Cənubi Qafqazda işğalçı ölkə statusu daşıyan, buna görə də layiqli cavabını alan Ermənistanın indi də Ukraynada Rusiya işğalına dəstək verdiyi bəllidir. Bu günlərdə isə İrəvan döyüş təyinatlı hərbi təyyarələrini və pilotlarını Rusiya ordusuna təslim edib. Xatırladaq ki, dörd Su-30 tipli döyüş təyyarəsi Ermənistan aeroportundan havaya qalxaraq, Ukraynada istifadə üçün Rusiyaya gedib.
Bundan başqa, az qala hər gün Ermənistanda Rusiyanın Ukraynada həyata keçirdiyi hərbi əməliyyata dəstək ifadə edilir. Bütün bunlar Qərb dünyasında da yaxşı sezilir və elə bu səbəbdəndir ki, Qərbdə İrəvana münasibət də dəyişir. Son zamanlar Ermənistan rəhbərliyinin davranışları Qərbdə və beynəlxalq strukturlarda açıq narazılığın artması ilə nəticələnib. Bu məsələdə Azərbaycanın da rolu az deyil. Məsələ ilə bağlı “1in.am” nəşri yazır ki, müharibələr təkcə döyüş meydanında getmir: “İndi onlar daha əhatəlidir və informasiya sahəsinə daha dərindən nüfuz edir, ictimai sferada hərbi əməliyyatlar üçün möhkəm bazaya çevrilir. Bu, Ermənistana məlum olmayan bir şey deyil. 44 günlük müharibədən əvvəl Azərbaycan tərəfi Ermənistanın informasiya sahəsinə minlərlə informasiya hücumu həyata keçirdi ki, bu da Ermənistanın informasiya təhlükəsizliyinə cavabdeh olan bir çox əlaqəni aradan qaldırdı. İlk günlərdə Azərbaycanda bir çox onlayn resurs bağlandı, sosial şəbəkələr bağlandı. Yalnız dövlət Azərbaycan cəmiyyətini informasiya ilə təmin edirdi, halbuki, Ermənistanda bu baş vermədi. Biz həm informasiya, həm də hərbi cəbhədə təcrübəsizlik, məlumatsızlıq və mütəxəssislərin diqqətsizliyi ucbatından məğlub olduq. Eyni şey Rusiya-Ukrayna hərbi münaqişəsi sferasında baş vermir. Məsələn, ukraynalılar öz informasiya domenlərini təmin edərək, Rusiyanın zərbəsinə fəal hazırlaşırdılar. Qısa müddət ərzində Ukrayna ərazisində rus təbliğatını susdurmaq məqsədilə Ukraynada ixtisaslaşmış hərbi-siyasi təbliğat strukturları, beyin mərkəzləri, xəbər xidmətləri yaradıldı. Bu, təbii ki, Qərb tərəfindən fəal şəkildə dəstəkləndi, Ukraynanın səsini daha eşidilən etdi, eyni zamanda bütün dünyada Rusiya mediasının işini əngəllədi”. Nəşr yazır ki, Ukrayna tərəfi eynilə 44 günlük müharibə zamanı Azərbaycanın istifadə etdiyi üsullardan istifadə edib: “Rusiya bir çox sosial şəbəkələri bloklayır, lakin bu, təkcə Rusiya ərazisində Ukrayna təbliğatının qarşısını almaq deyil, həm də öz ictimaiyyətinə yalnız arzuolunan məlumatları ötürmək, ictimai gərginliyi azaltmaq məqsədi daşıyır. Biz mütəmadi olaraq Rusiya-Ukrayna informasiya atəşinə məruz qalırıq. Azərbaycan mənbələri Ermənistanı rusiyapərəst pərdə altında təqdim edir, Ermənistanın Qərb dünyasındakı reytinqini azaldır, biz isə Bakıda Moskvanın qələbəsini alqışlamadıqlarını Moskvaya başa salmaqla Rusiya-Azərbaycan əlaqələrini pozmağa çalışırıq. Amma yenə də diplomatiyamız və informasiya imkansızlığımız üzündən uduzuruq. Biz media savadlılığının həsəd aparılmaz səviyyəsində qalmağa davam edirik. Cəmiyyətimiz öz təhlilinə üstünlük vermədən medianın təklif etdiyi hər şeyi asanlıqla “yeyir”. Məhz bu kontekstdə Azərbaycan tərəfinin, xüsusən də informasiya sahəsində uğurları nəzərə alınmalıdır. Hazırda “YouTube”da erməni dilində “Artsax” sözünü axtarsanız, sizə Azərbaycan mediasının hazırladığı video təqdim olunacaq”. Bu şərhdən göründüyü kimi, Qərbdə Ermənistanın onsuz də bərbad nüfuzunun darmadağın olmasında Azərbaycanın da rolu az deyil. Bütün bunlar artıq öz nəticələrini göstərir. Hər halda Qərbdən, xüsusən də ABŞ-dan Ermənistana göndərilən maliyyə dəstəyinin azalması da bunu təsdiq edir. Belə ki ABŞ Prezident Administrasiyası ölkə Konqresini Ağ Evin 2023-cü maliyyə ili üçün büdcə təklifində Ermənistana 24 milyon dollar ayırmağa çağırıb. Bu, 2022-ci maliyyə ili üçün bir neçə həftə əvvəl Konqres tərəfindən ayrılan və prezident tərəfindən təsdiq edilən məbləğdən 21 milyon dollar azdır. Ağ Evin bu addımı ermənilərin ABŞ-dakı əsas lobbi təşkilatı olan Amerika Erməni Milli Komitəsinin (ANCA) narazılığına səbəb olub. Erməni lobbisi, həmçinin, Prezident Baydenin ABŞ-dan 2023-cü maliyyə ili üçün Azərbaycana 9,7 milyon dollara yaxın yardım istəməsindən narazıdır. Bura Azərbaycanın ABŞ Müdafiə Nazirliyindən 333-cü bölmə (potensialın gücləndirilməsi) çərçivəsində aldığı əlavə vəsaitlər daxil deyil. Hökumət Hesabatlılığı İdarəsinin (GAO) mart ayında açıqladığı hesabata əsasən, Azərbaycan 333-cü Bölmə çərçivəsində ABŞ-dan 164 milyon dollardan çox yardım alıb. Bütün bunlardan sonra ANCA artıq Ağ Evə və Konqresə “2020-ci ildə regiondan qaçan 100 mindən çox erməninin məskunlaşmasına” kömək məqsədilə Qarabağ ermənilərinə 50 milyon dollar yardım üçün müraciət edib. Lakin buna rədd cavabı verilməsi gözlənilir. Çünki ermənilər Qarabağda yaşamaq istəmir və ABŞ da bunun fərqindədir. Digər tərəfdən, ANCA regiondan 100 mindən çox erməninin qaçdığını deməklə Qarabağın hazırda boş olduğunu etiraf edir.
Samirə SƏFƏROVA
