Ermənistanda ABŞ əleyhinə etiraz aksiyası keçirilib. Bu barədə erməni mediası məlumat yayıb. Bildirilir ki, “Alyans” partiyasının gəncləri ABŞ-ın İrəvandakı səfirliyi qarşısında "fleşmob" şəklində aksiya təşkil ediblər.
Onlar ABŞ tərəfindən maliyyələşdirilən Ermənistandakı laboratoriyalarda biosilahların hazırlanmasını pisləyiblər. Sitat: “Bir neçə etirazçı rəmzi olaraq "Sem dayı"nın ulduz zolaqlı şlyapalarından taxıb, əleyhqaz geyinib. Bununla da etirazçılar, Ukraynada olduğu kimi, İrəvanda da bioloji silah hazırlamaq üçün erməni laboratoriyalarında təhlükəli patogenlərlə işləyə biləcəklərindən narahat olduqlarını bildiriblər". “Alyans” partiyasının gənclər birliyinin koordinatoru Denis Poqosyan deyib ki, Ermənistanda 12 bioloji laboratoriya var ki, onlardan 3-ü İrəvanda, qalanları isə regionlarda fəaliyyət göstərir: “Biz tələb edirik ki, Ermənistanda fəaliyyət göstərən və ABŞ tərəfindən maliyyələşdirilən bioloji laboratoriyalarda beynəlxalq monitorinq aparılsın... Biz bu laboratoriyalarda biosilahların hazırlanmasından şübhələnirik”. Fleşmob iştirakçıları qeyd ediblər ki, Ermənistan sınaq poliqonu deyil və ölkə əhalisi sınaq subyekti olmamalıdır. İştirakçılar “Ermənistan eksperimentlər üçün meydan deyil”, “Viruslara yox”, “Biosilahlara yox” şüarlarını səsləndiriblər. Aksiyanın təşkilatçıları deyib ki, Ermənistan kimi ölkədə biloji silah olmamalıdır.
Çox maraqlıdır, Ermənistanda ABŞ-ın bioloji labarotoroyaları varsa, Paşinyan onları niyə bağlamır? Yoxdursa, belə mitinqlərin keçirilməsinə niyə icazə verilir? Bütün bunlar Ermənistanın Rusiya ilə ABŞ-Qərb cütlüyü arasında manevr cəhdi sayıla bilərmi?
Azərbaycan Naminə Alyans Partiyasının rəhbəri Abutalıb Səmədov “Bakı-Xəbər”ə açıqlamasında bildirdi ki, ABŞ-ın Ermənistanda bioloji labarotoriyalarının olması ilə bağlı Rusiya mətbuatında da çoxsaylı materiallar dərc edilib: “Hətta iddia olunub ki, güya belə laboratoiriyalar bizdə də var. Bunların bəzilərini ABŞ təkzib edib, bəziləri ilə bağlı heç bir cavab yoxdur. Bu çox ciddi məsələdir və araşdırılmalıdır ki, belə biolaboratoriyalar varmı və vardırsa nə işlə məşğul olurlar? Ermənistan çox ikiüzlü mövqe tutub. Dalbadal Rusiyanı müdafiə edən mitinqlər keçirilir. Bunu Rusiya KİV-i maksimum şişirtməyə çalışır. ABŞ səfirliyi önündə isə etiraz aksiyaları keçirilir. BMT-də Rusiyanı İnsan Haqları Komisiyasından çıxarmaq istəyəndə, keçmiş ittifaq ölkələrinin çoxu Rusiyanı dəstəklədi. Azərbaycan səsvermədə ümumiyyətlə iştirak etmədi. Son illər Azərbaycan Rusiyanı hədəfə alan heç bir səsvermədə iştirak etmir. Ermənistan isə daima Rusiyanı müdafiə edən xətt yürüdüb. Maraqlıdır ki, mart ayındakı iki səsvermədə İrəvan bitərəf qaldı. Sonuncu səsvermədə isə Azərbaycanın davranışını təkrarladı, yəni səsvermədə iştirak etmədi. Ermənistanın mövqeyi Rusiyada diqqətlə izlənir. Ermənistan son vaxtlar belə ziqzaqlı gedişləri çox edir. Yəqin ki, Paşiniyanın Moskvada Putinlə görüşündə bütün bu məsələlərə aydınlıq gətiriləcək”.
Məhəmmədəli QƏRİBLİ
