Məlum olduğu kimi, Fransada birinci turda prezident seçmək mümkün olmadı. Fransanın hazırkı dövlət başçısı Emmanuel Makron prezident seçkilərinin birinci turunda 27,84% səslə qalib gəlib. Makronun ikinci turda əsas rəqibi ifrat sağçı Milli Cəbhə Partiyasının rəhbəri Marin Le Pen olacaq. O, 23,15% səs toplayıb. Fransada prezident seçkilərinin ikinci turu aprelin 24-də keçiriləcək.
O da məlumdur ki, Avropa İttifaqının dönəm sədrliyi Fransadadır. Həmçinin rəsmi Paris Türkiyə, Azərbaycan, Ermənistanla siyasətində xüsusi şəkildə fərqlənir. Fransa daha çox ermənipərəst ölkə kimi tanınır. Son 20-22 ildə Fransa Qarabağ məsələsində xüsusilə fərqlənib - Ermənistanın işğalçı mövqeyini açıq formada dəstəkləyən addımlar atıb. Soyqırım ifadəsi işlətməyənlərlə bağlı illər əvvəl Fransa Senatı qətnamə çıxarmışdı. Türkiyəyə və Azərbaycana münasibətdə etmədiyi ədalətsizlik qalmayıb. İkinci Qarabağ müharibəsindən sonra da Fransa Senatının bir neçə üzvü Azərbaycan əleyhinə sənədə imza atıb. Bununla yanaşı, Vətən müharibəsi zamanı Makron birmənalı Ermənistanın yanında duraraq Nikol Paşinyana çox böyük köməkliklər etdi. Mütəmadi olaraq Paşinyanla zəngləşib ona dəstəyini ifadə edirdi. Ancaq müharibə bitəndən sonra Paşinyan Makrona yox, daha çox seçkilərdə onun alternativlərinə kömək etdi. Makronun rəqibi Pekresə Qarabağa qanunsuz səfər etməklə bağlı şərait yaratdı. Bununla bir növ Makrona müharibə vaxtı ona verdiyi dəstəyin əvəzini qaytarmadı. O üzdən, belə şəraitdə ehtimal etmək olarmı ki, ikinci turda Makron qalib gəlsə, ən azı Makronla Paşinysanın münasibətlərində dərin soyuqluq əmələ gələcək? Bunu proqnoz etmək olarmı?
“Artıq regional şərtlərin dəyişməsi, Cənubi Qafqazda Azərbaycanın dominantlığı...”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna istisna etmədi: “Əvvəla, Fransada keçirlən seçkilərdə Emmanuel Makronun ikincu turda qalib gəməsi gözlənilir. Çünki proseslərin gedişi bunu deməyə əsas verir. Məlum məsələdir ki, Makronun Ermənistanla bağlı siyasəti müsbət olub. Çünki iki ölkə arasında ənənəvi dostluq münasibətləri var. Lakin artıq regional şərtlərin dəyişməsi, Cənubi Qafqazda Azərbaycanın dominantlığı, Fransanın Azərbaycanla əlaqələrə önəm verəcəyi şübhəsizdir. Təbii ki, Makronun Azərbaycanla bağlı siyasətində ciddi ziddiyyətlər var. Buna baxmayaraq, o, prosesləri tənzimləyə bilir. Yəni digər namizədlərlə müqayisədə, Makron bizə sərfdir. Çünki digərləri ermənilərə daha çox rəğbət bəsləyir. O cümlədən, Le Pen. Makron heç olmasa regionu bilir. Makronun Ermənistanla bağlı siyasətinə gəldikdə isə, onun xüsusilə Paşinyana qarşı siyasətində soyuqluq olacağı şübhəsizdir. Çünki Paşinyan nankor və sürüşkən siyasətçidir. Bu səbəbdən Makronla onun siyasətləri üst-üstə düşmür. Göz görə-görə Paşinyan Makronun rəqiblərinə qucaq açdı. Artıq bundan sonra Makronun erməni lobbisinə və ermənilərə ehtiyacı qalmayacaq. Fransanın milli maraqları Azərbaycanla əməkdaşlığı özündə ehtiva edir. Düşünürəm ki, Makron onun rəqibini dəstəklədiyi üçün Paşinyana dəstək verməyəcək”.
Politoloqun fikrincə, bütün bunlardan sonra Fransanın ən azından əvvəlki kimi Ermənistana qahmar çıxacağı real görünmür.
Vidadi ORDAHALLI
