Rusiya-Ukrayna müharibəsi başlayandan sonra rus kəşfiyyatının Putinə vəziyyətlə bağlı yalan məlumatlar verdiyi, real vəziyyəti ondan gizlətdiyi barədə məlumatlar yayılmışdı.
“Azadlıq” Radiosunun yaydığı məlumata görə, ABŞ rəsmisi deyir ki, Putin hər halda hərbçilərin cəbhədəki əsl vəziyyəti ondan gizlətdiklərini hiss edir. Belə ki, ABŞ kəşfiyyatının təxminlərinə görə, prezident Putinin müşavirləri Rusiya qoşunlarının Ukraynadakı “real nailiyyətləri” barədə həqiqəti ondan gizlədirlər. Bu barədə məlumatı ABŞ administrasiyasından adının çəkilməsini istəməyən rəsmiyə istinadən Associated Press agentliyi verib. Həmin rəsminin sözlərinə görə, məsələn, müddətli xidmətdə olan əsgərlərin hərbi əməliyyatlarda iştirak və həlak olması barədə məlumatlar Putindən gizlədilir.
Rusiya prezidenti bundan əvvəl demişdi ki, Moskvanın “xüsusi əməliyyat” adlandırdığı bu müharibədə yalnız müqaviləli hərbçilər iştirak edir. Lakin daha sonra Rusiya Müdafiə Nazirliyi Ukraynadakı hərbi əməliyyatlarda müddətli əsgərlərin iştirak etməsini və bəzilərinin əsir düşməsini etiraf etmişdi. Nazirlik bildirirdi ki, Ukraynaya aparılmış müddətli xidmət hərbçiləri artıq Rusiyaya qaytarılıblar. Putin belə hallara yol verilməsinin prokurorluq tərəfindən araşdırılmasına göstəriş vermişdi. Rəsminin dediyinə görə, Putindən, habelə, Qərb sanksiyalarının ölkənin iqtisadiyyatına vurduğu ziyanın həqiqi miqyasları gizlədilir. Administarsiya nümayəndəsi iddia edib ki, Putinin çevrəsi ona həqiqəti deməkdən qorxur. Lakin rəsmi bunu da qeyd edir ki, Putin hər halda hərbçiləri cəbhədəki əsl vəziyyəti ondan gizlətdiklərini hiss edir. Bu da qeyd olunur ki, belə bir vəziyyət artıq Putinlə hərbiyyə rəhbərləri arasında müəyyən ziddiyyətlərə səbəb olub. Rusiyanın Ukraynaya hərbi müdaxiləsi başlanandan bəri Putin ictimaiyyət arasında az-az görünür. Azsaylı çıxışları zamanı prezident “xüsusi əməliyyatın” plan üzrə getdiyini vurğulayır. Rusiya rəsmi olaraq Ukraynanın “demilitarizasiyası” və “denasifikasiyası” ideyasından geri çəkilməyib. Buna baxmayaraq, Ukrayna ilə danışıqlarda Rusiya nümayəndə heyətinin başçısı Vladimir Medinski deyib ki, Kiyevin NATO-ya qoşulmaqdan imtina etməsi və neytrallığa dair öhdəlik götürməsi Moskvanın əsas tələblərinə cavab verir. ABŞ kəşfiyyatının bu məlumatı üzərindən məxfilik yenicə qaldırılıb. Bundan əvvəl prezident Co Bayden kəşfiyyat məlumatları barədə danışmaqdan imtina etmişdi. Administrasiya rəsmisi bildirib ki, Ukraynada hazırda durğunlaşmış müharibədə Rusiya qüvvələri ağır itkilərə məruz qalıb. Ukraynalıların qızğın müqaviməti ilə üzləşən Rusiya hərbçiləri arasında ruh düşkünlüyünün hökm sürdüyü bildirilir. ABŞ rəsmiləri deyir ki, Putin Rusiyanın Sovet İttifaqının süqutu ilə itirdiyi nüfuzu geri qaytarmağa çalışır. Ağ Evin kommunikasiyalar direktoru Keyt Bedinqfild deyib ki, bütün bunlar Rusiyanın strateji səhvi ilə nəticələnib.
Qeyd olunduğu kimi, rus kəşfiyyatının Putini aldatdığını həm artıq Qərbin nüfuzlu kəşfiyyat mənbələri, həm də rəsmi orqanları bildirir. Hər iki mənbə qeyd edir ki, Putinin yaxın çevrəsində heç kim ona real vəziyyəti olduğu kimi deməyə cəsarət etmir, qorxurlar.
