Ermənistanın xarici işlər naziri Ararat Mirzoyan Moskva səfəri çərçivəsində KTMT-nin baş katibi Stanislav Zasla görüşüb.
Bu barədə Ermənistan Xarici İşlər Nazirliyi məlumat yayıb. Tərəflər KTMT-nin cari fəaliyyətinə, Kollektiv Təhlükəsizlik Şurasının qərarlarının icrasına və qarşıdan gələn tədbirlərin qrafikinə istinad ediblər. Ararat Mirzoyan təşkilatın böhrana cavab mexanizmlərinin təkmilləşdirilməsi üçün davamlı səylərin zəruriliyini vurğulayıb. Görüş zamanı Stanislav Zas KTMT zonasında təhlükəsizlik vəziyyəti və mövcud çağırışları təqdim edib, KTMT çərçivəsində aparılan danışıqların sənədlərinin razılaşdırılması prosesi barədə məlumat verib.
Həmsöhbətlər KTMT-yə üzv dövlətlər üçün mühüm əhəmiyyət kəsb edən digər regional və beynəlxalq məsələlərə toxunublar. Bildirilir ki, tərəflər Qrabağdakı Fərrux kəndi ətrafında yaranan vəziyyəti də müzakirə ediblər. Maraqlıdır ki, bu görüşdən sonra məlumat yayılıb ki, Rusiya sülhməramlıları məhz Fərrux kəndi ətrafına müşahidə kameraları yerləşdirməyə başlayıblar. Çox maraqlıdır, KTMT-nin Fərrux kəndinə nə aidiyyəti var ki, bu yöndə müzakirə aparır?
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, Ermənistan XİN rəhbəri Mirzoyanın KTMT baş katibi K.Zasla görüşdə Fərrux mövqelərindəki vəziyyətlə bağlı mövzunu müzakirə etməsi çox maraqlıdır:
“Həm ikinci Qarabağ müharibəsindən əvvəl, həm də müharibənin gedişatında Ermənistan rəhbərliyi dəfələrlə KTMT-dən dəstək alacağı, habelə təşkilatda Azərbaycan əleyhinə qərarların qəbul ediləcəyi barədə açıqlamalar verib. Lakin İrəvan rəhbərliyinin bu vədlərinin xülyadan başqa bir şey olmadığı üzə çıxdı. Hazırda KTMT-yə Ermənistan sədrlik edir. Bu status rəsmi olaraq 2021-ci ilin sentyabrında təşkilatın son iclasında Tacikistandan Ermənistana keçib, bu ilin sonunda isə Belarusa keçəcək. Təşkilata üzv ölkələr - Rusiya, Ermənistan, Belarus, Qazaxıstan, Qırğızıstan və Tacikistan əlifba sırası ilə sədrlik edir. Baş katib sədrlikdən asılı olmayaraq üç il müddətinə, sədrlik edən ölkənin nümayəndəsi isə Daimi Şuranın rəhbərinin dəyişdirilməsi ilə təyin edilir. Hazırda həmin vəzifədə Ermənistanın KTMT-dəki daimi nümayəndəsi Viktor Biyaqov, KTMT Kollektiv Təhlükəsizlik Şurasının sədri isə Ermənistan baş naziri Nikol Paşinyandır. Ermənistan bundan istifadə edib bəzi addımlar atmaq istəsə də, səyləri uğursuz olub. Ermənistan üçün vəziyyət həm də ona görə mürəkkəbdir ki, bir sıra KTMT üzv dövlətlərinin Azərbaycanla yaxşı müansibətləri var və öz siyasi iqtisadi maraqlarını Ermənistanın təhlükəsizlik problemlərinə qurban vermək istəmirlər. Buna baxmayaraq, biz zaman-zaman KTMT adından bizim mövqelərimizlə uzlaşmayan açıqlamaların verildiyinin şahidi oluruq. Bəllidir ki, adı KTMT olsa da, həmin təsisat tam olaraq Rusiyanın nəzarəti altındadır. Zasla görüşdən sonra sülhməramlıların Fərrux istiqamətində fəallıq göstərmələri Moskvanın tapşırığı əsasında baş tuta bilər. Qarabağ ərazisində atəşkəsə nəzarəti Türkiyə ilə Rusiyanın birgə təmsil olunduğu Birgə Monitorinq Mərkəzi həyata keçirirsə, sülhməramlıların bu addımı səlahiyyəti aşmaqdan başqa nəsə deyil. Bir daha qeyd edirəm ki, KTMT-nin Qarabağda baş verənlərlə bağlı vəziyyəti müzakirə etməyə heç bir haqqı və hüququ çatmır”.
Məhəmmədəli QƏRİBLİ
