edərək, Türkiyə və onun prezidenti Ərdoğandan danışıb:
"Kəşmir məsələsində Türkiyə hər zaman Pakistan və Kəşmir xalqının arxasında dayanıb. Türkiyə hər zaman kəşmirlilərin arxasındadır. Türkiyə ilə Pakistanın ayrılmaz bağları var”.
Çinin yaxşı və pis gündə Pakistanın müttəfiqi olduğunu vurğulayan Baş nazir Pekinlə münasibətlərin yaxşı olmasının vacibliyinə diqqət çəkib. Onun sözlərinə görə, əvvəlki hökumət Çin və Pakistan arasındakı dostluğu zəiflətməyə çalışıb. Baş nazir Çin-Pakistan dostluğunu heç kimin poza bilməyəcəyini vurğulayıb. Şərif Səudiyyə Ərəbistanı, Türkiyə, Avropa Birliyi ölkələri, Birləşmiş Ərəb Əmirlikləri, İngiltərə və İranla yaxşı münasibətlərin olmasının vacibliyini vurğulayaraq, ABŞ-la münasibətlərin bərabərlik əsasında gücləndirilməsinin vacibliyini bildirib.
Bəllidir ki, devrilən İmran Xanın hakimiyyəti dönəmində Pakistan Azərbaycanı birmənalı dəstəkləyib. Erməni mediası İmran Xanın vəzifədən getməsini böyük sevinclə tirajlayır. Belə iddia edirlər ki, Palistanda formalaşan yeni hakimiyyətin dönəmində həmin ölkənin Azərbaycana münasibəti əvvəlki kimi olmayacaq. Bu fikirləri nə dərəcədə əsaslı saymaq olar?
Politoloq Rəşad Bayramov “Bakı-Xəbər”ə açıqlamasında bildirdi ki, Pakistan köklü və atom silahı olan bir ölkədir: “ Belə ölkələrin xarici siyasət kursu, ölkələrə münasibəti fərdlərə görə qurulmur. Azərbaycanla Pakistan arasında da bir sıra sahələrdə müqavilələr var. Onlara əməl olunmasına yeni hökümət də cavabdehlik daşıyır.
Pakistanda hökumət başçısının kim olmasından asılı olmayaraq, hər zaman Azərbaycan-Pakistan münasibətləri normal olub. İmran Xandan əvvəl də müxtəlif şəxslər ölkəyə başçılıq edib. Bu münasibətlərdə gərginlik müşahidə edilməyib.
Bu o halda ola bilər ki, dövlətdə tamamilə inqilab olsun və dövlətin xarici siyasət kursu dəyişsin. Pakistanda xarici siyasət kursunun dəyişəcəyi elan olunmayıb. Yeni baş nazir elə ilk açıqlamasında Türkiyə və onun başçısı barədə gözəl fikirlər işlədib. Bunun özü ermənilər üçün bir mesaj olmalıdır. Pakistan İmran Xandan əvvəlki dövlət başçılarının dönəmində də Ermənistanla diplomatik əlaqələr qurmayıb. Yeni baş
nazir Müsəlman Liqasını təmsil edir. Onun müsəlman ölkələri ilə münasibətlərə daha çox önəm verəcəyinə şübhə ola bilməz.
Xatırladaq ki, Türkiyə Prezidenti Rəcəb Tayyib Ərdoğan Şahbaz Şərifi Pakistanın yeni Baş naziri seçilməsi münasibətilə ilk təbrik edənlərdən olub. Bu özlüyündə rəsmi Ankaranın Şahbaz Şərif hakimiyyətini tanıdığını, bundan sonra da iki ölkə arasında münasibətlərin davam edəcəyini göstərir. Azərbaycana gəldikdə isə, rəsmi Bakının da Ankaradan fərqli mövqe sərgiləyəcəyi inandırıcı deyil. Ermənilərin bəd niyyətləri bu dəfə də ürəklərində qalmış olacaq”.
Məhəmmədəli QƏRİBLİ
