Məlum olduğu kimi, Avropa İttifaqı (Aİ) Şurasının prezidenti Şarl Mişel Azərbaycan Prezidenti İlham Əliyev və Ermənistanın Baş naziri Nikol Paşinyanla ikinci üçtərəfli görüşün yekunlarına dair bəyanat yayıb.
Bəyanatda bir sıra məsələlər öz əksini tapıb. Aİ Şurası Prezidenti vurğulayıb ki, təhlükəsizliyin təmin olunması üçün qüvvələrin düzgün məsafədə saxlanmasının təmin edilməsi insidentlərin qarşısının alınmasında və gərginliyin azaldılmasında mühüm elementdir: “Qüvvələrin düzgün məsafədə saxlanması insidentlərin önlənməsi və gərginliyin azaldılmasının əsas elementidir”.
Prezident Mişel Aİ-nin tövsiyə və dəstək verməyə hazır olduğunu vurğulayıb.
Mişelin qüvvələrin məsafəyə çəkilməsi ilə bağlı fikrinin mahiyyətinin nə demək olduğu maraq doğurur. Çünki bu, ermənilərin indiyə qədər sevə-sevə təkrarladığı o fikrin, tezisin davamı deyilmi ki, Azərbaycan sərhədlərdəki müəyyən mövqelərdən geri çəkilməlidir? Axı Azərbaycan heç kimin mövqelərinə keçməyib. Yəni razılaşdırılmış mövqedən qabağa getməyib. Belə olan halda Azərbaycan hara çəkilməlidir? Əgər doğurdan da sərhədlər boyunca və sərhədlər yaxınlığında təhlükəsizliyə təminat yaratmaqdan söhbət gedirsə, bunun ayrı formalarını da tapmaq olar. Məsələn, Ermənistana tapşırmaq olar ki, atəşkəsi pozmayın, sərhədləri keçməyin. Bunun üçün Silahlı Qüvvələri geriyə çəkmək nə üçündür?
“Qüvvələrin geri çəkilməsi o zaman olur ki, sərhədlərin...”
Sözügedən məsələyə aydınlıq gətirən hərbi ekspert Ramil Məmmədli hesab edir ki, Ş.Mişelin bəyanatda sərhədlərlə bağlı səsləndirdiyi fikirlər Ermənistanı sakitləşdirməyə hesablanıb: “Çox güman ki, bu məqsədlə həmin fikirlər bəyanatda öz əksini tapıb. Nəzərə almaq lazımdır ki, Brüssel görüşündə qəbul olunan qərarlar Azərbaycanın mənafeyinə uyğundur. Ermənistan sərhədlərlə bağlı ötən ilin mayından hay-küy qaldırsa da, bu iddiaların hüquqi əsası yoxdur. Zatən bunun hansısa hüquqi əsası olsaydı, Ermənistanın təmsil olunduğu Kollektiv Təhlükəsizlik Müqaviləsi Təşkilatı məsələyə müdaxilə edərdi. Müdaxilə etmədi ona görə ki, ortada olan xəritələr Ermənistanın iddialarının əksini göstərirdi. Ermənistan süni şəkildə sülh sazişinin imzalanmasını uzatmaqdan ötrü belə əsassız iddialar ortaya atdı ki, guya Azərbaycan onların sərhədini keçərək qüvvələrini irəli çəkib. Əslində bütün bunlar yalan idi. Qüvvələrin geri çəkilməsi o zaman olur ki, sərhədlərin delimitasiyası, demarkasiyası başa çatır və tərəflər sərhəddə neytral ərazi saxlamaqdan ötrü bərabər şəkildə geri çəkilir. Məsələn, sərhəddə hər iki tərəf 500 metr geri çəkilir, ortada qalan sahə neytral ərazi sayılır. Bu baxımdan deməzdim ki, J.Mişelin məlum fikirləri Azərbaycana ünvanlanıb”.
Bir sözlə, hərbi ekspert hesab edir ki, narahatlığa elə bir əsas yoxdur.
Vidadi ORDAHALLI
