Bakıda səfərdə olan Böyük Britaniyanın Silahlı Qüvvələr naziri Ceyms Hippi Şəhidlər Xiyabanını ziyarət edib. Bu barədə Böyük Britaniyanın Azərbaycandakı səfiri Ceyms Layl Şarp “Twitter” səhifəsində yazıb. Böyük Britaniya səfiri öz səhifəsində qeyd edib ki, Ceyms Hippi Kremlin əli ilə həlak olanların məzarları üzərinə gül dəstələri qoyub, Azərbaycanın müstəqilliyi uğrunda canlından keçənlərin xatirəsini ehtiramla yad edib.
İndiyə qədər Britaniyadan gələn hansısa bir dövlət rəsmisinin Şəhidlər Xiyabanını ziyarət edib Kremlin əli ilə həlak eidlən şəhidlərimizin məzarlarını ziyarət etdiyini xatırlamırıq. Amma Bakıda səfərdə olan Böyük Britaniyanın Silahlı Qüvvələr naziri Ceyms Hippi belə bir həssas məqamda Şəhidlər Xiyabanını ziyarət edib və Rusiyaya incə eyham vurub.
Bu barədə Britaniya səfiri də öz Tvitter səhifəsində yazıb ki, nazir Kremlin əli ilə Azərbaycanın müstəqilliyi uğrunda mübarizədə öldürülənlərin (həlak olanların) xatirəsini yad edib.
Britaniyalı nazirin indiki məqamda “Kremlin əli və Azərbaycanın müstəqilliyi uğrunda şəhid olanlar” deməsi Rusiyaya bir mesajdır ki, Azərbaycanın müstəqilliyini sənin bütün planlarından qorumaq üçün hər şeyi edəcəyik.
Aydın Quliyev: “Bu əslində “Azərbaycanın müstəqilliyini indi həmişəkindən daha güclü dəstəkləyirik” deməkdir”
“Bakı-Xəbər” qəzetinin baş redaktoru Aydın Quliyev öz rəsmi “Facebook” səhifəsində Böyük Britaniyanın Silahlı Qüvvələr naziri Ceyms Hippin məlum jestini müsbət qiymətləndirib. A.Quliyev qeyd edib ki, britaniyalı nazirin Şəhidlər Xiyabanını ziyarət etməsi tarixi hadisədir: “Britaniyanın Siahlı qüvvələr naziri Ceyms Hippin Bakıda Şəhidlər Xiyabanını ziyarət etməsi tarixi hadisədir. Belə addımı atan mötəbər xarici rəsmilərin sayı çox deyil. Britaniyanın Azərbaycandakı səfirinin yazdığı tvit isə nazirin tarixi ziyarətinin mahiyyətini açır. “Kremlin əli ilə öldürülən və Azərbaycanın müstəqilliyi uğrunda canından keçənlərin xatirəsinə hörmət ifadə edib”. Səfirin yazdığı tvitin məzmunu belədir. Tvitdə Kremlin və Azərbaycanın müstəqilliyinin xatırladılması təsadüf deyil. Ukraynada baş verənlərin bütün postsovet ölkələrinin müstəqilliyi üçün təhlükə kimi dəyərləndirildiyi indiki vaxtda bu, daha diqqətçəkicidir. Bu əslində
“Azərbaycanın müstəqilliyini indi həmişəkindən daha güclü dəstəkləyirik” deməkdir.
Xatırladım ki, nazir Xiyaban ziyarətindən əvvəl Azərbaycan Prezidentinin rəsmi qəbulunda olub və heç şübhəsiz, ziyarət niyyəti barədə öncədən Azərbaycan Prezidentini məlumatlandırıb”.
