Məlum olduğu kimi, bu günlərdə Ermənistan öz döyüş təyyarələrini və pilotlarını Ukrayna müharibəsində istifadə etmək üçün Rusiyaya göndərib. Bu arada Ermənistanın Rusiyaya göndərdiyi döyüş təyyarələri ilə bağlı yeni məqamlar üzə çıxıb. Moskvaya qırıcıların verilməsi barədə məlumatların dolaşdığı məqamda Suriyadan Ermənistana 4 ədəd SU-30 tipli döyüş təyyarəsi göndərilib. Həmin qırıcılar Rusiyaya göndərilən reaktiv təyyarələri əvəz etmək üçün yerləşdirilib.
Bununla Ermənistan iz itirməyə çalışır. Belə addımın atılması Ermənistanın mümkün sanksiyalardan qorunmaq niyyətilə əlaqələndirilir. Ermənistan hakimiyyəti Rusiyaya birbaşa dəstək verməklə açıq şəkildə hədəfə çevriləcəyini bilir. İndiki məqamda həm Ukraynadakı müharibədə Rusiyaya dəstək olmaq, eyni zamanda sanksiyalardan qurtulmaq üçün Suriya optimal variant kimi ortaya atılıb. O da məlum olub ki, Ermənistan Yaxın Şərqdən Ukraynaya göndərilən əsgərlər üçün tranzit marşrut kimi Rusiyaya yardım edir. Belə ki, suriyalı muzdlular “Erebuni” Hərbi Hava bazasına toplaşır və oradan Rusiyanın Şimali Osetiya Respublikasının Mozdok şəhərinə gedir, daha sonra rus əsgərləri ilə birlikdə Ukraynaya göndərilir.
Sözügedən məsələdə diqqəti çəkən məqam odur ki, mövcud olmayan erməni abidələrinin “dağıdılması” ilə bağlı Azərbaycana qarşı səs çoxluğu ilə qətnamələr qəbul edən Avropa qurumları, nəinki hansısa sanksiya tətbiq edilməsi, bunu ümumiyyətlə görmək istəmirlər. Maraqlıdır ki, bununla bağlı Ermənistandan adi izahat belə tələb olunmur.
“Biabırçılıq ondan ibarətdir ki, Avropa Putindən qorxur”
Məsələyə münasibət bildirən Böyük Azərbaycan Partiyasının sədri Elşad Musayevin fikrincə, son hadisə Ermənistanın həqiqətən də Ukraynaya qarşı Rusiyaya hərbi dəstək verdiyini sübut etdi: “Bu bir daha sübut etdi ki, həqiqətən də Ermənistandan Rusiyaya hərbi təyyarələr göndərilib. Onun yerini doldurmaq üçün Suriyadan hərbi təyyarələrin gətirilməsi buna əyani sübutdur. Ancaq ortada nə qədər faktlar olsa da, ermənilər o qədər həyasız toplumdur ki, bunu onlara sübut etmək olmur. Bu, məsələnin bir tərəfi. Məsələnin ikinci tərəfi ondan ibarətdir ki, Qərbin ikili standartları Azərbaycana münasibətdə heç bir əndazəyə sığmır. Avropa Parlamenti mövcud olmayan erməni abidələrinə görə 635 lehinə, 42 nəfər əleyhinə olmaqla Azərbaycanla bağlı saxta qərar qəbul etdi. Ancaq hələ də Avropanın aparıcı dövlətləri Ukrayna məsələsində Ermənistanın sərgilədiyi mövqeyi təftiş etmir. Halbuki, Ermənistanın hərbi iştirakı birbaşa Avropa maraqlarına qarşı yönəlmiş addımdır. Bu o deməkdir ki, Rusiyanın Ukraynada apardığı dağıdıcı müharibədə Ermənistan iştirak edir. O zaman Ermənistana yönəlik sanksiyalar qəbul edilməlidir. Ancaq nəinki sanksiya, heç bunu görmək belə istəmirlər. Biabırçılıq həm də ondan ibarətdir ki, Avropa Putindən qorxur. ABŞ olmasaydı, ümumiyyətlə bunlar Rusiyanın qarşısında aciz duruma düşərdilər. Yəni bunlar o dərəcədə rəzil durumdadılar”.
Partiya sədri onu da qeyd etdi ki, davamlı olaraq bu məsələlərin üzərinə getmək lazımdır.
Vidadi ORDAHALLI
