Məlum olduğu kimi, Rusiya ilə Ukrayna arasındakı danışıqların növbəti mərhələsində də razılıq əldə olunmadı. Ancaq buna baxmayaraq, Rusiya öz qoşunlarını Kiyev ətrafından geri çəkir.
Bəzi ekspertlər Rus qoşunlarının Kiyev vilayətindən geri çəkilməsinin ən böyük səbəbini resurslarının azalması ilə izah edirlər. Ehtimala görə, Rusiya danışıqların nəticə verməsi üçün Kiyevə hücumunu dayandırıb. Belə fikirlər də var ki, Rusiya hansı əraziləri işğal edibsə, ordunu da ora cəmləyir. Krıma quru yolu əldə ediblər, üstəlik, Donbas separatçı bölgəsinin ərazisini genişləndirmək üçün çalışırlar. İndi əsas döyüşlər bu ətrafda keçiriləcək.
Ukrayna prezidenti Volodimir Zelenski isə deyib ki, Rusiya qoşunlarını geri çəkilməyə məcbur edən Ukrayna ordusunun effektiv hərəkətləridir:
“Əminəm ki, Rusiya hərbi idarəsinin guya Kiyev və Çerniqov istiqamətlərində hərbi əməliyyatları azaltmaq qərarına gəldiyi xəbərini gördünüz. Bəli, eyni şeyi Çernobayevka haqqında da demək olar: sanki Rusiya aviasiyası sadəcə olaraq daha az uçmağa qərar verdi. Mən bütün müdafiəçilərimizə, Kiyevin müdafiəsini təmin edən hər kəsə minnətdaram. Düşməni bu istiqamətdə geri çəkilməyə məcbur edən onların cəsur və təsirli hərəkətləridir. Bununla belə, sayıqlığı itirməyin. Vəziyyət asanlaşmayıb, çağırışların miqyası azalmayıb. Rusiya ordusunun dövlətimizə qarşı hücumlarını davam etdirmək üçün hələ də böyük potensialı var. Onların hələ də çoxlu texnikası və müharibə “qazan”ına göndərə biləcəkləri kifayət qədər tamamilə hüquqlarından məhrum edilmiş adamları var. Ukrayna Silahlı Qüvvələri bu gün sağ qalmağımızın yeganə təminatıdır”.
Müstəqil siyasətçi Bünyamin Qəmbərli “Bakı-Xəbər”ə açıqlamasında bildirdi ki, Rusiya ilə Ukrayna arasındakı danışıqların hər hansı nəticə vermə ehtimalı belə yoxdur: “ Bunun iki səbəbi var. Birincisi, Rusiya geri çəkilə bilməz. Bu onun məhvi olar. Həm də Rusiyanın daxilində Putinə qarşı ciddi reaksiyaların yaranmasına səbəb ola bilər. Beynəlxalq miqyasda Rusiyanın daha da nüvuzdan düşməsinə səbəb olar. Rusiya çox zəif bir ölkə kimi tanına bilər. İkinci səbəb isə Ukraynanın razılığa gələ bilməməsilə bağlıdır. Çünki Ukrayniyaya bu qədər dəstək Rusiyanın çökdürülməsi üçün verilir. Rusiya qoşunlarını Kiyev ətrafından tam geri çəkmir. Həmin istiqamətdə Rusiya qoşunları ciddi irəliləyiş edə bilmədi, itkilər verdi. Bununla Rusiya hərbi manevr edir ki, cəbhənin digər istiqamətlərində ciddi irəliləyiş əldə edə bilsin. Xatırlayırsınızsa, bu müharibə başlamazdan bir neçə gün qabaq Rusiya belə görüntü yaratdı ki, güya qoşunlarını Ukrayna sərhədindən geri çəkir. Üstündən bir neçə gün keçəndən sonra isə gözlənilmədən hücuma keçdi. Hazırda Rusiya buna bənzər manevr edir. Artıq Rusiya ordusunda həm də ciddi ruh düşgünlüyü var. Həm də ölkə iqtisadi cəhətdən ciddi sıxıntılar yaşayır. İnanmıram ki, belə manevrlərlə Rusiya hansısa uğura imza ata bilsin”.
Məhəmmədəli QƏRİBLİ
