Rusiya Dövlət Duması Azərbaycanın Baş prokurorluğunda rusiyalı deputat Mixail Delyagin haqqında cinayət işinin açılmasına reaksiya verib.
RF parlamentinin beynəlxalq məsələlər üzrə komitəsinin sədr müavini Aleksey Çepa bunu əsəbi və səhv addım adlandırıb:
“Bu bir qədər əsəbi və səhv addımdır. Biz bu açıqlamaya reaksiya verəcəyik, çalışacağıq bəzi addımlar atıb həmkarlarımızı sakitləşdirək".
O, həm Bakını, həm deputat Delyagini daha təmkinli olmağa çağırıb:
"Məncə, daha təmkinli olmaq lazımdır. Delyagin də daha təmkinli olmalı, ifadələrini ölçüb-biçməlidir".
Qeyd edək ki, Rusiya Federasiyası Dövlət Dumasının deputatı, Dumanın İqtisadi siyasət üzrə komitəsinin sədr müavini Delyagin Mixail Gennadyeviçin son günlər kütləvi informasiya vasitələrində iki dövlət arasında olan qarşılıqlı fəaliyyətin prinsiplərinə zidd mövqe sərgiləyən çıxışları ilə bağlı Baş Prokurorluqda araşdırma aparılıb.
Azərbaycan Baş Prokurorluğunun Mətbuat Xidmətinin məlumatına görə, Mixail Delyagin 2022-ci il 28 mart tarixində Rusiya Federasiyasının "Rossiya 1" telekanalında yayımlanan verilişdə Azərbaycana qarşı təcavüzkar müharibəni başlamağa açıq çağırışlar edərək ölkəmizin enerji infrastrukturu və neft sənayesinin məhv edilməsi üçün taktiki nüvə silahından istifadə olunması barədə təxribat xarakterli çıxış edərək, sosial media platformasında bu barədə kütləvi sorğu keçirib.
Rusiya vətəndaşı Mixail Delyaginin əməllərində Azərbaycan Cinayət Məcəlləsinin 101.2 (təcavüzkar müharibəni başlamağa açıq çağırışlar), 214.2.3 (terrorçuluq-odlu silahdan və silah qismində istifadə olunan predmetlərdən istifadə etməklə törədilməklə hədələdikdə), 283.2.1 və 283.2.2-ci (milli, irqi, sosial və ya dini nifrət və düşmənçiliyin salınması) maddələrinin tərkib əlamətləri olduğundan, 29 mart 2022-ci il tarixdə Azərbaycan Baş prokuroru tərəfindən həmin maddələrlə cinayət işi başlanmaqla ibtidai istintaqın aparılması Baş Prokurorluğun İstintaq idarəsinə həvalə olunub.
İttiham üçün əsas verən kifayət qədər sübutlar toplandığından, 29 mart 2022-ci il tarixdə Mixail Delyagin Cinayət Məcəlləsinin qeyd edilən maddələri ilə təqsirləndirilən şəxs qismində cəlb edilərək məhkəmənin qərarı ilə barəsində həbs qətimkan tədbiri seçilməklə "İnterpol" vasitəsilə beynəlxalq axtarış elan edilib.
Eyni zamanda bir sıra tərəfdaş dövlətlərin səlahiyyətli orqanlarına təqsirləndirilən şəxsin həmin ölkələrin ərazisinə daxil olduqda dərhal tutularaq istintaqa cəlb edilməsi üçün Azərbaycana verilməsinin təmin edilməsi məqsədilə müraciətlər göndərilib.
Hazırda cinayət işi üzrə intensiv istintaq tədbirləri davam etdirilir.
Azərbaycan Baş Prokurorluğu bəyan edir ki, ölkəmizin milli mənafeyi, təhlükəsizliyi və ərazi bütövlüyü əleyhinə yönələn istənilən təxribat xarakterli fəaliyyətlə bağlı qanunla nəzərdə tutulan tədbirlərin görülməsi təmin olunacaq.
Xatırladaq ki, Rusiya Federasiyası Dövlət Dumasının İqtisadi Siyasət Komitəsinin sədr müavini Mixail Delyagin "Rossiya-1" telekanalında yayımlanan "60 dəqiqə" proqramındakı çıxışı zamanı Azərbaycanın neft sənayesini bombalamaqla hədələyib.
O, Rusiyanın dövlət kanalında, Mariya Skabeyevanın verilişində çıxışı zamanı Azərbaycan ordusunun öz ərazimizdəki yerdəyişməsini "işğal" adlandırıb və buna qarşı sərt addımlar atmağın zəruri olduğunu bildirib.
Azərbaycan tərəfinin bu addımı hansı hüquqi nəticələr verə bilər?
Hüquqşunas Mehman Muradlı “Bakı-Xəbər”ə açıqlamasında bildirdi ki, Azərbaycan tərəfinin bu hüquqi prosedura başlaması üçün əlində kifayət qədər dəlillər var: “ Düzdür, həmin deputat publik olaraq işlətdiyi ifadələrə görə üzr də istəyib. Ancaq onun dedikləri həm də hüquqi məsuliyyət yaradır. Azərbaycan dövlət olaraq baş verən olayı bir üzr videosu ilə bağlaya bilməz. Deputatın üzrü də bir qədər maraqlıdır. Delyagin birbaşa deyir ki, Kremlin sözçüsü Peskovun tövsiyələrini yerinə yetirir, buna görə üzr istəyir. Yəni bu adam səhvini və necə böyük qəbahətə yol verdiyini anlamır, sadəcə, Kremldən gələn tapşırığı icra edir. Deputat deyir: “Mənim sözlərimdən sonra qorxmuş, incimiş və çaşqınlıq hissi keçirmiş hər kəsdən üzr istəyirəm”. Yenə də Azərbaycan xalqından, dövlətindən üzr istəmir. Buna görə də, ona cinayət işinin açılması çox doğru addımdır. Ola bilər ki, Rusiya onu deputat toxunulmazlığında istifadə edib, məsuliyyətə cəlbinə imkan verməyəcək. Ancaq birmənalı olaraq Azərbaycana səfər edə bilməyəcək. İnterpol xəttilə də axtarışa verilib. Rusiyaya qarşı geniş sanksiyaların tətbiq edildiyi bir zamanda Delyaginin istənilən ölkəyə səfər etmək cəhdi alınmayacaq, hətta həbslə nəticələnə bilər. Bunun eyni zamanda tərbiyəvi əhəmiyyəti də var. Qoy Rusiyadan bizə dil uzadan hər bir kəs öz həddini bilsin. Biz bu addımı bir qədər əvvəl atmalıydıq. Məsələn, bizi təhqir edən Jirinovski ilə bağlı belə bir addım atılsaydı, hazırda Delyaginlər meydana çıxmazdı”.
Məhəmmədəli QƏRİBLİ
