Avropa Birliyi xarici işlər naziri Cosef Borell AB-ni müharibəni bitirmək üçün Ukraynaya daha çox silah göndərməyə çağırıb.
Bunu Avropa Parlamentində çıxış edən Borell Avropa Birliyinin muharibə başlayandan Ukrayna və Rusiyaya xərclədiyi maliyyəni müqayisə edərkən deyib. Avropa Birliyinin Rusiyaya 5-ci sanksiya paketinin müzakirəsi zamanı AB rəsmisi bildirib ki, onlar Ukraynanı silahlandırmağa davam etməlidir: “Bizə daha az alqış, daha çox yardım etmək lazımdır”.
O, Avropa Birliyinin Ukrayana bir milyard avro yardım ayırdığını, ancaq Rusiyaya Avropanın aldığı qaz müqabilində 35 milyard ödədiklərini diqqətə çatdırıb:
"Müharibə başlayandan Putinə aldığımız təbii qaza görə hər gün bir milyard ödəyirik. Müharibə başlayandan biz ona 35 milyard avro vermişik. Bunu Ukraynaya silah-sursat üçün verdiyimiz 1 milyardla müqayisə edin”.
Hazırda Baltik ölkələri və Polşa Rusiyanın əsas gəlirli neft və qaz ixracatına sanksiya qoyulmasını istəyir. Ancaq Birliyin digər ölkələri – Almaniya, Avstriya və Macarıstan buna etiraz edir.
Qeyd edək ki, Avropa Birliyi təbii qaz ehtiyacının 41, neft ehtiyacının isə 27%-ni Rusiyadan alır.
Bu fakt Avropanın Ukraynaya etdiyi yardımın yetərincə olmadığını sübut edirmi?
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki,
artıq Ukraynanın Qərbdən asılı qalmaqdan başqa çıxış yolu yoxdur: “Ukrayna ya siyasi oriyentasiyasını dəyişməklə Rusiyaya tərəf meyllənməli, ya da bundan imtina edərək Qərbin ətəyindən yapışmalı, xilasını axtarmalıdır. Mövcud müharibə Zelenskinin bəxtinə tuş gəldi, amma onun bundan sonra nə qədər dayana biləcəyi də suallar doğurmaqdadır. Hətta müharibənin qələbə ilə başa çatması belə ölkəyə, xalqa dəymiş ziyanın miqyasının aradan qaldırılmasına səmərə verməyəcək, bunun üçün uzun illər tələb ediləcək. Fakt isə budur - əfsuslar olsun ki, Ukrayna torpaqları yanmaqda davam edir.
Göründüyü kimi, Qərb özünün müharibə yardımlarını Ukraynaya səxavətlə təqdim edir. Deyir ki, gedin son adamınıza qədər dünyanın ikinci ən güclü ordusu olan Rusiyaya qarşı döyüşün və biz sizin arxanızdayıq.
Onda digər bir sual yaranır: “Ukraynanın yanındasınızsa, nəyə görə müharibəni dayandırmağa az da olsa səbəb yarada biləcək digər təcili siyasi qərarları vermirsiniz? Məsələn, nəyə görə Ukraynanın prezidenti Vladimir Zelenskinin dəfələrlə təkrar etdiyi, hətta tələb etdiyi NATO faktorunu mexanizm olaraq işə salmırsınız? Axı o müharibə başlamazdan əvvəl də, indi də ölkəsinin NATO-ya təxirəsalınmaz şəkildə üzv götürülməsini tələb edib. ABŞ isə “nüvə müharibəsi təhlükəsi” iddiasını ortaya atmaqla Zelenskinin tələbini, sözün əsl mənasında, rədd edib, bu gün də etməkdədir. Dəfələrlə NATO-dan hava məkanını bağlamağı xahiş etsə də, bunu da etmədilər. Müharibənin gedişində belə Qərbdən Rusiyaya maliyyə axınının davam etməsi bir çox mətləblərə aydınlıq gətirmiş olur. Belə çıxır ki, Qərb Rusiyanın başının Ukraynada daha çox qarışmasında maraqlıdır. Dağılan isə Ukrayna, əziyyət çəkən Ukrayna vətəndaşlarıdır”.
Məhəmmədəli QƏRİBLİ
