ATƏT-in Minsk Qrupunun həmsədrləri olan ABŞ və Fransa bu format çərçivəsində Rusiya ilə əlaqə saxlamaqdan imtina ediblər. Bunu Rusiyanın xarici işlər naziri Sergey Lavrov erməni həmkarı Ararat Mirzoyanla birgə keçirdiyi mətbuat konfransında deyib:
“ATƏT-in Minsk Qrupu üçlüyünün gələcək taleyinin necə olacağını deyə bilmərəm. Çünki rusofobiyanın təsiri altında olan amerikalı və fransalı tərəfdaşlarımız Rusiya ilə təmasları ləğv etməyə can ataraq, ATƏT-in Minsk Qrupunu da ləğv ediblər. Bu format çərçivəsində bizimlə əlaqə saxlamaqdan imtina ediblər”.
XİN rəhbəri bildirib ki, Rusiya Azərbaycanla Ermənistan arasında münasibətlərin normallaşmasına, habelə Azərbaycan, Rusiya və Ermənistan arasında üçtərəfli formatda əldə olunmuş razılaşmaların yerinə yetirilməsinə tərəfdar olaraq qalmaqdadır.
Belə gərgin münasibətlərin hökm sürdüyü bir təsisat necə vasitəçilik edə bilər?
Politoloq Elşən Mustafayev “Bakı-Xəbər”ə açıqlamasında bildirdi ki, ATƏT-in Minsk Qrupu adlı təsisat özünü doğrulda bilmədi: “Yarandığı müddətdən indiyə kimi heç bir əməli addıma imza atmadı. Onun bütün vasitəçilik səyləri səmərəsiz oldu. Yalnız növbətçi səfərləri və bəyanatları ilə yadda qaldı. Əslində, Minsk Qrupu çoxdan dağılıb, formal olaraq görsənirdi. Onun fəaliyyətinə ən doğru qiyməti sabiq həmsədrlərdən olan Yanqland vermişdi. O, demişdi ki, işləri yaxşı yeyib içmək, bahalı restoranlarda qalmaqdan başqa heç nə olmayıb. Həmin etirafın özü Minsk Qrupunun fəaliyyət deyil, baş girələməklə məşğul olduğunu isbatlayırdı. Sonda biz gördük ki, Azərbaycan öz gücünə ədaləti bərpa etdi. Ancaq Minsk Qrupu hələ də əl çəkmir. İstəyir ki, prosesdə vasitəçiliyi davam etdirsin. Əsas məqsədləri də budur ki, Qarabağdakı ermənilərə status məsələsini qabartsınlar. Minsk Qrupunun fəaliyyətinin davamını Ermənistan istəyirdi, biz yox. Lavrovun belə bir bəyanatı məhz Brüssel görüşündən sonra verməsi təsadüfi deyil. Görünən budur ki, artıq Ermənistanla Azərbaycan arasındakı aktiv vasitəçilik səyləri Rusiya ilə Avropa Birliyinin əlinə keçir. Minsk Qrupunun özünə vasitəçi lazımdır ki, oradakı dövlətləri bir-biri ilə barışdırsın”.
Məhəmmədəli QƏRİBLİ
