Ermənistanın parlament sədri Alen Simonyan bəyan edib ki, ölkəsi heç vaxt Azərbaycana qarşı ərazi iddiası irəli sürməyib: “Biz həmişə demişik ki, Qarabağ xalqının öz müqəddəratını təyin etmək hüququ Qarabağ xalqının işidir. Biz Azərbaycana qarşı ərazi iddiaları irəli sürməmişik”.
Spiker onu da bildirib ki, Azərbaycanın təqdim etdiyi sülh müqaviləsi təklifinin 5 prinsipi, Qarabağda və Ermənistan ətrafında vəziyyətlə bağlı bir çox təfərrüatlar yaxın 2-3 gün ərzində məlum olacaq. İndiki hakimiyyət orqanlarının nə üçün “Artsax Respublikası” adından istifadə etməməsi sualına gəlincə, o bildirib ki, bu, danışıqların indiki mərhələsində məqsədəuyğun olmadığı üçün edilmir. Qarabağa nə üçün səfər etməməsini isə A.Simonyan belə əsaslandırıb: “Fərz edək ki, Qarabağa gedirəm. Mənə heç nə olmayacaq, qayıdacağam, amma səfərimdən sonra azərbaycanlılar kəndlilərimizə, vətəndaşlarımıza atəş açmağa başlayacaqsa, bunu niyə edim? Məncə bu səhvdir. Danışıqlar gedir. Qarşı tərəfə heç olmasa bir dəfə atəş açmaq şansı verməməliyəm”.
Simonyanın fikirlərində təəccüb doğuran məqam Ermənistanın, guya heç vaxt Azərbaycana qarşı ərazi iddiası irəli sürməməsi ilə bağlıdır. Hansı ki, bu tamamilə yalandır. Belədirsə, o zaman “miatsum” kampaniyası (Qarabağın Ermənistana birləşdirilməsi) nə deməkdir? Digər tərəfdən, Qarabağdan 100 kilometr aralıda yerləşən Qazaxın 7 kəndinin, Sədərək rayonunun Kərki kəndinin işğalı Ermənistanın Azərbaycana yönəlik ərazi iddiası deyil bəs nədir?
“Ərazi iddianız yoxdursa, o zaman separatçılara niyə 290 milyon dollar ayırırsınız?”
Məsələyə münasibət bildirən Böyük Azərbaycan Partiyasının sədri Elşad Musayevin fikrincə, Simonyanın dedikləri ermənilərin növbəti həyasızlığı və hiyləgərliyidir: “Bu, hər zaman olduğu kimi, növbəti erməni həyasızlığıdır. Hansı ki, spiker Alen Simonyanın timsalında biz bunu açıq-aşkar görürük. Məsələ ondadır ki, Ermənistan adında dövlət 1918-ci ildə tarixi Azərbaycan ərazilərində yaradılıb. Əvvəl bu dövlətin ərazisi 9 min kvadrat kilometr idisə, daha sonra 20 min kvadrat kilometr ərazimizi ələ keçirdilər. Bilavasitə Rusiyanın himayəsi ilə. Ondan sonrakı dövrdə müxtəlif vaxtlarda qarış-qarış ərazilərimizi ələ keçiriblər. 1988-ci ildə də açıq bəyan etdilər ki, Dağlıq Qarabağ Ermənistana birləşdirilməlidir. Öz çirkin məqsədlərini reallaşdırmaq üçün əvvəl Qarabağı, sonra ətraf 7 rayonu işğal etdilər. Naxçıvanın bir sıra ərazilərini işğal etdilər. O cümlədən, Qazax rayonunun bir sıra kəndlərini işğal edib sonra yandırdılar. 1990-cı ilin martında Qazaxın Bağanis Ayrım kəndində dinc insanlara qarşı soyqırım aktı törətdilər. Ərazi iddiası necə olur ki? İndiki halda vəziyyətləri gərgin olduğu üçün belə deyirlər. Çünki bilirlər ki, bunlar Azərbaycanla üzbəüz döyüşə bilməyəcəklər. Azərbaycan Ordusunun qabağından ermənilər dovşan kimi qaçır. Bunların himayədarı olan Rusiyanın da başı qarışıb. Qərb də Ukraynanın hayındadır. Ona görə də A.Simonyan belə fikirlərlə çıxış edir. Bununla Azərbaycan cəmiyyətini aldatmaq istəyirlər. Eyni zamanda, beynəlxalq aləmə car çəkirlər ki, guya bunların heç kəsin ərazisində gözü yoxdur. Ərazi iddianız yoxdursa, o zaman separatçılara niyə 290 milyon dollar ayırırsınız?”.
Bu baxımdan partiya sədri hesab edir ki, ermənilərin dediyinə inanmaq olmaz.
Vidadi ORDAHALLI
