Tarixin səhifələrində nəinki iz salmaq, heç onu sadəcə vərəqləmək belə hər adama nəsib olmur. Ərinməyin, dünyanın istər fəlsəfi, istər mədəni, istərsə də iqtisadi inkişafını əks etdirən kitabları vərəqləyin, təkamül tarixinə baxın. Paradokslarla, absurdlarla, bəzən isə paralellərlə zəngin olan müxtəlif zaman kəsiklərində müxtəlif şəxsiyyətlər xalqı ağır durumdan çıxarıb onu inkişafın hamar yoluna gətirirlər. Ulu öndərdən sonra bu missiyanı Azərbaycan Respublikasının Prezidenti cənab İlham Əliyev davam etdirir.
Ölkə Başçımızın 2018-ci il aprelin 11-də Azərbaycan Respublikasının Prezidenti seçilməsi ilə əlaqədar andiçmə mərasimində dediyi bu sözlər indiki kimi yadımdadır: - «Biz gələcəyə baxmalıyıq və baxırıq. Növbəti illərdə görüləcək işlər haqqında bizim çox aydın təsəvvürümüz, planlarımız, proqramlarımız var... Ona görə mən əminəm ki, bütün Azərbaycan xalqı və biz hamımız gələcəyə çox böyük nikbinliklə baxırıq. Hamımızın amalı ondan ibarətdir ki, ölkəmiz daha da güclənsin, daha da qüdrətli dövlətə çevrilsin, Azərbaycan vətəndaşları daha da yaxşı yaşasınlar.»
Bəli, bu elə belə də oldu. Bu illər ərzində dünyada sayılıb seçilən bir ölkə kimi tanındıq. Ən qüdrətli lider kimi cənab İlham Əliyevi əslində bütün görkəmli şəxsiyyətlər, siyasətçilər qəbul edirlər. 2003-2018-ci illər ərzində Prezident İlham Əliyevin rəhbərliyi altında həyata keçirilən xarici siyasət və nəticəyə hesablanmış diplomatik uğurlar Azərbaycanın BMT, AŞ, ATƏT, NATO və bütün digər nüfuzlu beynəlxalq təşkilatların yüksək tribunasından daha qətiyyətlə çıxış etməsi və bir çox məsələlərdə beynəlxalq aləmin onun rəyinə hörmətlə yanaşması üçün münbit şərait yaratmışdır. Və bu illər milli maraqların qorunmasına xidmət edən strateji nailiyyətlər dövrüdür. Prezident İlham Əliyev milli ideya ətrafında xalqı birləşdirib. Azərbaycançılıq məfkurəsi Azərbaycanda tam bərqərar olub. Qeyd olunan illər eyni zamanda Azərbaycan Ordusunun sürətli inkişaf dövrüdür. Təchizat, silah-sursat, texnika, döyüş qabiliyyəti baxımından ordumuz güclü ordular sırasına daxil olub. 2016-cı ilin aprel döyüşləri bütün dünyaya Azərbaycan Ordusunun gücünü, qələbə əzmini, ədalətin bərpa olunacağını göstərdi. Həmçinin, həmin illər ərzində əldə olunmuş iqtisadi inkişaf və aparılan effektiv xarici siyasət nəticəsində Ermənistan bütün regional layihələrdən təcrid olunub.
Bəli, cənab İlham Əliyevin prezidentliyi dövründə ölkəmiz böyük inkişaf yolu keçib, Azərbaycan dövlətçiliyinin əsasları ciddi şəkildə möhkəmlənib, dövlətimiz güclənib, onun qüdrəti və iqtisadiyyatı daha da artıb, Azərbaycanın beynəlxalq müstəvidə mövqeyi xeyli dərəcədə güclənmişdir. İnsan amili, xalqın rifahı və milli maraqlar dövlət siyasətinin strateji prioritetləri olmuşdur.
