Məlum olduğu kimi, İslam Əməkdaşlıq Təşkilatının (İƏT) Xarici İşlər Nazirləri Şurasının martın 22-23-də keçirilən 48-ci sessiyasında Ermənistanın Azərbaycana qarşı təcavüzü və Xocalı soyqırımı ilə bağlı dörd qətnamə qəbul edilib.
Pakistan İslam Respublikasının İslamabad şəhərində “Birlik, ədalət və inkişaf naminə tərəfdaşlığın qurulması” mövzusunda təşkil edilən konfransda “Ermənistanın Azərbaycan Respublikasına qarşı təcavüzünün nəticələrinin aradan qaldırılması”, “Azərbaycan Respublikasına iqtisadi yardım göstərilməsi”, “Ermənistan Respublikasının Azərbaycan Respublikasına təcavüzü nəticəsində Azərbaycanın ərazilərində İslam tarixi və mədəni ziyarətgahlarının dağıdılması və təhqir edilməsi” və “Xocalı qırğınının qurbanları ilə həmrəylik” adlı qətnamələrdə Ermənistanın Azərbaycana qarşı hərbi təcavüzünün siyasi, iqtisadi, mədəni və humanitar aspektləri ilə bağlı müddəalar əks olunub.
Bütün bunlara rəğmən, bir sıra ərəb ölkələri Ermənistanla əlaqələrin daha da dərinləşdirilməsinə qərar verib. Məsələ ondadır ki, Dubayda Birləşmiş Ərəb Əmirliklərinin iqtisadiyyat naziri Abdulla bin Tuk Əl-Marri Ermənistan baş nazirinin müavini Ambartsum Matevosyanı yüksək səviyyədə qəbul edib. Matevosyan BƏƏ şirkətlərinin, xüsusən də son illərdə Ermənistan iqtisadiyyatına aktiv şəkildə sərmayə qoymasını yüksək qiymətləndirib. BƏƏ rəsmisi isə ölkəsinin Ermənistana daha çox sərmayə qoymaq istədiyini bildirib.
Maraqlıdır, bəzi ərəb ölkələri Ermənistanla əlaqələrin genişləndirilməsinə niyə xüsusi önəm verirlər?
“Nəzərə almırsa, deməli İslam həmrəyliyinə xəyanət edir”
Məsələyə münasibət bildirən Dirçəliş və Tərəqqi Partiyasının sədri Ramil Hüseynovun fikrincə, bir sıra ərəb ölkələrinin Ermənistanla bağlı sərgilədikləri siyasət narahatlıq doğurur: “Əfsuslar olsun ki, Birləşmiş Ərəb Əmirlikləri və digər bəzi ərəb ölkələri Ermənistanın işğalçı mahiyyətini görməzdən gəlir. Bu da müsəlman ölkələrinin həmrərliyi və islam dəyərləri prinsiplərinə ziddir. Ermənistan BƏƏ-nin geniş maliyyə imkanlarına malik olduğunu bildiyi üçün belə canfəşanlıq göstərir. Ermənistan çalışır ki, varlı ərəb ölkələri daha şox bu ölkəyə sərmayə qoysun. Ancaq bunlar fərqinə varmaq istəmirlər ki, Ermənistan təcavüzkar olmaqla yanaşı, islam dəyərlərinə qarşı olan bir dövlətdir. Nəzərə alsaq ki, İƏT-in məlum qətnamələri var, o zaman BƏƏ-nin bunları nəzərə alması vacibdir. Nəzərə almırsa, deməli İslam həmrəyliyinə xəyanət edir. Bunu ancaq belə qiymətləndirmək olar”.
Vidadi ORDAHALLI