Faiq Ələkbərli: “Britaniyalı nazirin Şəhidlər Xiyabanını ziyarət etməsi də, səfirin tvviti də Rusiyaya yönəlik bir mesajdır və onun təhdidlərinə qarşı Azərbaycana dəstək olduqlarına bir işarədir”
AMEA-nın Fəlsəfə və Sosiologiya İnstitutunun aparıcı elmi işçisi, BAO-nun başqan müavini, fəlsəfə doktoru, siyasi şərhçi Faiq Ələkbərli də hesab edir ki, Britaniyanın Silahlı qüvvələr nazirinin Şəhidlər Xiyabanını ziyarət etməsi və oradan Rusiyaya məlum mesajı ötürməsi təsadüfi deyil. “Bu məsələyə bir deyil, bir neçə tərəfdən baxmaq lazımdır. Əvvəla, şübhəsiz ki, bütün bunlar müəyyən mənada daha çox Rusiya ilə Ukrayna arasında gedən savaşın da təzahürüdür. Əslində, Böyük Britaniya da, ABŞ da, bütövlükdə bir çox Qərb dövlətləri də postsovet ölkələrinin Rusiyaya münasibətini formalaşdırmaqda davam edirlər. Bu da nədir? Yəni Çar Rusiyası, Sovet Rusiyası sizi işğal altında saxlayıb, torpaqlarınızı qəsb edib, siz də müstəqillik uğrunda mübarizə aparmısınız, sonradan müstəqilliyiniz Sovet Rusiyası tərəfindən yenidən əlinizdən alınıb və bu yolda qurban gedən şəhidləriniz var, bunları unutmayın və sair. Digər tərəfdən, istər Böyük Britaniya nazirinin Şəhidlər Xiyabanını ziyarət etməsinin, istərsə də səfirin atdığı tvitin arxasında Rusiyanın postsovet ölkələri üçün hansı təhdidlər daşıdığını ifadə etmək dayanır. Nazir də, səfir də ifadə etmək istəyirlər ki, Rusiya tərəfindən belə bir təhdid var. Bu təhdidin aradan qalxması üçün Ukrayna, Gürcüstan, Qazaxıstan, Azərbaycan, Baltikyanı ölkələr bu təhdidi bilməlidir. Əlbəttə, britaniyalı nazirin Şəhidlər Xiyabanını ziyarət etməsi ilə bağlı atılan tvitdə orada dəfn edilənlərin Kremlin əli ilə qətlə yetirildiyinin xüsusi vurğulanması yenə də Rusiyanın təhdid olaraq qaldığının göstərilməsidir. Şübhəsiz ki, Böyük Britaniyanın naziri də, səfiri də bu məsələdə haqlıdır. Doğrudan da, Azərbaycan da daxil olmaqla bütün postsovet ölkələri üçün Rusiya Federasiyası böyük təhdiddir. Yəni Rusiyanın hələ də bizim müstəqilliyimiz üçün təhdid olaraq qalması bir gerçəklikdir. Qazaxıstan, Ukrayna, Gürcüstan olayları bunu bir daha göstərdi. Azərbaycan da belə bir təhdidlə üz-üzədir. Azərbaycanın Qarabağ bölgəsinin bir hissəsində müvəqqəti olaraq sülhməramlı adı altında yerləşdirilən qüvvələrin oynadığı təxribatçı oyunların açıq-aşkar Azərbaycan dövləti üçün bəzən təhdid yaratdığı da bəllidir. Bir sözlə, britaniyalı rəsmilər də bunu ifadə etmək istəyirlər ki, Azərbaycanın dövlət müstəqilliyi uğrunda vaxtilə şəhid olanlar məhz Kremlin qanlı əllələri ilə şəhid edilib, onlar Kremlin məkrli, işğalçı planları nəticəsində həlak olub. Bu gerçəklikdir. Əlbəttə, bu o anlama gəlmir ki, Qərb dövlətləri, o cümlədən də Böyük Britaniya bizim üçün hər şeyi düzgün edib, onlar Aydan arı, sudan durudur və sair. Onlar da təbii ki, öz maraqları üçün həmişə hərəkət ediblər, bir çox xalqların ərazilərinin işğal altında qalmasının səbəbkarı elə Böyük Britaniya olub. Amma bu gün dünya düzənində daha çox işğalçılıq siyasətini gerçək olaraq ortaya qoyan Rusiya Federasiyasıdır. Ona görə də, Rusiya Federasiyasına qarşı formalaşdırılan bu fikirlər, düşüncələr əsassız deyil. Hər halda Azərbaycan da, Azərbaycan xalqı da bu məsələdə bilməlidir ki, bu gün təhdidi altında olduğumuz ölkə Rusiyadır, Kremldir. Biz bunu Rusiya deputatlarının birinin çıxışında da daha kəskin formada gördük. Britaniyalı nazirin Şəhidlər Xiyabanını ziyarət etməsi də, səfirin tviti də Rusiyaya yönəlik bir mesajdır və onun təhdidlərinə qarşı Azərbaycana dəstək olduqlarına bir işarədir. Əlbəttə, biz Rusiyanın bizim müstəqilliyimizə təhdid yaratdığını bilirik və şübhəsiz, indiyə qədər öz dövlət müstəqilliyimizi qorumuşuq, nəyin bahasına olursa olsun qoruyacağıq da, Azərbaycanın bir daha öz müstəqilliyini itirməsinə yol verməyəcəyik. Əksinə, biz Azərbaycanımızı daha da güclü bir hala gətirəcəyik”.
İradə SARIYEVA
