Azərbaycan və Ermənistan parlamentlərinin sədrləri Sahibə Qafarova və Alen Simonyan arasında mübahisə yaşanıb. Bu hadisə Qazaxıstanın Almatı şəhərində MDB üzvü dövlətlərin Parlamentlərarası Assambleya Şurasının iclasında Qarabağda baş verən son hadisələrin müzakirəsi zamanı baş verib.
Ermənistan parlamentinin sədri Alen Simonyan çıxışında deyib ki, guya Azərbaycan tərəfi atəşkəs rejimini pozub. Öz növbəsində, Milli Məclisin sədri Sahibə Qafarova iclasın yekun hissəsində söz alaraq rəsmi Bakının mövqeyini açıqlayıb: “Azərbaycan tərəfindən guya atəşkəs rejiminin pozulması barədə məlumat həqiqəti əks etdirmir... Qanunsuz erməni silahlı birləşmələrinin üzvləri Azərbaycanın suveren ərazisinə daxil olub, Azərbaycan Ordusunun birləşmələrinə qarşı növbəti təxribat həyata keçirməyə cəhd edib və nəticədə bizim Silahlı Qüvvələrimizin fəaliyyəti nəticəsində onlar geri çəkilməyə məcbur olublar”.
O, həmçinin bildirib ki, Azərbaycan 10 noyabr 2020-ci ildə imzalanan üçtərəfli bəyanata sadiqdir və bəyanatın müddəalarını Azərbaycan deyil, Ermənistan pozur. Sahibə Qafarova eyni zamanda, erməni ordusunun qalıqlarının və qanunsuz erməni silahlı birləşmələrinin Azərbaycan ərazisindən tamamilə çıxarılmasını tələb edib. O qeyd edib ki, Azərbaycan üçtərəfli bəyanata uyğun olaraq bütün hərbi əsirləri Ermənistana təhvil verib. Onun sözlərinə görə, bəyanatı imzaladıqdan sonra Azərbaycan ərazisinə daxil olan Ermənistan Silahlı Qüvvələrinin hərbi qulluqçuları Cenevrə Konvensiyasına uyğun olaraq hərbi əsir kimi tanınmır və cinayət məsuliyyətinə cəlb olunurlar.
Bu bəyanatlara cavab olaraq Ermənistan parlamentinin sədri Alen Simonyan iddia edib ki, pozuntular təkcə Ermənistan tərəfindən deyil, həm də bu ərazidə sabitliyin qarantı olan Rusiya tərəfindən qeydə alınıb: "Bir daha demək istəyirəm, Ermənistan Azərbaycana sülh müqaviləsinin bağlanması ətrafında dərhal danışıqlara başlamağı təklif edir".
Azərbaycan Milli Məclisinin rəhbəri cavabında bəyan edib ki, Bakı dəfələrlə İrəvana erməni tərəfinə çox yaxşı məlum olan beş bəndi nəzərə alaraq sülh müqaviləsi imzalamağı təklif edib:
“Mən rəsmən bəyan edirəm ki, Ermənistan üçün bu beş məqam məqbuldur və hesab edirik ki, bəzi aspektləri əlavə etsək, bu işi həyata keçirməyə başlaya bilərik”.
Göründüyü kimi, artıq Rusiyanın rəsmi dairələrinin Qarabağda baş verənlərlə bağlı ifadə etdikləri yanlış mövqe beynəlxalq tədbirlərdə belə Ermənistanın istinad mənbəyinə çevrilib. Elə bu, son hadisələrin erməni təxribatı olduğuna ən bariz sübutdur. Bununla bağlı ekspertlərin rəyi necədir?
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, son günlər Qarabağda baş verən proseslərlə bağlı Rusiya Federasiyası Müdafiə Nazirliyinin verdiyi açıqlamalar heç də təsadüfi deyil: “Bu açıqlamaları 44 günlük Vətən müharibəsindən sonra Rusiya silahlı qüvvələrindən ibarət sülhməramlıların zaman-zaman imzalanan sənədlərə hörmətsiz siyasətinin davamı kimi qəbul etmək üçün ciddi əsaslar var. Diqqət etsək görərik ki, ötən il yarımdan çox müddətdə dəfələrlə Qarabağın bəlli ərazisində müvəqqəti olaraq yerləşən Rusiya sülhməramlıları verdikləri açıqlamlarında, çap etdikləri hansısa xəritələrdə ancaq və ancaq ermənilərin xeyrinə “texniki səhvlərə” yol veriblər. Və bu yanlışlar Azərbaycanın rəsmi etirazlarından sonra aradan qaldırılıb. Üstəlik, sülhməramlılar daha çox öz missiyasına tamamilə zidd fəaliyyəti ilə diqqəti cəlb edib və bu, Azərbaycan cəmiyyətinin haqlı narazılığı ilə müşahidə olunub. Bura Ermənistanın başıpozuq silahlı dəstələrinin hələ də sülhməramlıların yerləşdiyi ərazidə himayə edilməsini və məhz həmin ərazilərdə atəşkəsin pozulmasını da əlavə etsək, Rusiya silahlı qüvvələrindən ibarət sülhməramlıların fəaliyyətinə kölgə düşür. Halbuki, 10 noyabr tarixli Bəyanatın 4-cü bəndinə əsasən, erməni silahlı dəstələri bölgədən tamamilə çıxarılmalıdır. Həmin sənədə əsasən, Rusiya Federasiyasının sülhməramlı kontingenti erməni silahlı qüvvələrinin çıxarılması ilə paralel şəkildə yerləşdirilməli idi. Bu qədər birtərəfli qaydada davam edən proseslər əsaslı şübhələr doğurmaya bilməz. Mümkün deyil ki, Rusiya Müdafiə Nazirliyi kimi ciddi bir qurum verdiyi açıqlamanın elə bu ölkənin prezidenti Vladimir Putinin imza atdığı sənədlərə tamamilə zidd olmasını anlamasın. Rusiya Müdafiə Nazirliyinin 26 və 27 mart tarixlərində verdiyi açıqlamalarda əks olunan məqamlar içərisində həqiqətə uyğun gələn bir dənə də fakt yoxdur. Və bununla bağlı Azərbaycan Müdafiə Nazirliyinin haqlı bəyanatları yayılıb.
Rusiya Müdafiə Nazirliyinin açıqlamasında atəşkəsin guya Azərbaycan tərəfindən pozulması, Azərbaycan hərbçiləri arasında yaralananların olması barədə həqiqətdən uzaq fikirlər yer alıb. Bütün bu yanlış məlumatlara Ermənistanın beynəlxalq tədbirdə istinad edərək Azərbaycanı qaralamaq cəhdi açıq təxribatın konturlarını üzə çıxarır. Deməli, bütün bunlar Rusiya ilə Ermənistanın bizə qarşı planlaşdırdığı təxribatdır”.
Məhəmmədəli QƏRİBLİ
