Kreml Qarabağla bağlı emosional bəyanatlardan çəkinməyə çağırır, Moskva vəziyyəti normallaşdırmaq üçün səy göstərir.
Bunu Rusiya Prezidentinin mətbuat katibi Dmitri Peskov Rusiya Dövlət Dumasının İqtisadi siyasət komitəsinin sədr müavini Mixail Delyaginin “Rossiya 24” kanalında yayımlanan “60 dəqiqə” verilişinin efirində Bakıya qarşı təxribatçı çıxışını şərh edərkən deyib. Peskov bildirib ki, bu bəyanat heç bir halda Rusiyanın rəsmi xəttinə uyğun gəlmir və uyğun ola da bilməz: “Bu, daha çox şəxsi emosiyalar müstəvisində bəyanatdır. Əlbəttə, biz bu emosiyaları cilovlamağa və bu cür bəyanatlardan çəkinməyə çağırırıq. Xüsusilə Azərbaycanla bağlı bəyanatlarda. Azərbaycan tərəfdaş ölkələr kateqoriyasına aiddir. Rusiyanın Qarabağ bölgəsində sülhün qorunması və tərəflərin bütün müvafiq öhdəliklərinin yerinə yetirilməsi üçün çalışdığı bir şəraitdə diqqətli olaq”.
Qabaqlar da belə hallar olurdu, ancaq Rusiyadan belə operativ rəsmi reaksiya gəlmirdi. Bu nəyin əlaməti sayıla bilər?
Politoloq Əhəd Məmmədli “Bakı-Xəbər”ə açıqlamasında bildirdi ki, doğrudan da Rusiyanın bu cür məsələlərlə bağlı rəsmi reaksiyası belə operativ olmurdu: “Dəfələrlə belə hallarla rastlaşmışıq. Ancaq görürdük ki, bizim rəsmi etiraz bəyanatlarımıza belə Rusiya bir qədər laqeyd yanaşırdı. Hazırda müşahidə etdiyimiz vəziyyət Azərbaycanın artan nüfuzundan xəbər verir. Həm region, həm də dünyadakı nüfuz göstəricimizə olan adekvat münasibətdir. Bura Türkiyəyə bəslənən münasibətdən doğan reaksiyanı da əlavə edə bilərik. Çünki hazırda Rusiyanın Türkiyə kimi ölkəyə böyük ehtiyacı var. Onlar bilir ki, Türkiyə ilə Azərbaycanın münasibətləri heç vaxt indiki qədər yaxın olmayıb. Eyni zamanda bu reaksiya Azərbaycanın Rusiyanın Qarabağla bağlı mövqeyinə görə Rusiyaya verdiyi rəsmi etirazların olduğu dönəmə təsadüf edir. Rusiyanın Müdafiə Nazirliyi öz saytından bizimlə bağlı yaydığı məlumatı silməli oldu. Bütün bunlar Azərbaycan diplomatiyasının qalibiyyətidir. Erməni spikerin sülh müqaviləsi imzalamağa hazır olduqlarını deməsi bizimlə hesablaşmağa hazır olduqlarından xəbər verir. Bütün bunlar sonda ciddi nəticə verəcək və Azərbaycan öz ərazi bütövlüyünü tam təmin etmiş olacaq. Biz inanırıq ki, Rusiya öz sülhməramlılarının fəaliyyətinə də ciddi nəzarəti bərpa edəcək. Hadisələrin məntiqi sonluğu bunu göstərir”.
Məhəmmədəli QƏRİBLİ
