“Şahbaz Quliyev aktyor, fırıldaqçıdır. Bundan istifadə edib dövləti biabır edir, cənab Prezidentin gördüyü işlərə kölgə salır". Bu sözləri altı il yarım erməni hərbçilərinin girovluğunda olan Dilqəm Əsgərov həbsxana yoldaşı Şahbaz Quliyevin mətbuatda yayılan görüntüsünə münasibət bildirərkən deyib.
O bildirib ki, erməni mətbuatı da, Ş.Quliyevin biabırçılıqlarından yazır:
"Siz ondan soruşun hansı hərbi hissədə xidmət etmisən ki, qazilik tələb edirsən? Onun hərbi bileti də yoxdur. Şahbaz Quliyev deyir ki, mənim ailəm dağıldı. Guya ailəsi Kəlbəcərə görə dağılıb. Bu. adamın üçüncü evliliyidir. Əvvəl Goranboydan birini almışdı, sonra Rusiyadan bir qadın tutub gətirdi, indi də başqa bir qadın tapıb.
Ona sual verin ki, səni Qarabağa kim göndərib? Dövlət, prokuror? Heç kim. Onu mən aparmışam".
D.Əsgərov deyib ki, Ş.Quliyevin rayonda üçotaqlı evi var: "Onun Şəmkirin Qapanlı kəndində üçotaqlı boş evi var. Evi qohumlarına verib. İndi yalandan deyir ki, mən işıqsız, qazsız qalmışam. O, Müşfiqdə (Müşfiqabad qəsəbəsi-red.) axırıncı binanın ikinci, ya da üçüncü blokunda qalır. Orada da işıq kartladır. Karta pul vurursan, işıq verirlər.
Ona hansı əsasa görə ikinci qrup əlillik verilib? O nə iş görüb? 200 manat alır. Adını heyvandarlığa yazdırıb, ona inək, qoyun veriblər".
D.Əsgərov deyib ki, Ş.Quliyev mətbuatı aldadır: "Gələn gündən demişdim ki, o adam həbs edilməlidir. Onun haqqında araşdırma aparılmalıdır. Şahbaz yararsız bir adamdır.
O məni ermənilərə necə satdı, məhkəmədə üzümə durdu. O gün etiraz edəndə necə çığırırdısa, vicdanıma and olsun, məhkəmədə də mənim üzərimə elə çığırırdı".
Göründüyü kimi, iki keçmiş girov arasında baş verən “atışma” bütün əndazəni aşıb. Ortada bir-birinin ünvanına ciddi ittihamlar da səsləndirirlər. Bu adamlarla bağlı hansı formada hüquqi ölçü götürülməlidir ki, ölkənin adını batırmasınlar?
Elşən Musayev: “Adətən əsirlikdən geri qaytarılanlarla bağlı müəyyən filtrasiya tədbirləri həyata keçirilir”
Böyük Azərbaycan Partiyasının sədri Elşad Mustafayev “Bakı-Xəbər”ə açıqlamasında bildirdi ki, bu adamlar arasında hazırda nə baş verdiyini anlamır: “Bir onu bilirəm ki, Azərbaycan cəmiyyəti, dövləti onları ciddi müdafiə etdikdən sonra geri qaytara bildi. Adətən əsirlikdən geri qaytarılanlarla bağlı müəyyən filtrasiya tədbirləri həyata keçirilir. Əminəm ki, bizdə də bu olub. Yəqin ki, hazırda səsləndirilən ittihamlar orda da deyilib. Əlaqədar qurumlar belə qərar qəbul ediblərsə, deməli, onlardan hansınınsa azadllqda qalması təhlükə törətmir”.
Mehman Muradlı: “İctimai qınaqla onlara səhv etdiklərini anlatmaq gərəkdir”
Hüquqşunas Mehman Muradlı “Bakı-Xəbər”ə açıqlamasında bildirdi ki, bu məsələdə hüquqidən daha çox mənəvi məsuliyyət məsələsi var: “Azərbaycan tərəfi böyük səylərdən sonra bu iki şəxsi vətənə qaytara bildi. Onlarla bağlı hüquqi, əməliyyat tədbirlərinin hamısı həyata keçirilib. Çünki belə detallar indiyə qədər araşdırılmamış qala bilməzdi. İndi bu adamlar ayıb edib, yerlərində oturub, sakit həyatlarını yaşamalıdırlar. Kim-kimin əsirlikdə üstünə qışqırıbsa, bu o anlama gəlmir ki, təzədən həmin adamla bağlı araşdırma aparılmalıdır. İctimai qınaqla onlara səhv etdiklərini anlatmaq gərəkdir”.
Məhəmmədəli QƏRİBLİ
