Ermənistanın müdafiə naziri Suren Papikyan Böyük Britaniyanın Ermənistandakı fövqəladə və səlahiyyətli səfiri Con Qallager ilə görüşüb. Görüşdə bir sıra məsələlər müzakirə olunub, əsas müzakirə mövzusu isə Qarabağla bağlı olub. Fürsətdən istifadə edən Ermənistan müdafiə naziri Azərbaycanın ünvanına əsassız fikirlər səsləndirib.
S.Papikyan iddia edib ki, guya Azərbaycan tərəfinin hərəkətləri regional sabitlik və təhlükəsizliyə xələl gətirdiyi üçün əlavə tədbirlər görülməlidir. Bu səbəbdən nazir vəziyyətin gərginləşməsinin qarşısını almaq üçün beynəlxalq ictimaiyyətin tədbirlər görməsinin vacibliyini vurğulayıb. Öz növbəsində, səfir Böyük Britaniyanın ATƏT-in Minsk Qrupu formatı çərçivəsində gərginliyin azaldılması və münaqişənin sülh yolu ilə həlli səylərini dəstəklədiyini bəyan edib.
Azərbaycanla geniş əlaqələrə malik olan Böyük Britaniyanın Minsk Qrupuna belə önəm verməsi təəssüf doğurur. Nəzərə almaq lazımdır ki, İngiltərə Avropa İttifaqından çıxsa da, bu qurumun tərəflər arasında vasitəçi kimi prosesdə iştirak etməsi Londonun maraqlarına daha uyğundur, nəinki MQ. Ən azından ona görə ki, MQ-də Böyük Britaniyanın əzəli rəqibi Rusiya təmsil olunur. O baxımdan Avropa İttifaqının Azərbaycan və Ermənistan arasında uğurlu vasitəçilik etməsi fonunda Britaniya səfirinin yersiz formada Minsk Qrupunu gündəmə gətirməyə çalışmasında məqsəd nədir?
“MQ-nin fəaliyyəti rəsmən dayandırılmasa, bu problemlər olacaq”
Sözügedən məsələ ilə bağlı fikirlərini “Bakı-Xəbər”lə bölüşən Demokratik Dəyişim Partiyasının Təşkilat Komitəsinin sədri Əli Mustafayev Britaniyanın Minsk Qrupuna önəm verməsini müəyyən amillərlə əlaqələndirdi: “Məsələ ondadır ki, Böyük Britaniya ATƏT-in Minsk Qrupunun üzvüdür, amma neçə illərdir Avropa İttifaqında təmsil olunmur. Səbəblərdən biri bununla bağlıdır. Hesab edirlər ki, Aİ formatında vasitəçilik İngiltərədən yan keçir. Düzdür, Britaniya MQ-nin üzvü olsa da, həmsədr dövlət deyil. Üstəlik, üzv dövlət olaraq passiv mövqedən çıxış edib. Buna rəğmən, Londonda düşünürlər ki, həmsədrlər təşəbbüsü ələ alsa, MQ-nin 11 üzvündən biri olan Britaniya da prosesdə bu və ya digər dərəcədə iştirak edəcək. Ancaq Britaniya anlamalıdır ki, MQ çoxdan tükənib. Lakin hesab edirəm ki, MQ məsələsi bir müddət müzakirə obyekti olacaq. Niyə? Ona görə ki, bu qurumun rəsmi statusu müəyyənləşib. Yəni MQ ilə bağlı ATƏT-in və BMT-nin qərarı var. Ancaq problem ondadır ki, ATƏT-in Minsk Qrupunun fəaliyyətinin sonlandırılması ilə bağlı hüquqi-siyasi qərar yoxdur. Ona görə də yeri gəldi-gəlmədi MQ-ni gündəmə gətirirlər. Deməyim odur ki, MQ-nin fəaliyyəti rəsmən dayandırılmasa, bu problemlər olacaq. Ancaq istənilən halda, işğala son qoyulub, Ermənistan Azərbaycanın ərazi bütövlüyünü tanımağı nəzərdən keçirir, bu baxımdan MQ-yə ehtiyac yoxdu. Başqa bir tərəfdən, vasitəçilik baxımından Aİ daha cazibədar görünür. Bunu proseslər də göstərir. Bu qurum MQ-dən fərqli olaraq tərəfsiz mövqedən çıxış edir. Üstəlik, Aİ-nin olması Rusiyaya alternativdir”.
O üzdən, Əli Mustafayev hesab edir ki, bütün bu amilləri London nəzərə almalıdır.
Vidadi ORDAHALLI