“...Ukrayna ordusu zəifdir, hələ cavandır, elə ilk hücumdaca qaçacaqlar, Zelenski Qərbə qaçacaq - Putinə təxminən bu istiqamətdə informasiyalar verib onun könlünü xoş ediblər”
Hər iki məsələ ilə bağlı təhlükəsizlik məsələləri üzrə tanınmış ekspert, ehtiyatda olan polkovnik-leytenant İlham İsmayılın mövqeyini öyrəndik. “Diktarorlara xas olan xarakter, xüsusiyyət budur ki, öz xoşladıqları sözü eşitmək istəyirlər. Ətraflarında həmişə elə əhval-ruhiyyə yaradırlar ki, ona ölkə barədə pis xəbərlər verilməsin. Burada yaranan xüsusiyyətlər odur ki, Putin 22 ildir hakimiyyətdədir və illərdir onun ətrafında olan komanda da, təbii, Putinin pis xəbərləri xoşlamadığını bilir. Ona görə də, təbii, həm korrupsiyaya bulaşan məmurlar, aydın məsələdir, gördükləri işin çoxunu mənimsəyir və informasiyanı elə verirlər ki, guya hər şey yaxşıdır. Bu, kəşfiyyatda da iki istiqamətdə olub. Demirəm Putini tam aldadıblar, müəyyən qədər yanlış informasiya veriblər ki, bizim gücümüz bu qədərdir, biz bunu iki günə, uzaqbaşı üç günə həll edərik. Eyni zamanda Putinə qarşı tərəf Ukrayna barədə də doğru olmayan informasiyalar verib. Fikirləşiblər ki, beşinci kolon yaratmışıq, təsirli adamlar var, Ukrayna ordusu zəifdir, hələ cavandır, elə ilk hücumdaca qaçacaqlar, Zelenski Qərbə qaçacaq. Putinə təxminən bu istiqamətdə informasiyalar verib onun könlünü xoş ediblər. Bu səbəbdən də reallıqla rastlaşanda artıq Qərbdən gələn informasiyalar, eyni zamanda artıq 37 gündür bu məsələdə xüsusi bir irəliləyişin olmaması, Putinin böyük təcridlə, sanksiyalarla üzləşməsi belə bir qənaət yaradır ki, demək ona doğru informasiya verməyiblər. Çünki düzgün informasiya versəydilər, Putin bəlkə də məsələnin 40 günə yaxın davam etməsini gözləməzdi başqa şey fikirləşərdi. Ona görə də müəyyən həbslər baş verir, komandadan kimlərsə aralanır, Putinin nəzərində kimlərsə özünü düzgün aparmayıbsa onu təcrid edir. Bu da diktarorlara xas olan xüsusiyyətdir. Zamanında Hitler də, Stalin də bütün ətrafından şübhələnirdi, elə bilirdilər kimsə onları öldürmək istəyir, hamı onlara yalan danışır”.
İ.İsmayıl onu da əlavə etdi ki, məsələlərin bu cür davam etməsi və sərgilədiyi davranışlar Putinin məğlubiyyətinə səbəb olacaq: “Bu, şəxs olaraq Putinin məğlubiyyətinə aparır. Bu bəlkə də Rusiya dövlətinin məğlubiyyət məsələsi deyil. Çünki Rusiyanın apardığı müharibəni Rusiya dövlətindən çox bir şəxs aparır. Putinin iradəsidir, Rusiya dövlətinin və dövlətinin iradəsi deyil. Təəssüf ki, bunu formalaşdıran da Putindir. Ona görə də komandası ilə birlikdə buna gedirlər və burada məğlubiyyət qaçılmazdır, artıq hiss olunur. Hətta onlar tutduqları yerdən çəkilməsələr belə, Rusiya məğlub olub və Rusiya haqqında olan mif dağılıb. Bu səbəbdən də belə qənaət formalaşır ki, Putin bunu istəməzdi, amma əvvəldən ona yanlış məlumat veriblər”.
“Belə qənaətə gəlmək olarmı ki, Qərb rəsmilərinin, eləcə də Qərb kəşfiyyatının mətbuata sızdırdığı informasiyalar, onların gəldikləri nəticələr yalan deyilmiş, onlar bunda haqlı imişlər” sualımıza cavab olaraq İ.İsmayıl bunları dedi:“Yəni yüzdə-yüz haqlı olduğunu demək olmaz, amma ehtimallar böyükdür. Qərb də onu müəyyən bir informasiya mənbələrinə əsaslanıb deyir. Həm də ki, məntiqi təhlilə, nəticəyə əsaslanırlar”.
Ekspertin fikirlərindən belə aydın oldu ki, Qərb əldə etdiyi informasiya ilə nəticələri tutuşdurub belə bir fikir söyləyə bilir ki, yaxın ətrafı, məmurlar Putini aldadıb...
İradə SARIYEVA
