Məlumatlara görə, aprelin 10-da Rusiyanın Qarabağdakı “sülhməramlı” adlanan hərbi kontingentinin himayəsində bəslənən separatçı- terrorçu rejim müstəqillik və suverenliyimizə qarşı növbəti təxribat törədərək Azərbaycan Respublikasının 6 məntəqəsində qanunsuz “seçki” keçirib. Bu haqda erməni mediası məlumat yayıb.
Məlumata görə, Xocavənd rayonunun “Berdaşen” adlandırılan Qarakənd kəndində “icma başçısı”, həmin rayonun “Varanda” adlandırılan Qaradağlı, “Tsovatex”- “Zavadıx, “Norşen” –Günəşli və Sos kəndlərində, həmçinin Tərtər rayonunun “Aknaberd” adlandırılan Umudlu kəndində “icma şurasının üzvləri”nə "səs" verilib.
Məlumata görə, separatçı-kriminal xuntanın qanunsuz "seçki" komissiyasının məlumatına görə, "seçici"lərin 49,35 faizi qeyri-qanuni kampaniyada iştirak edib.
Xatırlatmalara görə, 1991-ci il noyabrın 20-də Xocavənd rayonunun Qarakənd kəndi üzərində içərisində yenicə müstəqillik qazanmış Azərbaycan Respublikasının görkəmli dövlət xadimləri və ziyalıları olan vertolyot terror aktı nəticəsində məhv edilib. Eyni rayonun Qaradağlı kəndində isə 1992-ci il fevralın 17-də erməni terrorçuları 100-dən çox soydaşımızı qətlə yetirib, kənddəki evləri isə tamamilə yandırıblar...
“Qondarma seçkilərə görə separatçıalrın başı həqiqətən də çox ağrıyacaq”
Siyasi ekspert Rövşən Rəsulov “Bakı-Xəbər”ə şərhində bildirdi ki, separatçılar bununla Azərbaycanın əsəblərini tarıma çəkmək istəyir, lakin belə qondarma “seçkilərlə” heç nə əldə edə bilməyəcəklər, əksinə, öz sonlarını daha da yaxınlaşdırırlar: “Bu gün Qarabağdakı separatçılarin məqsədi daha çox təxribat törətmək və Rusiya sülhməramlılarının himayəsində Azərbaycanın suverenliyinə qarşı hərəkətlər etməkdir. Qarabağda Rusiya sülhməramlılarının arxasında gizlənərək müxtəlif “tədbirlər” keçirməyin, yaxud hər hansı “bəyanatlar” verməyin, separatçı qalıqlarının "Artsax" adlandırdığı qondarmanın hansısa bir davranış sərgiləməyinin nə bu gün, nə də sabah üçün heç bir mənası, məntiqi, effekti var. Separatçılar bu cür “seçki” təxribatları ilə heç nə əldə edə bilməyəcəklər. Bütün bunlar bilavasitə Rusiya sülhməramlılarının arxasında edilən cəhdləridir. Bu cəhdlərin puç olduğunu onlar özləri də yaxşı bilirlər. Onu da qeyd edək ki, hazırda Ermənistandakı hakimiyyət artıq nəyin nə yerinə qoyulduğunu çox yaxşı bilir. Hakimiyyət yaxşı bilir ki, artıq Qarabağ məsələsi ermənilər üçün bitib. Düzdür, Ermənistanda revanşist qüvvələr var. O qüvvələrin də nə deməyindən, hansı təxribatlara əl atmağından asılı olmayaraq mövcud hakimiyyət, yəni Paşinyanın hakimiyyəti Qarabağ məsələsinin onlar üçün bitdiyini yaxşı anlayır. Əbəs deyil ki, Brüssel görüşündən sonra onlar Qarabağın ərazi vahidi kimi deyil, yalnız Qarabağdakı erməni xalqının “müqəddaratı” haqqında fikirlər bildirirlər. Lakin bəri başdan onu da deyək ki, Azərbaycanda bir sıra xalqlar yaşayır, Azərbaycandakı tolerant mühitdə bir çox azsaylı xalqlar mövcuddur ki, ermənilər də onlardan biridir. Ermənilər o xalqların heç birindən artıq deyil ki, onlara hər hansı bir ayrı yanaşma olsun. Bu baxımdan ermənilərə hər hansısa bir mədəni statusun verilməsi də gündəmə çıxa bilməz”.
R.Rəsulovun sözlərinə görə, ümumiyyətlə, Qarabağdakı ermənilər ya bilavasitə Azərbaycanın vətəndaşlığını qəbul edib burada yaşamalıdır, yox, əgər istəmirlərsə o zaman buyursunlar yol açıqdır, Ermənistana, ya da hara istəyirlər getsinlər, oralarda yaşasınlar. “Separatçılar hər cür oyuna əl atır. Separatçıların “icma seçkiləri” tamamilə absurddur. Orada hər hansı "icma seçkilərinin" keçirilməsində məqsəd əslində Azərbaycanın buna hansı reaksiya verəcəyini yoxlamaqdır. Onlar Azərbaycanın nə reaksiya verəcəyini gözləyirlər. Yəni gözləyirlər ki, “biz kəndlərdə icma seçkiləri edirik və Azərbaycan buna necə reaksiya verəcək?”. Təbii ki, Azərbaycanın suveren ərazisində özbaşına seçkilərin keçirilməsinin qarşısı başqa cür də alına bilər. Sadəcə olaraq, Azərbaycan Silahlı Qüvvələri təmkin nümayiş etdirir. Son məlumatlara görə, Ağdərə istiqamətində, eləcə də digər yüksəkliklərimizdə mövqe dəqiqləşdirmələri aparılır. Hətta bu yaxınlarda ciddi informasiya resurslarından birində bildirildi ki, ermənilər daha 13 postlarını qoyaraq geri çəkiliblər. Təbii, bu qeyri-rəsmi məlumat olsa da, bizim ekspertlər də bunun fakt olduğunu təsdiqləyirlər. Yəni Azərbaycan tərəfi öz işini görür, mövqelərini möhkəmləndirir, belə deyək, Xankəndiyə doğru öz hərəkət istiqamətlərini dəqiqləşdirir. Separatçılar isə bu cür saxtakar, qanundankənar "seçkilərlə" Azərbaycanın nəbzini yoxlamağa çalışırlar, amma heç nə bacarmayacaqlar. Bildiyimiz kimi, Xankəndidəki separatçılar qondarma "parlament" və "prezident" seçkilərini də keçirmək niyyətindədir. Bu baş verərsə, o zaman qondarma seçkilərə görə separatçıların başı həqiqətən də çox ağrıyacaq. Hesab edirəm ki dəmir yumruq onların sonunu çatdıracaq. Bu baxımdan onların hansısa kəndlərdə "icma rəhbəri" seçmələrinin mənası, məntiqi, hüquqi əsasları yoxdur, onlar bu vasitə ilə “biz də varıq”, “bizim burada öz səlahiyyətimiz var” kimi mesajlar ötürmək istəyirlər. Lakin onların mesajları elə öz boğazlarında da qalacaq. Biz tezliklə Qarabağın tamamilə azad edilməsinin şahidi olacağıq. Bu proses də gedir və bundan heç kimin şübhəsi olmamalıdır” - deyə R.Rəsulov vurğuladı.
İradə SARIYEVA
