Rusiya separatçı “Luqansk Xalq Respublikası” və “Donetsk Xalq Respublikasının” “müstəqilliyini” tanıdıqdan sonra sözügedən qondarma qurumların Rusiyaya birləşdiriləcəyinə dair informasiyalar yayılır. Bu isə digər separatçı rejimlərin də “tərpənməsinə” səbəb olub. Son günlər Cənubi Osetiya, Abxaziya separatçıları ilə yanaşı Qarabağdakı separatçılar da ümidləniblər ki, onlar üçün də belə bir “şərait” yaranıb.
Hazırda müvəqqəti olaraq Rusiya sülhməramlılarının nəzarətində olan Azərbaycanın Qarabağ bölgəsinin bir hissəsində mövcud olan separatçılar “yeni arzular”səsləndirirlər. Hazırda ermənilərin kompakt yaşadığı Əsgəran rayonunun keçmiş “başçısı” Sasun Barseqyan Qarabağda Rusiyaya birləşməklə bağlı referendum keçirməyə çağırış edib. O deyib ki, indiki reallıqda Ermənistan hökuməti “Arsax”ın “təhlükəsizlik təminatından” boyun qaçırır. “Biz fürsətdən istifadə edib işçi qrupu yaratmalıyıq və Rusiyaya birləşmək üçün qərar qəbul etməliyik”. Barseqyan iddia edib ki, bu təklifi təsadüfi deyil, çünki Gürcüstanın Cənubi Osetiya separatçı qurumu Rusiyaya birləşmək üçün tam qərar qəbul edib.
Göründüyü kimi, separatçılar yenə də öz çirkin niyyətlərindən əl çəkmək istəmirlər, yeni oyunlar qururlar və “referendum arzusu” da bu oyunlardan biridir.
“Referendumlardan” cərənləyən separatçıların, qanunsuz erməni hərbi birləşmələrinin ərazilərimizdən rədd edilmələri üçün sayılacaq zamanlar qalıb...”
Siyasi ekspert Rövşən Rəsulov baki-xeber.com-a şərhində bildirdi ki, Azərbaycanın Qarabağ regionunda qalmış separatçı tör-töküntüləri dalana sıxışdırıldıqca onların olmayan ağıllarına sərsəm “ideyalar” gəlməyə başlayır: “Bütövlükdə Azərbaycanın ərazi bütövlüyünə xələl vuran həmin “ideyalar” isə suveren ərazilərimizin tam bərpa olunması, yəni qanunsuz erməni silahlılarının yerdə qalan məntəqələrimizdən çıxarılması istiqamətində başladılan prosesi daha da sürətləndirir.
Təbii ki, Qarabağın “Rusiyaya birləşdirilməsi” ətrafında “referendumun” keçirilməsi absurd düşüncədir və bu gün Azərbaycan Silahlı Qüvvələrinin tam mühasirəsində qalan kiçik bir anklavın sözün əsl mənasındakı axmaq “idarəçilərindən” başqa hər hansı təsirləri də gözləmək olmaz. Bu, deyərdim ki, dəhşətli qorxu, qarşısıalınmaz təlaş aqoniyasının nəticəsidir ki, indi də belə bir gülüş doğuran iddialarla çıxış edirlər. Bəli, etiraf edə bilərik ki, hazırda Rusiyada müəyyən qüvvələr var ki, həmin qüvvələrin missiayaları ermənilərlə birlikdə Bakını Moskva ilə qarşıdurmaya cəlb etdirməkdən ibarətdir. Ancaq nə Rusiyanın, nə də Azərbaycanın belə bir təxribata uyacaqları ağlabatandır”.
R.Rəsulovun sözlərinə görə, yeri gəlmişkən, bu gün yalnız Fərrux və Daşbaşı strateji yüksəklikləri deyil, qeyri-rəsmi məlumatlara görə, digər yüksəkliklərimiz də Azərbaycan ordusunun nəzarəti altındadır. “Yəni separatçıların “referendum” keçirmək ətrafında qaldırdıqları səs-küylərin artması da bu reallıqlara söykənir. Açığını deyim, artıq cəbhədə elə bir mühit formalaşıb ki, biz bu gün yatıb, səhəri gün hansısa ərazimizin, yüksəkliyimizin düşməndən azad edildiyi xəbərini ala bilərik. Bu baxımdan, hansısa sərsəm erməninin nə isə çərənləməsinin təsir qüvvəsi yoxdur, ola da bilməz.
Ortada üçtərəfli bəyanat var və bu bəyanatın bəlli bəndlərinin icra olunması üçün vaxt get-gedə daralır, Azərbaycanın isə tələbləri daha da sərtləşdirilir.
Artıq Azərbaycan və Ermənistan rəhbərliklərinin Brüssel görüşünün keçiriləcəyi məlumdur və eyni zamanda, Rusiyanın dövlət başçısı ilə Azərbaycan və Ermənistan rəhbərlərinin telefon danışıqları da baş tutub. Bütün bunlar isə “referendum” iddialarının, ümumiyyətlə, ortaya atılmış gərəksiz mövzu olduğunu sübuta yetirir.
Sonda isə qeyd edim ki, biz qardaş Türkiyənin prezidenti cənab Ərdoğanın bugünlərdə səsləndirdiyi növbəti bəyanatını xatırlaya bilərik. O, Qarabağ məsələsində Ermənistana qarşı radikal addımların atılmasına ehtiyacın olmadığını deyib, eyni zamanda, bütün məsələlərin Azərbaycan rəhbərliyi ilə razılaşdırıldığını vurğulayıb. Ərdoğan adını çəkməsə də, Şuşa Bəyannaməsini xatırladıb və əlbəttə, bu gün Rusiya faktorunu önə atanlar, Kremldən pənah uman ermənilər də yaxşı bilirlər ki, Moskvanın yalnız Bakı ilə deyil, regional gücdən beynəlxalq gücə çevrilmiş Ankara ilə də qarşıdurmaya getməsi əsla mümkün deyil. Rusiyanın Ukrayna cəbhəsində uğradığı və əslində planlaşdırmadığı uzunmüddətli müharibəsi, blits-krikin alınmaması, get-gedə artan sərt sanksiyalar artıq şimal qonşumuzun hərbi-siyasi gücünü yıprandırmaqdadır. Qeyd edilən bu kimi faktorların hər birini dərindən təhlil edərsək qarşımıza Qarabağla bağlı məhz belə bir mənzərə, proqnoz çıxır: "referendumlardan" cərənləyən separatçıların, qanunsuz erməni hərbi birləşmələrinin ərazilərimizdən rədd edilmələri üçün sayılacaq zamanlar qalıb və bu gün strateji yüksəkliklərin Ordumuz tərəfindən nəzarət altına götürülməsi, xüsusilə Ağdərə-Xankəndi yolunun tam nəzarəti, 30-a yaxın məntəqələrin hədəfimizdə olması – bütün bunlar quldur rejim nümayəndələrini çox qorxutmağa başlayıb. Əslində, cürətləri çatarsa “referendumlarını” keçirsinlər və həmin “tədbirlərinin” nə ilə başa çatacağı, başlarına nələrin gələ biləcəyini bəri başdan təsəvvürlərində canlandırsınlar. Məsələn, biz bu təsəvvürü artıq çoxdan canlandırmışıq”- deyə R.Rəsulov qeyd etdi.
İradə SARIYEVA
