Ermənilər Xocalı rayonunun Pirlər kəndində növbəti təxribata cəhd edir. Bu barədə Caliber.az saytı məlumat yayıb.
Məlumata görə, kəndə ermənilər gətirilib, onlara hərbi forma və silahlar yerindəcə verilir. Azərbaycan ərazisində müvəqqəti yerləşdirilmiş sülhməramlı qüvvələr bu prosesi 200 metr kənarda sakitcə seyr edirlər.
Bundan əvvəl Fərrux kəndində bənzər təxribatlar oldu. Ermənilər Fərrux yüksəkliyinin strateji imkanlarından istifadə edərək ara-sıra Ağdam istiqamətində təxribatlar törədirdilər. Maraqlıdır ki, Rusiya sülhməramlıları orada olduqları üçün belə halların qarşısını almaq imkanına malik idilər, amma bunu etmədilər. Nəticədə Azərbaycan ordusu Fərrux yüksəkliyini nəzarətə götürdü. İndi də Pirlər kəndində müşahidə olunan təxribat xarakterli fəaliyyətlər ondan xəbər verir ki, Rusiya sülhməramlıları Qarabağda sabitlikdə maraqlı deyil.
“Bu dəfə də hərbi forma geyindirdikləri yaramaz erməni yaraqlılarını Azərbaycan ordusu təmizləyəcək”
Məsələyə münasibət bildirən hərbi ekspert Üzeyir Cəfərovun fikrincə, bütün bunların səbəbkarı Rusiya sülhməramlılarıdır: “Erməniləri Qarabağa Rusiya sülhməramlıları gətirir. Buna görə də, baş verən hadisələrə sülhməramlılar göz yumur. Rus əsgərindən başqa nə gözləyə bilərik ki? Qarabağa erməniləri gətirməklə heç kim heç nəyə nail ola bilməyəcək. Çünki qısa bir müddətdə darmadağın olmuş ordunun nəyəsə nail olması mümkün deyil. Havadarları erməniləri geyindirə, onlara silah verə bilərlər. Bəs sonra nə olacaq? Azərbaycanın qəhrəman hərbçiləri silahlı erməniləri darmadağın edəcək. Bu məsələ ilə bağlı narahat olmağa dəyməz. İndiyə qədər bir neçə dəfə xəbərdarlıq almasına baxmayaraq, sülhməramlılar öz vəzifələrini yerinə yetirmir. Daha öncə olduğu kimi, bu dəfə də hərbi forma geyindirdikləri yaramaz erməni yaraqlılarını Azərbaycan ordusu təmizləyəcək. Bu istiqamətdə iş aparılır. Azərbaycan tərəfi qısa müddətdə öz qərarlarını vermələri üçün ermənilərə səsgücləndiriclərlə lazımi məlumatları çatdırıb. Əks təqdirdə ordumuz nə lazım gələrsə, onu da edəcək”.
Hərbi ekspert hesab edir ki, bütün bunlar Moskvadan idarə olunur.
Vidadi ORDAHALLI