Ömər Xəyyamın az qala aforizmə çevrilmiş bir cavabsız sualı var:
Mənsiz də dünyanın işi keçərmiş,
Əcaba, nə üçün cahana gəldim.
Əslində bu sualın da cavabı var. Doğrudan da dünya bizsiz keçinə bilərdi. Bizsiz də hər yoxluqla barışan dünya gərdişindən qalmayacaqdı. Bunu danmağa ehtiyac yox. Amma bu da var ki, Heydər Əliyev olmasaydı, daha sonra onun varisi İlham Əliyev Azərbaycan xalqına rəhbərlik etməsəydi çox da uzaq olmayan keçmişimizdə, Azərbaycanın məhvinə «bu gün, sabahlıqdır» diaqnozu qoyan daxili və xarici düşmənlərin sevincdən parıldayan gözləri qarşısında onlar qeybdən yaranmış kimi özlərini yetirməsəydi bu günkü günümüzü necə təsəvvür etmək olardı. Və bu günkü günümüz göz qabağındadır. Bir zamanlar elimizin, obamızın ağsaqqalları, ağbirçəkləri ömrün gilə-gilə əriyib tökülən anlarına baxıb deyərdi. Ötən günə gün çatmaz calasan günü günə. İndi isə belə deyirik, bax, günün bu günündə, saatın bu saatında xoş müjdələrlə bəzənmiş, Zəfər naxışları ilə rənglənmiş elə bu günün bəxtiyarlığında, aydınlığında yaşayırıq. Bu gün ötən çağların yüzünə dəyər. Bir şərtlə ki, yaşadığımız bu günlərdə olduğu kimi, Qələbəni qələbəyə, uğurlarımızı uğurlara calaya bilək. Təki ürəklərdə qələbə əzmi, Vətən torpağının hər qarışını gülüstana çevirmək istəyi beləcə sinəmizi qabartsın.
Platonun bir sözü var:- «Dünyada ən dadlı şey həqiqəti söyləməkdir.» Və elə bu ləzzətlə də cənab Prezidentimizin andiçmə mərasimindən bəri əldə etdiklərimiz saysız-hesabsız uğurların qüruru köksümüzə sığmır. Ölkəmizin Başçısı sanki zamanla yarışa çıxıb. Bəli, sükanı möhkəm əllərdə olan ölkəmiz zamanla yarışır, zamanla ayaqlaşır.
Ulu öndərimiz bu fikirlərində necə də haqlı idi: «İanıram ki, mənim axıra çatdıra bilmədiyim tale yüklü məsələləri, planları, işləri sizin köməyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm.»
Ümummilli liderimizin peyğəmbərcəsinə söylədiyi bu fikirlər sözün əsl mənasında bütün reallığı ilə öz təsdiqini tapdı. Xalqın iradəsi ilə Prezident seçilən çox hörmətli İlham Əliyev ulu öndərin kursunu uğurla davam etdirərək Azərbaycanı dünyanın sayılıb seçilən dövlətləri çərçivəsində addımlaması üçün əlindən gələni əsirgəmir. Artıq müstəqil Azərbaycan nəinki regionda hətta dünyada belə keçərli söz sahibinə çevrilmişdir.
Təqdirəlayiq haldır ki, cənab İlham Əliyev öz diplomatik siyasi imkanlarından ölkəmizin milli maraqları naminə maksimum yararlanmaq məharətinə malikdir. Böyük azərbaycanlı, qayğıkeş dövlət başçısı, bacarıqlı siyasətçi, əvəzedilməz lider, işıqlı insan, Müzəffər Ali Baş Komandan kimi dəyərləndirdiyimiz və sevdiyimiz İlham Əliyevin 2018-ci il aprelin 11-də andiçmə mərasimində dediyi bütün fikirlər artıq Azərbaycan xalqının bu gün yaşadığı reallıqdır.
Əminə YUSİFQIZI, Respublikanın əməkdar jurnalisti
