Separatizmin əsas dəstəkləyicilərindən biri olan Ermənistan Rusiyaya yarınmaqda, quyruq bulamaqda davam edir. Son günlər bunu daha çox büruzə verən Ermənistan bir neçə gün əvvəl “Krım günləri” keçirməklə Rusiyanın təcavüzünə dəstək verdiyini sübut etdi. Yeni yayılan məlumata görə isə,
Ermənistanın Dilican şəhəri Krımın Feodosiyası ilə “qardaşlaşıb”. Krımın Feodosiya şəhəri ilə Ermənistanın Dilican şəhəri arasında “qardaşlaşmış şəhər” münasibətlərinin yaradılması haqqında saziş imzalanıb. Bu barədə Krımın "İqtisadi İnkişaf Nazirliyi"nin mətbuat xidməti məlumat yayıb.
Dilican adından sazişi şəhərin meri David Sarkisyan imzalayıb. Krımın “baş nazir”inin müavini, "respublika"nın maliyyə naziri İrina Kiviko bildirib ki, imzalanmış saziş Krım və görkəmli rəssam İvan Ayvazovskinin doğulduğu, ən böyük erməni icmasının yaşadığı və erməni kilsələrinin fəaliyyət göstərdiyi Feodosiya üçün əlamətdar hadisədir.
“Dilicanın Krımın Feodosiya şəhəri ilə “qardaşlaşdığının” élan edilməsi gülüncdür”
AMEA-nın Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə bildirdi ki, Ermənistan təxribatlara yol verməklə və separatizmə, təcavüzə dəstək verməklə öz mahiyyətini, xislətini, bir dövlət kimi siyasətini ortaya qoyur. “Ermənistanın bu hərəkətləri şıltaqlıqdan, kimlərisə narahat etmək istəyindən qaynaqlanır. 44 günlük müharibəyə qədər özlərindən miflər yaradıb eyforiyaya düşmüşdülər ki, guya bunlar da “söz sahibidir”, ordularından, hərbi qüdrətlərindən dəm vururdular, qondarma tarixlərindən danışırdılar. Çox təəssüflər olsun ki, bəzi dövlətlər də Ermənistanın bu cür hərəkətlərinə şərait yaradırdı ki, danışıb özünü gülünc etsin. Bu gün Ermənistan elə vəziyyətdədir ki, nə düz-əməlli ordusu, nə iqtisadiyyatı, nə də normal siyasəti var. Ermənistan bütün səhvlərini anlayıb siyasətini dəyişməlidir, düşmən münasibətlərə, separatizmə, təcavüzə dəstək verməyə son qoymalıdır. Amma bu ölkənin başında duranların özləri müstəqil adam olmadıqları, onun-bunun əlində oyuncaq olduqları üçün kim nə deyir onunla hərəkət edirlər. Ermənistan müxalifətində olanlarla hökumətdə olanların arasında heç bir fərq yoxdur, hamısı xəstə təfəkkürlüdür, təxəyyüllə yaşayırlar, avantüristdirlər. Düz-əməlli siyasəti, iqtisadiyyatı, gücü olmadığı halda Ermənistanın hoqqabazlıq, kəndirbazlıq etməsi qəribə görsənir. Biz tarixçilər bilirik ki, ermənilər hansı dövlətin tərkibində olubsa hoqqalar çıxarıblar, Romanın, Bizansın, Osmanlının başına oyunlar açıblar. Gürcüstanla münasibətləri də göz qabağındadır. Ermənistan Rusiyanın forpostudur və bunu da heç də gizlətmir. Ermənistan Rusiyaya arxayın olub bölgədəki məsələlərə müdaxilə etmək istəyir, Krımla, Donbasla, Luqansk, Abxaziya, Cənubi Osetiya ilə bağlı “rəy” bildirir, onlara dəstəkçi olur. Rusiyanın əlində oynatdığı Ermənistan adlı oyuncaq bu ölkənin bütün işlərinə yaramağa çalışır. Ermənistanın Krım “respublikasına” “qucaq” açması, “Krım günləri” keçirməsi, indi də Dilicanla Feodosiyanın “qardaşlaşdığını” élan etməsi onun mahiyyətini göstərir. Ermənistanın Krım “respublikasına” isti münasibəti Rusiyanın təcavüzünü dəstəkləmək, Ukrayanaya və başqa ölkələrə acıq verməkdir. Yadınıza gəlirsə, o vaxt Ermənistan Krımın Ukraynadan ayrılıb Rusiyaya qatılması üzrə referendumun nəticələrini tanımışdı. Elə o dövrdə də Ermənistan Rusiyanın buyruqlarını yerinə yetirib bu addımı atmışdı. Dilicanın Krımın Feodosiya şəhəri ilə “qardaşlaşdığının” élan edilməsi gülüncdür. Ermənistan özünü ciddi bir dövlət kimi tanıtmaq istəyir, özünü təbliğ etmək məqsədi güdür, amma nail ola bilməyəcəklər. Guya Krımda erməni icması, erməni kilsəsi çox güclüdür. Erməni Krıma dünən gedib çıxıb. Krımın erməniyə, rusa nə aidiyyəti var? Krım da, Dilican da qədim türk torpağıdır”.
Q.Hacıyevin sözlərinə görə, Ermənistan heç nəyi dəyişdirməyə qadir bir ölkə deyil, yalnız ortada oyun oynayıb öz xeyirlərini güdməkdən başqa heç nəyə yaramırlar. “Ermənistanın Krımla bu qədər yaxınlaşması heç xeyirli deyil. Mən buna inanıram ki, Ermənistan yenə də Rusiyanın diqqətini İrəvana yönəltmək istəyir və Qarabağda münaqişənin qızışdırılmasına nail olmağa çalışır. Ermənistan revanşizimi həyata keçirmək üçün hər cür oyunlara gedir. Ermənistanın ortaya atdığı “qardaşlıq”, “dostluq”, Feodosiya ilə Dilicanın “qardaşlaşması”, Krımda erməni dini icmasının, Qriqoryan kilsəsinin olması və sair hamısı boş bir şeydir. Krımın özü indi hansı vəziyyətdədir ki, Ermənistana dayaq dursun? Krımda ermənilərin sayını şişirtmək istəyirlər, amma bütün dünya bilir ki, orada ən çox türklər, tatarlar yaşayır. Vaxtilə Sovet hökuməti Krım türklərinə dəfələrlə divan tutub, indi də onların yerinə-yurduna su tökürlər. Ermənistanın özünü Krıma yamaq etməsi türk xalqlarını narahat etmək, Rusiyaya yaltaqlanmaq anlamına gəlir”- deyə Q.Hacıyev bildirdi.
İradə SARIYEVA
